سەنات توراعاسى قاسىم-جومارت توقاەۆ مەكسيكا سەناتى حالىقارالىق بايلانىستار جونىندەگى كوميتەتىنىڭ توراعاسى گابريەلا كۋەۆاس بارروندى قابىلدادى. ق.توقاەۆتىڭ پىكىرىنشە, مەكسيكالىق سەناتوردىڭ ساپارى قازاقستان مەن مەكسيكا اراسىنداعى پارلامەنتتىك ۇنقاتىسۋدىڭ باستالعانىن كورسەتەدى.
قازاقستان سەناتىنىڭ باسشىسى ەلىمىزدىڭ قازىرگى كەزدەگى دامۋى جانە پرەزيدەنت نۇرسۇلتان نازارباەۆتىڭ بەس ينستيتۋتتىق رەفورماسىن ىسكە اسىرۋ جوسپارى تۋرالى ايتتى. ول ەۋرازيالىق ەكونوميكالىق وداق جانە لاتىن امەريكاسىنداعى ينتەگراتسيالىق بىرلەستىكتەر قىزمەتى تۇرعىسىندا قازاقستان مەن مەكسيكا ساۋدا-ەكونوميكالىق ىنتىماقتاستىعىنىڭ جاڭا مۇمكىندىكتەرىن تولىقتاي پايدالانۋعا شاقىردى. ق.توقاەۆ مەكسيكالىق كومپانيالاردى استانادا وتەتىن حالىقارالىق ەكسپو-2017 كورمەسىنە شاقىردى.
گ.كۋەۆاس مەكسيكانىڭ قازاقستانمەن جان-جاقتى قاتىناستاردى دامىتۋعا زور ءمان بەرەتىنىن, وعان بيىل استانادا مەكسيكا ەلشىلىگىنىڭ اشىلاتىنى دالەل بولاتىنىن اتاپ ءوتتى. ول ەكىجاقتى جانە حالىقارالىق پارلامەنتتىك فورۋمدار اياسىنداعى پارلامەنتارالىق بايلانىستاردى نىعايتۋ جايىندا دا ايتتى. ءوزىنىڭ قازاقستانعا ساپارىنان العان اسەرى تۋرالى ايتا كەلىپ, مەيمان ايماقتىق دامۋداعى ءبىزدىڭ ەلىمىزدىڭ ماڭىزدى رولىنە توقتالدى, سونداي-اق, ايەلدەردىڭ قوعامدىق ومىرگە قاتىسۋى جوعارى دەڭگەيدە ەكەنىنە نازار اۋداردى.
جۇزدەسۋشىلەر, سونىمەن قاتار, تەرروريزم مەن ەسىرتكى تاسىمالىنا قارسى ءىس-قيمىل ماسەلەلەرى تۋرالى دا پىكىر الماستى, دەپ حابارلادى پارلامەنت سەناتىنىڭ ءباسپاسوز قىزمەتى.