سولتۇستىك قازاقستان وبلىسىنىڭ ايىرتاۋ اۋدانىنا قاراستى كۋتۋزوۆكا اۋىلىندا قۇرىلىسى اياقتالۋعا جاقىن قالعان جاڭا زاۋىت تامىز ايىندا ىسكە قوسىلادى. بۇل قۇرعاق بيە ءسۇتىن وندىرەتىن وڭىردەگى العاشقى ءوندىرىس ورنى بولماق, دەپ جازادى Egemen.kz.
جوبانى «سەۆەر اگرو LTD» سەرىكتەستىگى جۇزەگە اسىرىپ جاتىر. ال قۇرىلىس پەن وندىرىستىك جۇمىستىڭ جاۋاپكەرشىلىگىن «سولتۇستىك» الەۋمەتتىك-كاسىپكەرلىك كورپوراتسياسى موينىنا الىپ وتىر.
فەرما 400 باس مۇعالجار تۇقىمدى بيەگە ەسەپتەلگەن. العاشقى 200 ساۋىندى بيە شىلدە ايىنىڭ سوڭىنا دەيىن جەتكىزىلەدى دەپ جوسپارلانىپ وتىر.
زاۋىت جىلىنا 12-دەن 40 تونناعا دەيىن قۇرعاق بيە ءسۇتىن وندىرەدى. ءونىمنىڭ نەگىزگى بولىگى گەرمانيا مەن قىتاي نارىعىنا ەكسپورتتالادى.
ايتا كەتەيىك, قۇرعاق بيە ءسۇتى – بيولوگيالىق قۇندىلىعى جوعارى ءونىم. ول بالالار تاعامىندا, كوسمەتولوگيادا جانە فارماتسەۆتيكادا كەڭىنەن قولدانىلادى. اسىرەسە شەتەلدە بۇل ونىمگە دەگەن سۇرانىس جىلدان جىلعا ارتىپ كەلەدى.