اپتاپ ىستىعى اپشىنى قۋىراتىن جاز مەزگىلى جەتسە, جۇرتتىڭ اعىن سۋدان ايتارلىقتاي تارىعاتىنى بەلگىلى. ەبىن تاپقاندار جول بويىنان وزەن سۋىن ءوز القابىنا بۇرىپ الىپ, ديقانداردىڭ شامىنا تيگەن كەز دە از ەمەس.
ودان بولەك, تالاس سەكىلدى ترانسشەكارالىق وزەندەردە سۋ تاپشىلىعى بايقالاتىن جىلداردى دا كوردىك. مۇنىڭ ءبارى شارۋالاردى جاڭاشىلدىققا بەت بۇرۋعا ۇندەپ تۇرعانداي ەدى.
كەيىنگى بىرنەشە جىلدىڭ بەدەرىندە جامبىلدىق شارۋالار جاڭا تەحنولوگياعا بەت بۇرىپ, تامشىلاتىپ سۋارۋ ادىسىنە كوشتى. ءبىرشاما ۋاقىت بۇرىن وڭىردە تامشىلاتىپ سۋارۋ جۇيەسىن شىعاراتىن زاۋىت تا ىسكە قوسىلعان. ايماقتا مۇنداي ىرگەلى كاسىپورىننىڭ جۇمىس ىستەۋى – سۋ ۇنەمدەۋ تەحنولوگياسىنا باسىمدىق بەرۋدىڭ العىشارتى.
2023 جىلى سۋ ۇنەمدەۋ تەحنولوگيالارىنىڭ الاڭى 40 مىڭ گەكتاردى قۇراسا, كەيىنگى جىلدارى بۇل كورسەتكىش ەداۋىر ارتقان. سەبەبى جاۋاپتى ماماندار بۇل جۇمىستى ىرگەلى شارۋا قوجالىق باسشىلارىنا كەڭىنەن تۇسىندىرۋدەن جالىققان ەمەس. ءوڭىر باسشىسى ەربول قاراشوكەەۆتىڭ باستاماسىمەن تامشىلاتىپ جانە جاڭبىرلاتىپ سۋارۋ جۇيەسىن ەنگىزۋ بويىنشا قولعا الىنعان جۇمىس ۇدايى جۇرگىزىلۋدە. وڭىردە سۋ ۇنەمدەۋ تەحنولوگيالارى 2024 جىلى تاعى بىرنەشە مىڭ الاڭعا ەنگىزىلىپ, جالپى كورسەتكىش 55,4 مىڭ گەكتارعا جەتكىزىلىپتى. وسى جىلى جاڭا تەحنولوگيانى قولدانۋ ارقىلى ەگىس القابىنىڭ جالپى الاڭىن 89,2 مىڭ گەكتارعا دەيىن جەتكىزۋ كوزدەلگەن.
«مەملەكەت باسشىسى قاسىم-جومارت توقاەۆ سۋ رەسۋرستارىن ۇتىمدى جانە ورنىقتى باسقارۋدىڭ ماڭىزىن ۇدايى ايتىپ ءجۇر. راسىندا, بۇل – اگروونەركاسىپتىك كەشەندى دامىتۋعا جانە حالىقتىڭ ءال-اۋقاتىن جاقسارتۋعا تىكەلەي اسەر ەتەتىن ستراتەگيالىق ماڭىزدى باعىتتىڭ ءبىرى. سوندىقتان القاپتارعا سۋ ۇنەمدەۋ تەحنولوگيالارىن ەنگىزۋدىڭ ماڭىزى زور دەۋگە تولىق نەگىز بار. وڭىردە سۋ نىساندارىنىڭ ينفراقۇرىلىمىن جاڭعىرتۋ جانە سۋ ۇنەمدەۋ تەحنولوگياسىن ەنگىزۋ بويىنشا اۋقىمدى جۇمىستار اتقارىلىپ جاتىر. قازىرگە دەيىن زاماناۋي تەحنولوگيا 66,5 مىڭ گەكتار اۋماققا ەنگىزىلگەن. الداعى ۋاقىتتا بۇل كورسەتكىشتى ەسەلەۋگە تولىق مۇمكىندىك بار», دەيدى ءوڭىر باسشىسى ەربول قاراشوكەەۆ.
وبلىستىق اۋىل شارۋاشىلىعى باسقارماسىنىڭ باسشىسى قايرات كوشەنوۆتىڭ ايتۋىنشا, «KAZ كاسپي گيدرو سەلحوز تەحنولوگيا» زاۋىتى جىلىنا 14 مىڭ گەكتارعا دەيىنگى القاپتى قامتيتىن قۇرىلعىلار وندىرە الادى. سونىمەن بىرگە جاڭبىرلاتىپ سۋارۋ قوندىرعىسى مەن تامشىلاتىپ سۋارۋ جۇيەلەرىن وندىرەتىن تاعى ەكى جوبانى ىسكە اسىرۋ بويىنشا ناقتى جۇمىستار قولعا الىنعان.
جامبىل وبلىسىندا سۋ ۇنەمدەۋ تەحنولوگيالارىن ەنگىزۋ بويىنشا اتقارىلىپ جاتقان جۇمىس قارقىنى كوڭىل كونشىتەدى. بىرەر جىل بۇرىن بۇل ىسكە ۇركە قاراعان شارۋالار كارى قۇرلىقتان جەتكەن جاڭاشىلدىقتىڭ پايداسىن تەرەڭنەن تۇسىنگەن سىڭايلى.
جامبىل وبلىسى