اقتوبە وبلىسىندا مەتاللۋرگتەر كۇنىنە وراي سالتاناتتى شارالار ءوتىپ جاتىر. ەلىمىزدىڭ يندۋستريالىق الەۋەتىن نىعايتىپ, تۇراقتى دامۋىنا سەرپىن بەرىپ وتىرعان مەتاللۋرگتەردىڭ كاسىبي مەرەكەسىنە وراي بىرنەشە ەڭبەك وزاتى مەملەكەتتىك ناگرادالارمەن ماراپاتتالدى, دەپ حابارلايدى Egemen.kz.
ءوڭىر باسشىسى اسحات شاحاروۆ «قازحروم» تۇك» اق باس ديرەكتورى سەرگەي پروكوپەۆكە –«قۇرمەت» وردەنى, «اقتوبە مىس كومپانياسى» جشس-ءى ەكسكاۆاتور ءماشينيسى مارات ساقتاەۆقا جانە «اقتوبە رەلس-ارقالىق زاۋىتىنىڭ» اۆتوكولىك جۇرگىزۋشىسى سەرىك سۇلەيمەنوۆكە «ەرەن ەڭبەگى ءۇشىن» مەدالىن تابىستادى.
«مەملەكەت باسشىسى ءادال ارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى, سىيلى بولۋى كەرەك دەگەن ۇندەۋ تاستاپ, بيىلعى جىلدى «جۇمىسشى ماماندىقتار جىلى» دەپ جاريالادى. وسى جىل اياسىندا جۇمىسشى ماماندىعىنىڭ قوعامداعى بەدەلىن ارتتىرۋ, ەڭبەك ادامىنا لايىقتى قۇرمەت كورسەتۋ جانە كاسىبي شەبەرلىكتى دامىتۋ باستى ماقساتتاردىڭ ءبىرى بولىپ وتىر. بۇگىن ءبىز ەلىمىزدىڭ ونەركاسىپتىك قۋاتىن ارتتىرىپ, ەكونوميكالىق تۇراقتىلىققا زور ۇلەس قوسىپ جۇرگەن سالا ماماندارىن قۇرمەتتەۋ ءۇشىن جينالدىق. تابىستالاتىن ماراپات — ەڭبەك ادامىنا دەگەن قۇرمەتتىڭ ناقتى كورىنىسى», دەدى ول.
قازىرگى ۋاقىتتا اقتوبە وبلىسىندا 18 مىڭنان استام ادام ەڭبەك ەتەتىن سەگىز ءىرى تاۋ-كەن كاسىپورنى بار. ولاردىڭ اراسىندا «قازحروم» ترانسۇلتتىق كومپانياسى, «ۆوسحود وريەل», «اقتوبە مىس كومپانياسى» جانە «اقتوبە رەلس-ارقالىق زاۋىتى» كومپانيالارىنىڭ ونىمدەرى الەمدىك نارىقتا جوعارى سۇرانىسقا يە. كۇنى كەشە اقتوبە فەرروقورىتپا زاۋىتىندا ءبىر پەشتە 177 توننادان استام جوعارى كومىرتەكتى فەرروحروم ءوندىرىلىپ, الەمدىك رەكورد جاڭارتىلدى. بۇل جەتىستىك WORLD BOOK OF RECORDS تىزىمىنە ەنگىزىلىپ, حالىقارالىق دەڭگەيدە مويىندالدى.
اقتوبە وبلىسى