Euronews حالىقارالىق تەلەارناسى قازاقستاننىڭ تۋريستىك الەۋەتىن تانىتۋعا ارنالعان Modern Nomads باعدارلاماسىنىڭ ەكى جاڭا ەپيزودىنىڭ ءتۇسىرىلىمىن اياقتادى, دەپ جازادى Egemen.kz.
ءتۇسىرىلىم توبى بۇل جولى بايقوڭىر مەن كاتون-قاراعاي وڭىرلەرىنە ساپار شەكتى. ەپيزودتار 2025 جىلدىڭ قىركۇيەك ايىندا ەفيرگە شىعادى دەپ جوسپارلانىپ وتىر.
بايقوڭىرداعى ءتۇسىرىلىم بارىسىندا كوماندا عارىش ايلاعىندا وتكەن زىمىران ۇشىرۋ ءساتىن ءتۇسىرىپ ۇلگەردى. جىلىنا التى-جەتى رەت وتەتىن مۇنداي تاريحي وقيعالار حالىقارالىق كورەرمەننىڭ قىزىعۋشىلىعىن تۋدىرىپ وتىر. باعدارلامادا «گاگارين ستارتى», «بۋران» كەمەسى, بايقوڭىر مۋزەيى, ديناميكالىق سىناق ستەندى مەن مونتاجدى-وتىن قۇيۋ كەشەنى كورسەتىلەدى. سونداي-اق ءتۇسىرىلىم توبى قىزىلوردا وبلىسىنداعى كورقىت اتا مەموريالدىق كەشەنى مەن وبلىستىق ولكەتانۋ مۋزەيىنە دە بارعان.
باعدارلامانىڭ ەكىنشى ەپيزودى كاتون-قاراعاي ۇلتتىق پاركىنە ارنالدى. ءتۇسىرىلىم راحمان قاينارى مەن كوككول سارقىراماسىندا, سونداي-اق ۇرىل مەن كوروبيحا اۋىلدارىندا ءوتتى. بۇل بولىمدە حالىق مەديتسيناسىن تانىستىرۋعا باسىمدىق بەرىلگەن. رەپورتاجدا پانتامەن ەمدەۋ, اپيتەراپيا, تابيعي شيكىزاتتان جاسالاتىن بيوقوسپالار مەن دارىلىك ونىمدەر تۋرالى ايتىلادى.
Kazakh Tourism ۇلتتىق كومپانياسىنىڭ مالىمەتىنشە, Euronews جوباسى ەلىمىزدىڭ ەكوتۋريزمى مەن مادەني مۇراسىن شەتەلدىك اۋديتورياعا كەڭىنەن تانىتۋعا باعىتتالعان.
ەسكە سالايىق, بۇعان دەيىن كاتون-قاراعايدا ەكولوگيالىق تەپە-تەڭدىكتى ساقتاۋ ءۇشىن تۋريستەر سانىن شەكتەۋ ماسەلەسى كوتەرىلگەن بولاتىن.