استانادا «ساحنادان سالەم» اتتى ءىىى حالىقارالىق تەاتر فەستيۆالىنىڭ شىمىلدىعى اشىلدى. بۇل – قازاقستان مەن جاقىن شەتەلدىڭ تەاترلارى ءۇشىن ماڭىزدى ءارى ايتۋلى وقيعا. استانا كۇنىن تويلاۋ اياسىندا قازاقستان, رەسەي جانە گرۋزيانىڭ جەتەكشى ارتىستەرى ءبىر اپتا بويى استانا تەاترلارىنىڭ ساحنالارىندا ۇزدىك قويىلىمدارىن قويادى. استانانىڭ 17 جىلدىعىن تويلاۋ ناق وسى تەاتر اپتالىعىنان باستاۋ الماق.
بيىل اتالعان شارا وسىمەن ءۇشىنشى جىل قاتارىنان وتەدى. جىل وتكەن سايىن ونىڭ اۋقىمى كەڭەيىپ, جاڭا ەلدەر مەن قالالاردى قامتىپ جاتىر. بيىلعى «ساحنادان سالەمگە» قاتىساتىن 12 ۇجىم قالالىقتار مەن قوناقتارعا سوڭعى جىلدارداعى ەڭ تاڭداۋلى, حالىقارالىق, رەسپۋبليكالىق تەاتر فەستيۆالدارىندا جەڭىمپاز اتانعان قويىلىمدارىن ۇسىنادى.
شارانىڭ العاشقى قويىلىمى بۇگىن كونگرەسس-حولدا وتەدى. بۇل تۋرالى قازاقستان كونتسەرت زالىندا بەلگىلى رەسەي اكتەرى سەرگەي بەزرۋكوۆتىڭ قاتىسۋىمەن وتكەن شارادا ءمالىم بولدى. تانىمال ءارتىس جەتەكشىلىك ەتەتىن تەاتر كورەرمەنگە تانىمال «سيرانو دە بەرجەراك» تۋىندىسىن قويادى. قويىلىمنىڭ ەرەكشەلىگى زاتتار مەن ارەكەتتەر ىقشام تۇردە سوزبەن بەينەلەنىپ وتىرماق. بۇل كورۋ قابىلەتتەرى ناشار جانە زاعيپ 20 كورەرمەنگە سپەكتاكلدى تولىق قابىلداۋعا مۇمكىندىك بەرەدى. باستى ءرولدى سەرگەي بەزرۋكوۆ سومدايدى. كينو تۋرالى ايتپاعاننىڭ وزىندە, سەرگەي ەسەنين, الەكساندر پۋشكين, ءتىپتى, اتى اڭىزعا اينالعان بارد ءانشى ۆلاديمير ۆىسوتسكيدى شەبەر سومداپ, كورەرمەن ىقىلاسىنا بولەنگەن سەرگەي بەزرۋكوۆتىڭ استانالىق جانكۇيەرلەرى سۇيىكتى اكتەرلەرىمەن جۇزدەسۋگە اسىق. ايتا كەتەيىك, بۇل بەزرۋكوۆتىڭ استاناداعى العاشقى قويىلىمى ەمەس.
مۇنىمەن قوسا, فەستيۆال اياسىندا ا.گريبوەدوۆ اتىنداعى تبيليسي مەملەكەتتىك اكادەميالىق ورىس دراما تەاترى ونەر كورسەتەدى. م.گوركي اتىنداعى مەملەكەتتىك اكادەميالىق ورىس دراما تەاترىنىڭ ساحناسىندا ارتىستەر ل.تولستويدىڭ پوۆەسىنە نەگىزدەلگەن قويىلىمدى ساحنالاماق.
قازاق تىلىندەگى قويىلىمداردى اقتاۋ, اقتوبە, الماتى, استانا, پەتروپاۆل, تالدىقورعان جانە تۇركىستاننىڭ تەاترلارى ۇسىنادى.
راۋشان تاۋىرحانقىزى,
جۋرناليست.