ينۆەستيتسيا مەن ەكسپورت – ءوسىم وزەگىنە اينالدى

ءمينيستردىڭ مالىمەتىنشە, 2025 جىلدىڭ قاڭتار–مامىر ايلارى ارالىعىندا نەگىزگى كاپيتالعا سالىنعان ينۆەستيتسيا كولەمى 19,3 پايىزعا ارتتى. بۇل ءوسىم, اسىرەسە, بولاشاق ەكونوميكاسىن قۇرايتىن سالالاردا ايقىن كورىنىس تاپتى. ماسەلەن, ءبىلىم بەرۋ سالاسىنا قۇيىلعان ينۆەستيتسيا 3,5 ەسەگە كوبەيسە, قارجى جانە ساقتاندىرۋ قىزمەتى – 86,2%-عا, وڭدەۋ ونەركاسىبى – 48,9%-عا, دەنساۋلىق ساقتاۋ – 32,8%-عا, كولىك سالاسى – 16,2%-عا ۇلعايعان.

سىرتقى ساۋدادا دا وڭ وزگەرىستەر بار. اتالعان كەزەڭدە ەلىمىزدىڭ سىرتقى ساۋدا تاۋار اينالىمى $53,5 ملرد-تى قۇراپ وتىر. ونىڭ ىشىندە ەكسپورت كولەمى $29,8 ملرد-قا جەتسە, سونىڭ $10,2 ملرد-ى وڭدەلگەن ونىمدەرگە تيەسىلى. ال يمپورت 2,2 پايىز ءوسىپ, $23,8 ملرد-تى قۇرادى.

ۇكىمەت وتىرىسىندا استىق تاسىمالىنا قاتىستى دا ناقتى دەرەكتەر ايتىلدى. بيىلعى بەس ايدا 11,8 ملن توننا استىق پەن ۇن ەكسپورتتالدى. ونىڭ ىشىندە 9 ملن تونناسى – تازا استىق. بۇل – سوڭعى 13 جىلداعى ەڭ جوعارى كورسەتكىش. استىق ەكسپورتىنىڭ نەگىزگى باعىتتارى – وزبەكستان, تاجىكستان, يران جانە ازەربايجان.

«سىرتقى ساۋدانىڭ جالپى تومەندەۋىنە قاراماستان, قازاقستان $6 ملرد كولەمىندە وڭ ساۋدا بالانسىن ساقتاپ وتىر», دەدى سەرىك جۇمانعارين.

ۇكىمەت مۇشەلەرى بۇل كورسەتكىشتەردىڭ ەل ەكونوميكاسىن ءارتاراپتاندىرۋ مەن ءوندىرىس قۋاتىن ارتتىرۋدا ماڭىزى زور ەكەنىن اتاپ ءوتتى.