اقمولا وبلىسى, اقكول اۋدانىندا ورنالاسقان «بوروۆيچوك» دەمالىس ايماعى 25 جىلدان بەرى بالدىرعانداردىڭ كۇلكىسىمەن كومكەرىلىپ كەلەدى. جىل سايىن استانالىق بالالار ءۇيىنىڭ بارلىق تاربيەلەنۋشىلەرى اتالعان دەمالىس ورنىندا جازعى كۇندەرىن قىزىقتى وتكىزۋگە مۇمكىندىك الادى. ساۋىقتىرۋ ماۋسىمىنىڭ اشىلۋىنا ارنالعان سالتاناتتى ساپ تۇزەۋ وتكىزىلدى.
«استانالىق بالالار ءۇيى تاربيەلەنۋشىلەرى 3 اي بويى «بوروۆيچوك» جازعى لاگەرىندە دەمالاتىن بولادى. بىلتىرعى جىلى 250 بالا تاربيەلەنگەن بولسا, بيىلعى جىلى 134 بالا قاراۋىمىزدا. جىل سايىن مۇندا كەلۋشىلەردىڭ سانى ازايىپ كەلەدى, ارينە ءبىزدى قۋانتاتىن جاعداي. بۇل ەلىمىزدە جەتىمدەر سانىنىڭ ازايىپ جاتقاندىعىنىڭ كورسەتكىشى. وسى ۋاقىتقا دەيىن ءجۇز بالا پاتروناتتىق قامقورلىققا الىندى. وتباسى تاربيەسىنە الىنسا دا 25 جاسقا تولعانشا مىندەتتى تۇردە قاداعالاۋىمىزدا بولادى. ءبىز قانشا جاقسىلىق جاساعانىمەن, ءاربىر ءسابي جۇرەگى اتا-انانىڭ مەيىرىمىنە بولەنۋىن اڭسايتىنى انىق», دەيدى استانا قالاسى ءبىلىم باسقارماسىنىڭ باسشىسى ەلميرا سۋحانبەرديەۆا.
بالالار ءۇيى تاربيەلەنۋشىلەردىڭ تۋىستىق بايلانىستارىن ەسكەرە وتىرىپ 12 وتباسىنا ءبولىنگەن. مۇندا بالالار 4 جاستان باستاپ مەكتەپ بىتىرگەنگە دەيىن تاربيەلەنەدى.
«بالالار ۇيىندە 19 جىلدان استام قىزمەت ەتەمىن. بۇل لاگەر تابيعاتى وتە اسەم جەردە ورنالاسقان. دەمالىس كەزىندە بالالاردىڭ تازا اۋادا كوبىرەك بولۋىنا جانە ساپالى ءبىلىم الىپ, سپورتپەن اينالىسۋىنا بارلىق جاعداي جاسالعان. مۇندا جىل سايىن بالالار ءۇشىن تابيعاتتى قورعاۋ جونىندە ارنايى ساباقتار وتكىزىلەدى. دەمالىس ورىنى تەك جاز ايىندا عانا ەمەس, سونىمەن قاتار, جىلدىڭ ءتورت مەزگىلىندە دە جۇمىس ىستەيدى. قىستا كوبىنە جوعارى سىنىپ وقۋشىلارى تازا اۋادا شاڭعى تەۋىپ قىزىقتى ساتتەرگە كۋا بولادى», دەيدى بالالار ءۇيىنىڭ تاربيەشىسى باتەس سماعۇلقىزى.
بالالار ءۇيىنىڭ مۇعالىمدەرى ءوز تاربيەلەنۋشىلەرىنىڭ بوس ۋاقىتتارىن كوڭىلدى ۇيىمداستىرۋمەن قاتار, ءار بالانىڭ شىعارماشىلىق قابىلەتىن ودان ءارى جەتىلدىرىپ, ولاردىڭ بويىنداعى قابىلەتتەرىن اشۋ مۇمكىندىكتەرىن دە قاراستىرىپ وتىر. شارا سوڭىندا مەكتەپ ءبىتىرۋشى تۇلەكتەرگە اتتەستاتتار مەن كۋالىكتەر تابىستالىپ, بەلسەندى وقۋشىلار باعالى سىيلىقتارمەن ماراپاتتالدى. مەكتەپ تۇلەكتەرى ۇمىتىلماس بۇل كۇندى دوستار اراسىندا وت الاۋىن جاعىپ اياقتادى.
دينارا دوسپان.