قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ پودكاستىندا بىرىڭعاي ەسەپكە الۋ جۇيەسى (بەج) تۋرالى ايتىلدى. جاڭا جۇيە ويىنشىلاردىڭ مۇددەسىن قورعاۋعا, سونداي-اق كليەنتتەر مەن بۋكمەكەرلەر اراسىنداعى داۋلاردى ءادىل شەشۋگە جول اشادى, دەپ حابارلايدى Egemen.kz.
قر تۋريزم جانە سپورت مينيسترلىگىنە قاراستى ويىن بيزنەسىن جانە لوتەرەيانى رەتتەۋ كوميتەتىنىڭ توراعاسى ادىلەت تۇرعانباەۆتىڭ ايتۋىنشا, بۋكمەكەرلىك كەڭسەلەرگە قاتىستى شاعىمدار كۇن سايىن تىركەلىپ وتىرادى. كوپ جاعدايدا كليەنتتەر ۇتىستارىن الا الماۋىنا نەمەسە قاراجاتىن ەنگىزگەن سوڭ اككاۋنتىنىڭ بۇعاتتالۋىنا نارازىلىق بىلدىرەدى. بۇرىن مۇنداي داۋ تۋىنداعاندا مينيسترلىك تەك بۋكمەكەرلىك كەڭسەنىڭ جاۋابىنا سۇيەنۋگە ءماجبۇر بولعان, ال ولاردىڭ ءوز كىناسىن مويىنداۋى وتە سيرەك.
«ارينە, ولار ەشقاشان, ءتىپتى كىنا وزدەرىندە بولعان جاعدايدا دا, ونى مويىندامايدى. ال ءادىل شەشىم شىعارۋ ءۇشىن بىزگە جۇيە (بەج) كومەكتەسەدى. ءبىز بۇكىل ءباس تىگۋ تاريحىن كورەمىز. ەگەر ادام ءباس تىگىپ, ۇتىپ السا, بىراق تۇسىنىكسىز, ەرەجەلەردە جانە زاڭدا جازىلماعان سەبەپتەرمەن وعان ۇتىس تولەنبەسە, ءبىز بۋكمەكەرلەردى شارت تالاپتارىن ورىنداۋعا مىندەتتەيمىز. ياعني, ءبىز كليەنتتىڭ ازامات رەتىندە تۇتىنۋشىلىق قۇقىعىن قورعايمىز», دەدى ادىلەت تۇرعانباەۆ.
ونىڭ ايتۋىنشا, زاڭسىز ونلاين پلاتفورمالاردا ويناعان ادامداردىڭ قۇقىقتارىن مەملەكەت قورعاي المايدى. ونداي سايتتاردا ەشقانداي كەپىلدىك بەرىلمەيدى. ال بەج ەنگىزىلگەننەن كەيىن زاڭدى بۋكمەكەرلىك كەڭسەلەردى باقىلاۋ جانە باعالاۋ مۇمكىندىگى ارتادى. بۇل جۇيە كولەڭكەلى نارىقپەن كۇرەسۋگە, زاڭسىز پلاتفورمالاردى بۇعاتتاۋعا جانە ازاماتتاردىڭ تەك زاڭدى ءارى قاۋىپسىز ويىن الاڭدارىن پايدالانۋىنا جاعداي جاسايدى. سول كەزدە ازاماتتار ونداي سايتتارعا كىرە المايدى, تەك قۇقىقتارى زاڭمەن جانە بەج ارقىلى مەملەكەتپەن قورعالعان زاڭدى الاڭداردا عانا وينايدى.