وبلىس اكىمدىگى مادەنيەت جانە تىلدەردى دامىتۋ باسقارماسىنا قاراستى حالىق شىعارماشىلىعى ورتالىعىنىڭ ۇيىتقى بولۋىمەن «اۋليەاتا اۋەندەرى» جوباسىنىڭ ۇزدىكتەرى ساحنا تورىنە كوتەرىلىپ, گالا-كونتسەرت قويدى. «ەرلىك» مەموريالدىق كەشەنىندەگى «جەڭىس» ساياباعىندا وتكەن دۋماندى كەشكە تارازدىق ونەرسۇيەر قاۋىم كوپ جينالدى.
ادەبي-مادەني كەش بارىسىندا ءسوز العان ءوڭىر باسشىسىنىڭ ورىنباسارى سەرىك سالەموۆ جوبا اياسىندا تەر توككەن شىعارماشىل جاستاردى قۇتتىقتاپ, ولاردىڭ كاسىبي مانسابىنا, شىعارماشىلىق جولىنا تابىس تىلەدى. ول جەرگىلىكتى اتقارۋشى بيلىك تالانتتى جاستاردى قولداپ, ىلكىمدى جوبالار ارقىلى جاستاردىڭ كاسىبي تۇرعىدان دامۋىنا مول مۇمكىندىك قاراستىرىلاتىنىن اتاپ ءوتتى. ء«داستۇرلى ءان», «اسپاپتا ورىنداۋ», «ۆوكال» اتالىمدارى بويىنشا ۇزدىك شىققان قاتىسۋشىلارعا ارنايى ديپلوم مەن كادەسىي تابىستادى.
ۇيىمداستىرۋشى تاراپتىڭ ايتۋىنشا, جوبا جەڭىمپازدارى ورىنداعان اندەر مەن كۇيلەر ارنايى مۋزىكالىق جيناققا توپتاستىرىلعان. ءساۋىر ايىندا باستالعان وڭىرلىك جوبانىڭ ىرىكتەۋ كەزەڭى مامىر ايىندا وتكىزىلگەن. «اۋليەاتا اۋەندەرى» جوباسىنا ءوڭىردىڭ بارلىق اۋداندارى مەن تاراز قالاسىنان 271 ۇمىتكەر ءتۇرلى اتالىم بويىنشا باق سىناپتى. ولاردىڭ ىشىنەن سۇرىپتالىپ الىنعان 63 قاتىسۋشى وبلىستىق كەزەڭگە جولداما العان. سول 63 سايىپقىراننىڭ اراسىنان ۇزدىك دەپ تانىلعان 20 قاتىسۋشى گالا-كونتسەرتكە قاتىسىپ, ونەرىن ورتاعا سالدى.
جەرگىلىكتى اتقارۋشى بيلىك وكىلدەرىنىڭ ايتۋىنشا, جاس تالانتتاردىڭ ونەرىن تانىتۋ ماقساتىندا قولعا الىنعان مۇنداي ىلكىمدى جوبالار الداعى ۋاقىتتا دا جالعاسادى. سوعان قاراعاندا ونەرگە اڭسارى اۋعان شىعارماشىل جاستاردىڭ كاسىبي تۇرعىدان دامۋىنا ءالى دە مۇمكىندىك بولاتىن سەكىلدى.
تاراز