قاراعاندى وبلىسىندا قۇقىق بۇزۋشىلىقتىڭ الدىن الۋ ماقساتىندا مەكتەپ جانە كوللەدج وقۋشىلارىنا ارناپ ەرەكشە ەكسكۋرسيا ۇيىمداستىرىلدى. جاسوسپىرىمدەر اباي اۋدانىنا قاراستى قاراباس اۋىلىنداعى تۇزەۋ مەكەمەسىنە بارىپ, ناقتى ءومىر كورىنىستەرىمەن تانىستى, دەپ جازادى Egemen.kz.
جاسوسپىرىمدەر اراسىنداعى قۇقىق بۇزۋشىلىقتىڭ الدىن الۋ باعىتىنداعى جۇمىستار جالعاسىپ جاتىر. Polisia.kz مالىمەتىنشە, قاراعاندى وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى, وبلىستىق پروكۋراتۋرا مەن ءبىلىم باسقارماسى بىرلەسىپ, وقۋشىلار ءۇشىن تۇزەۋ مەكەمەسىنە ەكسكۋرسيا ۇيىمداستىردى. ءىس-شارا قاراباس اۋىلىنداعى قىلمىستىق-اتقارۋ جۇيەسىنە قاراستى ارنايى مەكەمەدە ءوتتى.
تۇزەۋ مەكەمەسى كامەلەتكە تولماعان كەزىندە سوتتالعان ازاماتتارعا ارنالعان. ەكسكۋرسيا كەزىندە وقۋشىلار ناقتى سوتتالعان ادامداردىڭ ءومىر تاريحىن تىڭداپ, مەكەمەنىڭ ىشكى تارتىبىمەن تانىستى. اتموسفەرا مەن شىنايى مىسالدار جاستارعا ەركىندىكتىڭ قادىرى مەن زاڭدى ساقتاۋ قاجەتتىگىن سەزىندىرۋدى ماقسات تۇتتى.
پاترۋلدىك پوليتسيا باتالونىنىڭ قىزمەتكەرلەرى وقۋشىلارعا ارنايى قاۋىپسىزدىك شارالارىمەن قاتار, زاڭ بۇزۋشىلىقتىڭ سالدارى تۋرالى تۇسىندىرمە جۇمىستارىن جۇرگىزدى. ۇيىمداستىرۋشىلاردىڭ ايتۋىنشا, مۇنداي اسەرلى كەزدەسۋلەر جاسوسپىرىمدەردىڭ قۇقىقتىق ساناسىن ارتتىرىپ, ءوز بولاشاعىنا جاۋاپكەرشىلىكپەن قاراۋعا ىنتالاندىرادى.
«ماقساتىمىز — قورقىتۋ ەمەس. ءبىز ولاردىڭ ويلانىپ, دۇرىس تاڭداۋ جاساۋىنا جاعداي جاساعىمىز كەلەدى», دەيدى جوبا ۇيىمداستىرۋشىلارى.
ەكسكۋرسيا — وڭىردە قولعا الىنعان قۇقىقتىق تاربيە باعىتىنداعى جۇمىستاردىڭ ءبىرى. جوبانى ۇيىمداستىرۋشىلار بۇل تاجىريبە جاسوسپىرىمدەرگە وڭ اسەر ەتەدى دەپ سەنەدى.