باتىس قازاقستان وبلىسىنىڭ كومپانيالارى قىتايدا ءوز كەڭسەسىن تەگىن اشادى. بۇل ەكى ەل كاسىپكەرلەرى اراسىنداعى ىسكەرلىك قارىم-قاتىناستى جاڭا دەڭگەيگە كوتەرەدى.
بۇل جاڭالىقتى وبلىس اكىمىنىڭ ءباسپاسوز قىزمەتى حابارلادى. جاقىندا قىتاي حالىق رەسپۋبليكاسىنا جۇمىس ساپارىمەن بارىپ قايتقان ءوڭىر باسشىسى ناريمان تورەعاليەۆ تسزيانسۋ پروۆينتسياسىنىڭ ءىرى وندىرىستىك جانە ساۋدا كونگلومەراتتارىنىڭ ءبىرى — «Jiangsu SOHO Holding Group» مەملەكەتتىك كورپوراتسياسىنىڭ باسشىلىعىمەن كەزدەسۋ وتكىزگەن. ءىس-شارا مەملەكەت باسشىسى قاسىم-جومارت توقاەۆ ەرەكشە نازار اۋداراتىن قازاقستان مەن قىتاي اراسىنداعى وڭىرارالىق بايلانىستى نىعايتۋ اياسىندا وتكەن. پرەزيدەنت ەكى ەل اراسىنداعى ستراتەگيالىق سەرىكتەستىكتى تەرەڭدەتۋدىڭ ماڭىزدى قۇرالى رەتىندە وڭىرلەردىڭ تىكەلەي ىنتىماقتاستىعىن دامىتۋ قاجەتتىگىن ۇنەمى ايتىپ جۇرگەنى ءمالىم.
«Jiangsu SOHO Holding Group» كومپانياسى 380-نەن استام كاسىپورىندى بىرىكتىرىپ, حالىقارالىق ساۋدا, لوگيستيكا, توقىما ونەركاسىبى, «اقىلدى» ءوندىرىس جانە قارجىلاندىرۋ سالاسىندا اۋقىمدى جوبالاردى جۇزەگە اسىرادى. كومپانيانىڭ سىرتقى ەكونوميكالىق وپەراتسيالارىنىڭ جىلدىق كولەمى 11 ميلليارد دوللاردان اسادى, گەوگرافياسى 160-تان استام ەلدى قامتيدى.
كەزدەسۋ بارىسىندا تاراپتار ەكىجاقتى ىنتىماقتاستىق مۇمكىندىگىن تالقىلاپ, بقو ونىمدەرىن SOHO ساۋدا الاڭدارىنا جەتكىزۋ, «قىتاي – ورتالىق ازيا – ەۋروپا» باعىتى بويىنشا لوگيستيكالىق توراپتاردى قازاقستاندا ورنالاستىرۋ جانە قىتايدىڭ اۋىل شارۋاشىلىعى ونىمدەرىن قايتا وڭدەۋگە جانە ساقتاۋ, وتكىزۋ ينفراقۇرىلىمىن دامىتۋعا قاتىسۋ جونىندە ماسەلەلەردى تالقىلاعان. سونداي-اق SOHO-نىڭ ازيا, ەۋروپا جانە تاياۋ شىعىس ەلدەرىندەگى كوتەرمە جانە بولشەك ساۋدا ارنالارى جەلىسى ارقىلى باتىس قازاقستان وبلىسى ونىمدەرىنىڭ ەكسپورتىن ىلگەرىلەتۋ باستاماسى ەرەكشە قىزىعۋشىلىق تۋدىردى. كومپانيا باسشىلىعى وبلىستىڭ بيزنەس وكىلدەرىنە تەگىن كەڭسە بولمەسىن بەرۋگە دايىن ەكەنىن ءبىلدىردى. كەلىسسوز قورىتىندىسىندا ينۆەستيتسيالىق ۇسىنىستاردى دايىنداۋ ءۇشىن ەكى تاراپ ءار سالا بويىنشا قوسىمشا كەڭەس وتكىزۋگە ۋاعدالاستى.
«Jiangsu SOHO Holding Group» سياقتى جوعارى تەحنولوگيالىق جانە حالىقارالىق نارىققا باعىتتالعان سەرىكتەستەرمەن ىنتىماقتاستىقتى ودان ءارى تەرەڭدەتۋ ەلىمىزدىڭ قىتاي مەن ەۋرازيا ەلدەرى اراسىنداعى سەنىمدى ەكونوميكالىق كوپىر رەتىندەگى ۇستانىمىن نىعايتۋعا سەپتىگىن تيگىزەدى», دەيدى ن.تورەعاليەۆ.
باتىس قازاقستان وبلىسى