الماتى اكىمى دارحان ساتىبالدى مەملەكەت باسشىسىنىڭ تاپسىرماسى اياسىندا جۇزەگە اسىپ جاتقان ءىرى عىلىمي-ءبىلىم بەرۋ جوبالارىنىڭ ءبىرى — الماتىداعى بالالار عىلىمي مۋزەيىنىڭ قۇرىلىسى بارىسىمەن تانىستى, دەپ جازادى Egemen.kz.
جوبا سينگاپۋر عىلىم ورتالىعى جانە مۋزەيلىك شەشىمدەر ازىرلەۋ سالاسىندا تاجىريبەسى مول Kingsmen Exhibit PTE LTD كومپانياسىمەن بىرلەسىپ ىسكە اسادى.
سينگاپۋر ۇلتتىق عىلىم اكادەمياسىنىڭ پرەزيدەنتى, سينگاپۋر عىلىم ورتالىعىنىڭ باس ديرەكتورى, دوكتور تيت مەنگ ليممەن وتكەن جۇمىس كەزدەسۋى بارىسىندا مۋزەيدى باسقارۋ مودەلىن بەيىمدەۋ جانە وسى سالادا بىلىكتى ماماندار دايارلاۋ جايى قوزعالدى. دوكتور ليم جوبا كومانداسىن وقىتۋ مەن وزىق ادىستەمەلەردى ەنگىزۋ تۇرعىسىنان جان-جاقتى قولداۋ كورسەتۋگە ءازىر ەكەنىن ءبىلدىردى.
جوبادا ينكليۋزيۆتىلىك ماسەلەسىنە ايرىقشا ءمان بەرىلگەن. ەرەكشە ءبىلىم بەرۋ قاجەتتىلىگى بار بالالارعا جايلى جاعداي جاسالادى. اتاپ ايتقاندا, اۋتيزممەن اۋىراتىن بالالار ءۇشىن ارنايى بولمە جابدىقتالادى.
«بۇل جاي مۋزەي عانا ەمەس, بالالاردىڭ عىلىممەن ەركىن تىلدەسە الاتىن, تانىمدىق قىزىعۋشىلىعىن وياتىپ, زەرتتەۋشىلىك قابىلەتىن ارتتىراتىن كەڭىستىك بولماق. مۋزەي ۇلتتىڭ زياتكەرلىك بولاشاعىن قالىپتاستىرۋ جولىنداعى ماڭىزدى قادام» دەپ اتاپ وتكەن دارحان ساتىبالدى قۇرىلىستىڭ ساپالى ءارى مەرزىمىندە ورىندالۋىن تاپسىرىپ, بالالار عىلىمي مۋزەيىن قالانىڭ مەكتەپكە دەيىنگى جانە باستاۋىش ءبىلىم بەرۋ جۇيەسىمەن ۇيلەسستىرۋدىڭ ماڭىزدى ەكەنىنە توقتالدى. مۋزەي كەلەر جىلى پايدالانۋعا بەرىلمەك.
ەلىمىزدەگى العاشقى ينتەراكتيۆتى كەڭىستىك بالالاردىڭ عىلىم, تەحنولوگيا, ينجەنەريا جانە ماتەماتيكا سالالارىنا (STEM) دەگەن قىزىعۋشىلىعىن ەرتە جاستان دامىتۋعا باعىتتالعان.
قازىر تەحنيكالىق ساراپتامانىڭ قورىتىندىسىنا ساي قۇرىلىمداردى كۇشەيتۋ جۇمىستارى باستالدى. قۇرىلىس بارىسىن الماتى قالاسى اكىمدىگىنىڭ سالالىق باسقارمالارى مەن ءبىلىم بەرۋ, سونداي-اق ESG-ينتەگراتسيا سالالارىنداعى حالىقارالىق ساراپشىلار بىرلەسە قاداعالاپ وتىر.
الماتى