الماتى باسشىسى مەكتەپتەر قۇرىلىسىن جاڭا وقۋ جىلىنا دەيىن اياقتاۋدى مىندەتتەدى

اۋداندا جاڭادان سالىنىپ جاتقان مەكتەپتەر, تۇرعىن ءۇيدى جاڭعىرتۋ باعدارلاماسى جانە قاراسۋ وزەنىنىڭ جاعالاۋىن اباتتاندىرۋ بارىسىمەن تانىستى. وسى ورايدا قالا باسشىسى قۇرىلىس كومپانيالارىنا جول جوندەۋ جۇمىستارىن جاڭا وقۋ جىلى باستالعانعا دەيىن اياقتاۋدى تاپسىردى.

كەمەل شاعىناۋدانىنداعى كوشكىن قاۋپى بار اۋماقتى جوندەۋ جۇمىستارى قولعا الىنباقشى. قازىر ۇزىندىعى 580 مەتر بولاتىن تىرەۋ قابىرعالارىن سالۋ جوباسى ازىرلەنۋدە. جۇمىس توبىس سونداي-اق, كەمەل شاعىناۋدانىنداعى قاراسۋ وزەنىنىڭ جاعالاۋىن كۇردەلى جوندەۋ جوباسىمەن تانىستى. جوباعا بالالار جانە سپورت الاڭدارىن, امفيتەاتر, سكەيت-پارك, بەسەدكالار, ورىندىقتار, قوقىس جاشىكتەرى, ارت-نىساندار, جارىق تىرەكتەرى, اۆتوماتتى سۋارۋ جۇيەسى, گابيونمەن جاعالاۋدى نىعايتۋ, بەينەباقىلاۋ ورناتۋ جانە كوگالداندىرۋ كىرەدى. جۇمىستار وسى ايدا باستالىپ, كەلەسى جىلدىڭ ءساۋىر ايىندا اياقتالادى دەپ جوسپارلانۋدا.

بيىل اۋداندا 26 شاقىرىم جول ورتاشا جوندەۋدەن وتەدى, ونىڭ 15 شاقىرىمى كەمەل شاعىناۋدانىندا ورنالاسقان.

«بۇرىن دا ايتقانمىن – بارلىق جول جوندەۋ جۇمىستارىن جاڭا وقۋ جىلى باستالعانعا دەيىن اياقتاۋ قاجەت. اۋدان اكىمى تىكەلەي باقىلاۋعا الۋى كەرەك», – دەپ اتاپ ءوتتى دارحان ساتىبالدى.

بۇگىندە جەتىسۋ اۋدانىندا 21 مەملەكەتتىك مەكتەپ جۇمىس ىستەيدى. الايدا حالىق سانىنىڭ ءوسۋى مەن بەلسەندى قۇرىلىسقا بايلانىستى 4 مىڭنان استام وقۋشى ورنى جەتىسپەيدى. «كەلەشەك مەكتەپتەرى» ۇلتتىق جوباسى اياسىندا اكىمدىك جوبالىق ءوفيسىنىڭ قولداۋىمەن بۋرۋنداي كوشەسىندە 1 200 ورىندىق جاڭا مەكتەپتىڭ قۇرىلىسى باستالدى. سول اۋماقتا مەكتەپ سالىپ جاتقان مەردىگەر كومپانيا 4 مىڭ پاتەرلىك تۇرعىن ءۇي كەشەنىن دە سالىپ جاتىر, ونىڭ 2,3 مىڭىن جۇمىسشى جاستار مەن حالىقتىڭ الەۋمەتتىك وسال توپتارىن باسپانامەن قامتۋعا ارنالعان الەۋمەتتىك باعدارلامالار اياسىندا اكىمدىك ساتىپ الماق. وسىنى ەسكەرىپ, قالا باسشىسى ءبىلىم بەرۋ نىسانىنىڭ قۇرىلىسىن بارىنشا جەدەلدەتۋدى تالاپ ەتتى.

«ەگەر مەكتەپتى ۋاقىتىندا تاپسىرماساڭىزدار – ءبىز الەۋمەتتىك باعدارلامالار ءۇشىن پاتەر ساتىپ المايمىز. ەشقانداي ءسوز بولمايدى, تاپسىرماساڭىزدار – ساتىپ المايمىز», – دەدى دارحان ساتىبالدى.

سونداي-اق, قالا اكىمى اينابۇلاق (اربات) شاعىناۋدانىنداعى جانە ماقاتاەۆ كوشەسىندەگى جاياۋ جۇرگىنشى جولدارىن اباتتاندىرۋ جانە اعىمداعى جوندەۋ جۇمىستارىمەن تانىستى. جوبا اياسىندا كوگالداندىرۋ, جارىقتاندىرۋ, جاياۋ جۇرگىنشى جولدارىن توسەۋ جانە شاعىن ساۋلەت نىساندارىن ورناتۋ قاراستىرىلعان.

اينابۇلاق-1 شاعىناۋدانىندا قالا باسشىسى «حالىق قاتىساتىن بيۋدجەت» باعدارلاماسى اياسىندا اۋلالاردى اباتتاندىرۋ جۇمىستارىن تەكسەردى. بۇل باعىتتا اسفالت توسەلىپ, رەزەڭكە جابىن ورناتىلعان, سپورت الاڭى جاڭارتىلعان, جارىقتاندىرۋ, بەينەكامەرالار مەن شاعىن ساۋلەت فورمالارى قويىلىپ, كوگالداندىرۋ جۇرگىزىلگەن.

سونىمەن قاتار, دارحان ساتىبالدى 1981 جىلدان بەرى پايدالانىلىپ كەلە جاتقان جىلۋ جەلىلەرىنىڭ قايتا جاڭعىرتۋ جۇمىستارىمەن دە تانىستى. قالا اكىمى بۇل جۇمىستاردى بيىل تامىزىنا دەيىن اياقتاۋدى تاپسىردى.

قازىرگى كەزدە اۋداندا تۇرعىن ءۇيدى جاڭعىرتۋ باعدارلاماسى ىسكە اسىپ جاتىر. كرىلوۆ–سكريابين–گونچاروۆ–رايىمبەك داڭعىلى كوشەلەرى ارالىعىنداعى اۋماقتا 16 ءۇي ءسۇرىلىپ, تۇرعىندار كوشىرىلگەن, 9 ءۇي سالىنىپ, تاعى 2 ءۇيدىڭ قۇرىلىسى ءجۇرىپ جاتىر. بوتكين–قازاكوۆ–گونچاروۆ–سكريابين–رايىمبەك داڭعىلى اۋماعىندا 6 ءۇي ءسۇرىلىپ, 3 ءۇي سالىنعان جانە تاپسىرىلعان, 8 ءۇيدىڭ قۇرىلىسى ءجۇرىپ جاتىر, ولاردىڭ قۇرىلىسى 2027 جىلعا دەيىن اياقتالادى دەپ جوسپارلانعان. سونىمەن قاتار, جاڭعىرتۋ باعدارلاماسىنان تىس جەكە ينۆەستيتسيالار اياسىندا 10 ەسكى ءۇي مەن 11 جەكە تۇرعىن ءۇيدى ءسۇرۋ جوسپارلانعان. الايدا اكىم 100 مىڭ شارشى مەتر ءۇي سالىنعانىمەن, بىردە-ءبىر مەكتەپ, بىردە-ءبىر بالاباقشا, بىردە-ءبىر ەمحانا جوق ەكەنىن ەسكەرتىپ, الداعى ۋاقىتتا قايتا قاراستىرۋدى تاپسىردى.

الماتى