مادەنيەت جانە اقپارات ءمينيسترى ايدا بالاەۆا نەاپول قالاسىندا وتكەن يۋنەسكو-نىڭ ء«ححى عاسىرداعى مادەني مۇرا» اتتى ەكىنشى كونفەرەنتسياسىنا قاتىستى. بۇل تۋرالى مينيسترلىكتىڭ ءباسپاسوز قىزمەتى حابارلادى.
كونفەرەنتسياعا قاتىسۋشىلار مادەني مۇرا نىساندارىن دامىتۋ, ساقتاۋ جانە قورعاۋ, داستۇرلەردى قولداۋ, سونداي-اق ءبىلىم بەرۋ مەن جاستار باعدارلامالارىن جۇزەگە اسىرۋ ماسەلەلەرىن تالقىلادى.
ءمينيستردىڭ ايتۋىنشا, بۇل مىندەتتەردى ىسكە اسىرۋ – مينيسترلىكتىڭ باسىم باعىتتارىنىڭ ءبىرى. سونىمەن قاتار پرەزيدەنت قاسىم-جومارت توقاەۆ ۇلتتىق قۇرىلتاي الاڭىندا بىرنەشە رەت مادەني مۇرانى ساقتاۋ مەن ناسيحاتتاۋدىڭ ماڭىزىنا نازار اۋدارعان ەدى. بۇل باعىتتاعى جۇمىستار ەل ۇكىمەتى بەكىتكەن كەشەندى جوسپار اياسىندا جۇزەگە اسىرىلادى.
كونفەرەنتسيا بارىسىندا ايدا بالاەۆا مادەني مۇرا نىساندارىنا كليماتتىڭ اسەرى تۋرالى ماسەلەنى دە كوتەردى. مىسال رەتىندە ول سۋ تاسقىنى, داۋىل, ءورت جانە توپىراق ەروزياسى سياقتى تابيعي قۇبىلىستار ەسكەرتكىشتەردىڭ جەدەل بۇزىلۋىنا اسەر ەتەتىنىن اتاپ ءوتتى.
«بارلىعىمىز كۇش-جىگەردى بىرىكتىرىپ, ءتۇرلى ەلدەر ەكولوگتەرىنىڭ بولاشاقتاعى ەكولوگيالىق جاعداي تۋرالى بولجامدارىن تالقىلاپ, مۇرامىزدى ساقتاۋ جونىندە ناقتى ۇسىنىستار ازىرلەۋگە باعىتتالعان ارنايى حالىقارالىق سەمينار وتكىزۋدى ۇسىنامىن», دەدى ا.بالاەۆا.
ساپار اياسىندا ايدا بالاەۆا يتاليانىڭ مادەنيەت ءمينيسترى الەسساندرو دجۋليمەن كەزدەسۋ وتكىزدى. تاراپتار مادەني-گۋمانيتارلىق سالاداعى ەكىجاقتى ىنتىماقتاستىقتىڭ قازىرگى جاي-كۇيى مەن كەلەشەگىن تالقىلاپ, ەكى ەل اراسىنداعى ارىپتەستىكتى كەڭەيتۋگە باعىتتالعان ناقتى قادامداردى بەكىتتى.
ءمينيستردىڭ ايتۋىنشا, قازاقستان مەن يتاليانى دوستىق جانە ءوزارا سەنىمگە نەگىزدەلگەن قارىم-قاتىناس بايلانىستىرادى. جوعارى دەڭگەيدە جاسالعان ءوزارا كەلىسىمدەر مەن ورتاق جوسپارلار دا سونىڭ دالەلى. اتاپ ايتساق, پرەزيدەنت قاسىم-جومارت توقاەۆتىڭ يتالياعا جاساعان ساپارى اياسىندا مادەنيەت پەن ونەر سالاسىنداعى ءوزارا تۇسىنىستىك تۋرالى مەموراندۋمعا قول قويىلدى. يتاليا مينيسترلەر كەڭەسىنىڭ توراعاسى دجوردجا مەلونيدىڭ جۋىرداعى ساپارى ىنتىماقتاستىقتى نىعايتۋعا جاڭا سەرپىن بەردى.
سوعان سايكەس, ەكى ەلدەگى ارتىستەردىڭ گاسترولدەرى, بىرلەسكەن كورمەلەر وتكىزۋ, قازاقستان مەن يتاليانىڭ ۇلتتىق مۋزەيلەرى مەن تەاتر ۇيىمدارى اراسىنداعى ىنتىماقتاستىقتى تەرەڭدەتۋ, سونداي-اق مۋزىكا مەن كينەماتوگرافيا سالاسىنداعى ءوزارا بايلانىس جوسپارلانعان.
سونىمەن قاتار تاراپتار رەستاۆراتسيا سالاسىنداعى ارىپتەستىكتى كەڭەيتۋ جانە قازاقستاندا رەستاۆراتسيا ورتالىعىن اشۋ بويىنشا بىرلەسكەن جۇمىستاردى تالقىلادى. ايدا بالاەۆانىڭ ايتۋىنشا, يتاليانىڭ بۇل سالادا جەتىستىگى مول, بۇل ءبىلىم مەن تاجىريبە الماسۋ ءۇشىن كوپ مۇمكىندىك بەرەدى.
كەزدەسۋ سوڭىندا مادەنيەت جانە اقپارات ءمينيسترى مادەنيەت سالاسىنداعى ءتيىمدى ىنتىماقتاستىقتى جالعاستىرۋعا قىزىعۋشىلىق ءبىلدىرىپ, يتاليالىق ارىپتەسىن قازاقستانعا شاقىردى.