ەلىمىزدە كاسىبي جانە بۇقارالىق سپورت – ەلەۋلى باسىمدىقتىڭ ءبىرى. بۇل تۋرالى مەملەكەت باسشىسى: «ۇلت دەنساۋلىعىن بەكەمدەۋ ماسەلەسى دە وتە وزەكتى. بارلىق جاس ساناتى اراسىندا بۇقارالىق سپورت تۇرلەرىن ناسيحاتتاي بەرۋ كەرەك. بالالار ءۇشىن سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ كەرەك. بۇقارالىق سپورتتى دامىتۋ پيراميداعا اينالۋى قاجەت. ونىڭ باسىنا چەمپيوندار شىقسا, ونىڭ نەگىزىندە ساۋ ءارى سانالى ۇرپاقتى, مىقتى ۇلتتى قالىپتاستىرامىز», دەگەن ەدى. وسى باعىتتا پرەزيدەنت تاپسىرماسىمەن «دەنە شىنىقتىرۋ مەن بۇقارالىق سپورتتى دامىتۋ جونىندەگى 2020–2025 جىلدارعا ارنالعان كەشەندى جوسپار» ازىرلەنىپ, ۇكىمەت قاۋلىسىمەن بەكىتىلدى. بۇل جوسپار وڭىرلەردە كەزەڭ-كەزەڭمەن جۇزەگە اسىپ جاتىر.
ماڭعىستاۋ وبلىسى جاڭاوزەن قالاسى دا سپورت سالاسىنا ايرىقشا كوڭىل ءبولىپ, اۋىلدا, قالادا بالالار وينايتىن الاڭشالار, ۆوركاۋتتار, جاڭا سپورتتىق كەشەندەر اشىپ, جۇرتشىلىقتى قۋانتىپ كەلەدى. جالپى, جاڭاوزەندىكتەردىڭ سپورتقا دەگەن بەتبۇرىسى ەلەۋلى. بۇرىندارى سپورتپەن نەگىزىندە جاستار شۇعىلداناتىن بولسا, كەيىنگى كەزدەرى ستاديوندا, سپورت الاڭدارىندا ۇلكەن كىسىلەر تاڭنان جاتتىعۋ جاساپ جۇرگەنىن ءجيى كورەتىن بولدىق. بۇل – ەل سالاماتتىلىعىنداعى ساباقتاستىقتىڭ جاقسى نىشانى.
تاياۋدا ءامين تۇياقوۆ اتىنداعى ورتالىق ستاديوندا رەسپۋبليكالىق سپورت فەستيۆالى ءوتتى. جاڭاوزەندە وتكەن تۇڭعىش فەستيۆال دزيۋدو, گرەك-ريم, ەركىن كۇرەس ويىندارىن قامتىدى.
فەستيۆالعا 12 وڭىردەن 600-دەن استام سپورتشى قاتىسىپ, اتالعان سپورت تۇرلەرىنەن باق سىنادى. جارىس ەل بىرلىگى مەن وتانشىلدىق دەڭگەيدى كورسەتتى. سونىمەن قاتار 16–17 مامىردا قازاقستاننىڭ ەڭبەك سىڭىرگەن جاتتىقتىرۋشىسى, مۇنايشى جەڭىس جارىلعاپ ۇلىن ەسكە الۋعا ارنالعان ەرەسەكتەر اراسىنداعى ءىىى رەسپۋبليكالىق اشىق ءتۋرنيردىڭ فينالى ءوتتى. شاراعا استانا, الماتى, اتىراۋ, اقتوبە وڭىرلەرىنەن جانە كورشىلەس رەسەي فەدەراتسياسى باشقۇرتستان, وزبەكستان, ازەربايجان ەلدەرىنەن بوكسشىلار قاتىستى. ءبىر ءماندى وقيعا: فينالدان سوڭ, كورەرمەندەر ءۇشىن كاسىبي بوكستان ارنايى كەزدەسۋ ۇيىمداستىرىلدى. رينگكە جەرلەسىمىز, جاڭاوزەندىك سپورتشى ءۋاليحان بيسەنقۇلوۆ پەن كامەرۋندىق كاسىپقوي بوكسشى كريستيان ۆۋاپي شىقتى. اسا تارتىستى جەكپە-جەكتە ايقىن باسىمدىقپەن ءۋاليحان بيسەنقۇلوۆ جەڭدى.
ەل تاريحىنا ەنەتىن سپورتتىق ءىس-شارالاردىڭ جاڭاوزەن قالاسىندا ۇيىمداستىرىلۋى ءوڭىر جاستارىن ىنتالاندىرىپ, جۇرتشىلىقتى سەرپىلتىپ تاستادى. ارينە, ءبىرىنشى كەزەكتە بۇعان سەبەپشى – جاڭاوزەن قالاسى اكىمدىگىنىڭ سپورتقا دەگەن مەملەكەتشىل جاۋاپتى كوزقاراسى. «جاس كەلسە – ىسكە» دەمەكشى, «جاڭاوزەن – سپورتشىلار قالاسى» دەگەن ۇراندى سوزبەن ەمەس, ناقتى ىسپەن دالەلدەپ جۇرگەن جانسەيىت قاينارباەۆتىڭ ەڭبەگىن ەرەكشە اتاپ وتكىمىز كەلەدى. الداعى ۋاقىتتا سۇيىكتى قالامىز جاڭاوزەندە مىقتى باپكەرلەردەن ءدارىس العان وليمپيادانىڭ كۇمىس جۇلدەگەرى ادىلبەك نيازىمبەتوۆ, ەۋروپا چەمپيونى بەكزات نۇرداۋلەتوۆ سەكىلدى تالاي الەم تانيتىن جەڭىمپازدار شىعاتىنىنا سەنىمدىمىز.
اسقار نوعاەۆ,
جاڭاوزەن قالالىق ءماسليحاتىنىڭ دەپۋتاتى