مەملەكەت باسشىسى قاسىم-جومارت توقاەۆ ەلىمىزگە شەتەلدىك ينۆەستورلاردى تارتۋدىڭ ماڭىزى زور ەكەنىن اتقارۋشى بيلىك وكىلدەرىنە الدەنەشە رەت شەگەلەپ تاپسىرعانى ءمالىم. سودان دا بولسا كەرەك, كەيىنگى جىلدارى وڭىردە شەتەلدىك الپاۋىت كومپانيالارمەن كەلىسسوز جۇرگىزىلىپ, جۇمىس جۇيەلەنە ءتۇستى.
توعىز جولدىڭ تورابىندا ورنالاسقان شۋ قالاسىندا لوكوموتيۆ جوندەۋمەن اينالىساتىن العاشقى تەحنيكالىق قىزمەت كورسەتۋ دەپوسى اشىلدى. دەپو جىلىنا 1 500-دەن استام لوكوموتيۆ جوندەۋگە قاۋقارلى. كولىك سالاسىنداعى جاھاندىق كوشباسشى كومپانيالار ساناتىنا ەنگەن «Alstom» ۇجىمى جاڭا دەپونى سالۋ ءۇشىن 3,5 ملرد شاماسىندا ينۆەستيتسيا قۇيعان. وسىلايشا, فرانتسيالىق كومپانيا اراعا 37 جىل سالىپ ەلىمىزدە تەحنيكالىق قىزمەت كورسەتۋ كاسىپورنىن اشىپ, جۇمىستى جانداندىرۋعا بەل بۋىپ وتىر.
دەرەككە سۇيەنسەك, كومپانيا وكىلدەرى زاماناۋي ۇلگىدە بوي كوتەرگەن تسيفرلىق دەپو قۇرىلىسىن ەكى جىل بەدەرىندە اياقتاعان.
«جاڭا نىساننىڭ اشىلۋى قازاقستان مەن فرانتسيا اراسىنداعى ىسكەرلىك بايلانىستىڭ وركەندەگەنىن كورسەتەدى. ءبىزدىڭ كومپانيا «قازاقستان تەمىر جولى» كومپانياسىمەن 15 جىل بويى ۇزدىكسىز جۇمىس ىستەپ كەلەدى. جاڭادان اشىلعان تەحنيكالىق قىزمەت كورسەتۋ دەپوسى – ەكى ەل اراسىنداعى بەرىك بايلانىستىڭ جەمىسى. وسى ورايدا قازاقستان بيلىگى تاراپىنان ينۆەستورلارعا بارىنشا جاقسى جاعداي قاراستىرىلعانىن ايتا كەتكەن ءلازىم. قازىر قازاقستاندا جالپى قۇنى 25 ملرد تەڭگەنى قۇرايتىن 4 جوبانى ىسكە اسىرۋ بويىنشا جۇمىس ىستەپ جاتىرمىز», دەيدى «Alstom» كومپانياسىنىڭ باتىس جانە ورتالىق ازيا بويىنشا باسقارۋشى ديرەكتورى جەروم بويە.
ءوڭىر باسشىسى ەربول قاراشوكەەۆتىڭ ايتۋىنشا, وڭىرگە تىكەلەي شەتەلدىك ينۆەستيتسيا تارتۋ جۇمىسى جالعاسا بەرەدى. اسىرەسە جاڭا ءوندىرىس ورىندارىن اشۋ ءۇشىن بىرنەشە جوبانى جۇزەگە اسىرۋدىڭ تەتىكتەرى قاراستىرىلعان.
«مەملەكەت باسشىسىنىڭ تاپسىرماسىنا سايكەس, وڭىردە اۋقىمدى ينۆەستيتسيالىق جوبالار جۇزەگە اسىرىلىپ جاتىر. كەيىنگى جىلدارى بىرنەشە جاڭا ءوندىرىس وشاعى ىسكە قوسىلىپ, جەرگىلىكتى حالىقتى جۇمىسپەن قامتۋ شارالارىنا باسىمدىق بەرىلدى. الداعى ءۇش جىلدا جالپى قۇنى 3,7 ترلن تەڭگەنى قۇرايتىن 62 ينۆەستيتسيالىق جوبانى جۇزەگە اسىرۋعا نيەتتىمىز. وسى جىلدىڭ وزىندە 175,2 ملرد تەڭگەگە باعالانعان 30 جوبا ىسكە قوسىلىپ, مىڭنان استام جاڭا جۇمىس ورنى قۇرىلدى. «جىبەك جولى» ارنايى ەكونوميكالىق ايماعى ءىرى ينۆەستيتسيالىق جوبالار الاڭىنا اينالدى. بۇگىن ىسكە قوسىلعان «Alstom kazakhstan» كومپانياسىنىڭ تەحنيكالىق قىزمەت كورسەتۋ دەپوسى شۋ اۋدانىنىڭ ستراتەگيالىق ماڭىزىن ارتتىرىپ, ەلىمىزدىڭ تەمىرجول ينفراقۇرىلىمىن دامىتۋعا, ترانزيتتىك الەۋەتىن نىعايتۋعا زور ۇلەس قوساتىنىنا كۇمان جوق», دەيدى ە.قاراشوكەەۆ.
مامانداردىڭ ايتۋىنشا, شۋ قالاسىندا ورنالاسقان جاڭا دەپو KZ4 جانە KZ8 ەلەكتروۆوزدارىنا قىزمەت كورسەتۋگە ارنالعان. مۇندا ايىنا جۇزدەن استام لوكوموتيۆتى جوندەۋگە مۇمكىندىك بار.
ء«ار لوكوموتيۆتى جوندەۋ ءۇشىن دەپو قىزمەتكەرلەرى شامامەن 12 ساعات ۋاقىت جۇمسايدى. الداعى بىرنەشە جىلدا مۇنداي سەرۆيستىك دەپولار الماتى, استانا قالالارىندا جانە ارىستا اشىلادى. بۇل ءوز كەزەگىندە سالا جۇمىسىن ىلگەرىلەتۋگە ىقپال ەتەدى. سونداي-اق جاڭا جۇمىس ورىندارىن قۇرۋعا دا مۇمكىندىك بەرەدى», دەيدى كومپانيانىڭ قىزمەت كورسەتۋ بويىنشا ديرەكتورى ولجاس احمەتوۆ.
جاڭا كاسىپورىن جۇمىسى حالىقارالىق ستاندارتقا نەگىزدەلگەن. مۇندا ونەركاسىپتىك جانە ەكولوگيالىق قاۋىپسىزدىك تالاپتارى قاتاڭ ساقتالادى.
جامبىل وبلىسى,
شۋ قالاسى