پرەمەر-مينيستر ولجاس بەكتەنوۆ استانا حالىقارالىق فورۋمىنا قاتىسۋ ءۇشىن كەلگەن بۇۇ باس حاتشىسىنىڭ ورىنباسارى, بۇۇ دامۋ باعدارلاماسى اكىمشىسىنىڭ ورىنباسارى حاوليان شۋمەن كەزدەستى. وندا ورتالىق ازيا ايماعىنداعى ەكولوگيا جانە كليماتتىڭ وزگەرۋىنە توزىمدىلىكتى ارتتىرۋ سالاسىنداعى ىنتىماقتاستىق جانە بىرلەسكەن جوبالاردى جۇزەگە اسىرۋ ماسەلەلەرى تالقىلاندى.
پرەمەر-مينيستر بۇۇ-نىڭ ورنىقتى دامۋ ماقساتتارىنا قول جەتكىزۋ قازاقستاننىڭ باستى باسىمدىقتارىنىڭ ءبىرى ەكەنىن اتاپ ءوتتى. ونى ىسكە اسىرۋ جونىندەگى مىندەتتەر بىرقاتار ستراتەگيالىق قۇجاتتارعا كىرىكتىرىلگەن. جالپى, بۇۇ-مەن ارىپتەستىك ورناتقان جىلدار ىشىندە ەلىمىزدە ءتۇرلى سالادا 200 جوبا جۇزەگە اسىرىلعان. سونىڭ ىشىندە قازىر قازاقستاندا 35 جوبا بويىنشا جۇمىس جۇرگىزىلىپ جاتىر, ولار – دەنساۋلىق ساقتاۋ سالاسىن تسيفرلىق ترانسفورماتسيالاۋدىڭ كەشەندى تاسىلدەرى, الەۋمەتتىك قورعاۋ باعدارلامالارىنىڭ تيىمدىلىگى مەن قولجەتىمدىلىگىن ارتتىرۋ, ەنەرگيا تيىمدىلىگى سالاسىنا ينۆەستورلاردى تارتۋ ءۇشىن جاعداي جاساۋ, اۋىل شارۋاشىلىعى ءوندىرىسىنىڭ تۇراقتى جۇيەسىن ىلگەرىلەتۋ, ادام قۇقىقتارىن قورعاۋدىڭ ۇلتتىق تەتىكتەرىنىڭ تيىمدىلىگىن كۇشەيتۋ جانە تاعى دا باسقالار.
كەزدەسۋدە الماتىدا بۇۇ دب-نىڭ سۋبوڭىرلىك كەڭسەسىن اشۋ كەلەشەگىنە نازار اۋدارىلدى. ول ورتالىق ازيانىڭ سىرتقى سىن-قاتەرلەرگە توزىمدىلىگىن نىعايتۋ سالاسىنداعى بىرلەسكەن كۇش-جىگەردى ۇيلەستىرۋ باعىتىندا جۇمىس ىستەيدى. ورتالىق ازيا ايماعى جاھاندىق ساۋدا مەن ەنەرگەتيكادا نەگىزگى ويىنشىلاردىڭ بىرىنە اينالىپ كەلەدى. ايتسەدە, زور الەۋەتى بولا تۇرا, مۇندا كليماتتىڭ وزگەرۋىنىڭ سالدارى, سۋ تاپشىلىعى, سىرتقى ەكونوميكالىق سىلكىنىستەر سىندى تاعى دا باسقا سىن-قاتەرلەر تۋىنداپ وتىر.
«پرەزيدەنت قاسىم-جومارت توقاەۆ بىرىككەن ۇلتتار ۇيىمىمەن ارىپتەستىكتى نىعايتۋعا ۇلكەن ءمان بەرەدى. مەملەكەت باسشىسى مەن بۇۇ باس حاتشىسى انتونيۋ گۋتەرريش اراسىنداعى ءوزارا كونسترۋكتيۆتى قاتىناس بىرلەسكەن باستامالاردى ىلگەرىلەتۋگە قوسىمشا سەرپىن بەرىپ وتىر. قازاقستان كليماتتىڭ وزگەرۋى پروبلەمالارىن شەشۋدى تولىقتاي قولدايدى. ءبىز كليماتقا قاتىستى ماسەلەلەردى دامۋ جوسپارلارىمىزعا كەڭىنەن ەنگىزىپ, حالىقارالىق سەرىكتەستەرمەن تىعىز جۇمىس ىستەۋدەمىز. ءبىزدىڭ كومىرتەگى بەيتاراپتىعى تۋرالى ستراتەگيامىز تومەن كومىرتەكتى ەكونوميكاعا كوشۋ جونىندەگى ناقتى دا ۇزاقمەرزىمدى پەرسپەكتيۆالاردى قامتيدى, ءارى بارلىق سەكتور بويىنشا قاجەتتى نەگىزگى وزگەرىستەردى ايقىندايدى», دەدى و.بەكتەنوۆ.
ءوز كەزەگىندە حاوليان شۋ بۇۇ دب-نىڭ ايماقتاعى الەۋمەتتىك جانە ەكولوگيالىق باستامالارىن جۇزەگە اسىرۋ جولىنداعى قازاقستانمەن جان-جاقتى ىنتىماقتاستىقتىڭ ماڭىزدىلىعىن اتاپ ءوتتى. كەزدەسۋ قورىتىندىسىندا تاراپتار بارلىق كەلەشەكتەگى باعىت بويىنشا سەرىكتەستىكتى دامىتۋعا ىقپال ەتۋ نيەتتەرىن راستادى.