قاللەكي ساحناسىندا «شەڭبەر» اتتى جاڭا قويىلىمنىڭ سالتاناتتى پرەمەراسى ءوتتى. سپەكتاكل نەمىس دراماتۋرگى بەرتولد برەحتىڭ الەمگە ايگىلى «كاۆكازداعى بورلى شەڭبەر» پەساسىنىڭ جەلىسىمەن ساحنالانعان.
قازاق تىلىنە زۇلقارناي ساقي ۇلى كوركەم تىلمەن اۋدارعان تۋىندىنى, رەجيسسەر ۇلان قابىل جاڭا كوزقاراسپەن تۇرلەندىرىپ كوردى. شىعارماشىلىق ۇجىمنىڭ ىزدەنىسىن, وزگەشە باعىتتاعى قويىلىمىن كورەرمەن جوعارى باعالادى.
«شەڭبەر» – ادىلدىك پەن انالىق ماحاببات جايلى سىر شەرتەتىن تەرەڭ تۋىندى. جاي قويىلىم ەمەس, ول – ادامدىق قاسيەتتەردى, جۇرەك جىلۋىن جانە انانىڭ ايالى الاقانىن دارىپتەيتىن شىنايى ساحنالىق سىر», دەيدى رەجيسسەر.
«Qalleki» تەاتر لابوراتورياسىنىڭ بۇل تۋىندىسى تەاترسۇيەر قاۋىمنىڭ قىزىعۋشىلىعىن وياتىپ, ەرەكشە ىقىلاسقا بولەندى. ەپيكالىق دراما جانرىندا قويىلعان شىعارما سان ءتۇرلى سەزىمگە بولەپ, ۋاقىت پەن كەڭىستىكتىڭ شەكاراسىنان تىس ادامزاتتىق قۇندىلىقتاردى وي ەلەگىنەن وتكىزۋگە شاقىرادى. قويىلىم بارىسىندا برەحتىڭ وقشاۋلانۋ ءادىسى قولدانىلعان, بۇل اكتەرلىك ويىن مەن كورەرمەن اراسىنداعى قارىم-قاتىناستى جاڭا دەڭگەيدە ۇعىنۋعا مۇمكىندىك بەرەدى. ادامگەرشىلىك پەن ادىلەتتىلىك تۋرالى تەرەڭ ويعا جەتەلەپ, جالپى ادامزاتتىق قۇندىلىقتارعا ۇندەيدى.
«بىزگە برەحتى تۇسىندىرگەن – بولات اتاباەۆ. كەزىندە ءوزى قويعان كەزدە سپەكتاكل ۇلكەن سىنعا قالعان ەكەن. ەندى بۇگىنگى پرەمەرادا ءبىز سول برەحتكە جەتە الدىق پا, الدە جەتە المادىق پا – كورەرمەنگە ايان», دەيدى ۇلان قابىل.