قىزىلوردا قالاسىندا بالالار مەن جاسوسپىرىمدەرگە ارنالعان شىعارماشىلىق-يننوۆاتسيالىق اكادەمياسى اشىلدى.
«سىر جۇلدىزدارى» دەپ اتالاتىن ورتالىقتىڭ پايدالانۋعا بەرىلۋىنە وراي ۇيىمداستىرىلعان سالتاناتتى ءىس-شاراعا وقۋ-اعارتۋ ءمينيسترى عاني بەيسەمباەۆ, پارلامەنت ءماجىلىسىنىڭ دەپۋتاتتارى مۇرات ابەنوۆ, مۇرات ەرگەشباەۆ, مارحابات جايىمبەتوۆ جانە زيالى قاۋىم وكىلدەرى قاتىستى. وبلىس اكىمى نۇرلىبەك نالىباەۆ جۇرتشىلىقتى جاڭا نىساننىڭ اشىلۋىمەن قۇتتىقتاپ, ءبىلىم سالاسىندا اتقارىلعان جۇمىستارعا توقتالدى.
«وڭىردە ساپالى ءبىلىم, سانالى تاربيە بەرۋدە جۇيەلى جۇمىس بار. كەيىنگى ءۇش جىلدا ءبىلىم سالاسىنا بولىنگەن قارجى كولەمى 32 پايىزعا ارتىپ, 304 ملرد 600 ملن تەڭگەگە جەتتى. الدىمىزدا تۇرعان ءبىرىنشى مىندەت – بالالاردىڭ ءبىلىم الۋىنا قولايلى جاعداي جاساپ, جايلى ورتا قالىپتاستىرۋ. وسى باعىتتا ءبىلىم وشاعىنا سىيماي, ءۇش اۋىسىمدىق جۇيەمەن وقىتۋعا ءماجبۇر بولعان قالاداعى 4 مەكتەپ جانىنان 2023 جىلى 1 850 ورىندىق قوسىمشا قۇرىلىس سالىپ, ماسەلەنى تۇبەگەيلى شەشتىك. جاڭا نىسانداردىڭ اشىلۋى جاڭا داۋىردە باسەكەگە قابىلەتتى ۇلاندارىمىزعا جاڭا مۇمكىندىكتەر سىيلاۋ. ەگەمەن ەلىمىزدى وركەندەتۋدەگى, وسكەلەڭ ۇرپاقتى تاربيەلەۋدەگى ورەلى باستامالارىمىز تابىستى بولسىن», دەدى وبلىس باسشىسى.
جيىندا وقۋ-اعارتۋ ءمينيسترى عاني بەيسەمباەۆ, پارلامەنت ءماجىلىسىنىڭ دەپۋتاتى مۇرات ابەنوۆ جۇرتشىلىقتى قۇتتىقتاپ, عيماراتتى سالعان «BI Global» جشس قۇرىلىسشىلارى ماراپات تورىنەن كورىندى.
قالاداعى كەڭ كوشەنىڭ بويىنان ورىن تەپكەن شىعارماشىلىق-يننوۆاتسيالىق اكادەميا تاۋلىگىنە 3 مىڭ وقۋشىعا دەيىن قابىلدايدى. مۇندا باسسەين, توپتىق جاتتىعۋ بولمەسى, كوركەم گيمناستيكا جانە فيتنەس زالى ورنالاسقان. سونداي-اق ۇستەل ويىندارىنا ارنالعان كابينەت, جەكپە-جەك, ۇستەل تەننيسى زالدارى بار.
كوركەمدىك-ەستەتيكالىق باعىتتا كەسكىندەمە, سۋرەت سالۋ, رەزين ارت بولمەسى, بالالار شىعارماشىلىعى شەبەرحاناسى, ساندىك-قولدانبالى ونەر, «FabLab», دىبىس جازۋ ستۋدياسى, روبوتتەحنيكا جانە جاساندى ينتەللەكت, بيوتەحنولوگيا, 3D مودەلدەۋ, كيپ جانە اۆتوماتتاندىرۋ, كيبەرسپورت جانە ماتەماتيكا كابينەتتەرى جۇمىس ىستەيدى.
وتكەن جىلى وڭىردە ءبىلىم بەرۋ ينفراقۇرىلىمىن دامىتۋ باعىتىنداعى جۇمىس ناتيجەسىندە 13 عيمارات پايدالانۋعا بەرىلگەن. ال «جايلى مەكتەپ» ۇلتتىق جوباسى اياسىندا 10 مەكتەپتىڭ قۇرىلىسى جوسپارلانسا, بۇگىندە 3 مىڭ ورىندىق 6 مەكتەپ اشىلدى. قالعان تورتەۋى جىل سوڭىنا دەيىن قولدانىسقا بەرىلەدى. قالانىڭ سول جاعالاۋىنان بوي كوتەرىپ كەلە جاتقان فيزيكا-ماتەماتيكا مەكتەپ-ينتەرناتى مەن مۋزىكالىق كوللەدج عيماراتى سالاعا جاسالىپ جاتقان قولداۋدىڭ ناتيجەسى دەۋگە بولادى.
كەيىنگى ءۇش جىلدا 3 وقۋشىلار سارايى مەن 2 ونەر مەكتەبى ىسكە قوسىلىپ, شاكىرتتەردىڭ جان-جاقتى قالىپتاسۋىنا قىزمەت ەتىپ كەلەدى.
قىزىلوردا