قور قۇرۋ تۋرالى باستاما الماتىدا ورتالىق ازيا ەكولوگيالىق زەرتتەۋلەر ينستيتۋتىنىڭ (واەزي) بازاسىندا «بالقاش كولىنىڭ ەكوجۇيەسىن ساقتاۋ بويىنشا جوسپاردى ازىرلەۋ» اتتى وتكەن سەميناردا جاريالاندى. ءىس-شاراعا «قازاقمىس كورپوراتسياسى» جشس, سۋ رەسۋرستارى جانە يرريگاتسيا مينيسترلىگى, حالىقارالىق ۇيىمدار جانە فرانتسيانىڭ الماتىداعى باس كونسۋلدىعىنىڭ وكىلدەرى, سونداي-اق عالىمدار مەن ساراپشىلار قاتىستى.
«سەميناردىڭ باستى ماقساتى – بالقاش كولىنىڭ ماسەلەسىمەن اينالىساتىن ساراپشىلاردى, سونىڭ ىشىندە حالىقارالىق سەرىكتەستەرىمىزدى ءبىر ۇستەل باسىنا جيناۋ. ەكى كۇندىك تالقىلاۋ ناتيجەسىندە «قازاقمىس», سۋ رەسۋرستارى مينيسترلىگى جانە باسقا دا قاتىسۋشىلار اراسىندا الدا اتقارىلاتىن جۇمىس پەن جۇكتەلەتىن جاۋاپكەرشىلىك بويىنشا ورتاق تۇسىنىك قالىپتاستى», دەپ مالىمدەدى باسقارما توراعاسىنىڭ تۇراقتى دامۋ جانە كوممۋنيكاتسيالار جونىندەگى ورىنباسارى ساكەن شاياحمەتوۆ.
سەمينار بارىسىندا سۋ رەسۋرستارى جانە يرريگاتسيا مينيسترلىگىمەن بىرلەسىپ بالقاش كولىن جانە ىلە-بالقاش الابىن ودان ءارى دامىتۋدىڭ جوسپارىن ەنگىزۋ بويىنشا جول كارتاسىن جاساۋ تۋرالى شەشىم قابىلداندى. جوسپار اياسىندا جوبالار پۋلى ىرىكتەلەدى جانە ولاردى قولدانىسقا ەنگىزۋ مەن جۇزەگە اسىرۋ شارالارى قولعا الىنادى.
ايتا كەتەيىك, جول كارتاسىندا ىلە-بالقاش الابىنىڭ جاعدايىن جانە سۋ رەسۋرستارىنىڭ ساپاسىن تالداۋعا ارنالعان كەشەندى شارالار قاراستىرىلعان. ونىڭ ىشىندە جەر استى سۋلارىنىڭ جاعدايىن تالداۋ, بالقاش كولىنىڭ دەڭگەيىن باقىلاۋعا ارنالعان تسيفرلىق پلاتفورما قۇرۋ, سۋ نىساندارىن, گيدروتەحنيكالىق قۇرىلىمداردى اۆتوماتتاندىرۋ جانە تسيفرلاندىرۋ جوسپارلانعان.
«ىلە-بالقاش الابى مەن ونىڭ ەكوجۇيەسىن, سۋ رەسۋرستارى مەن بيولوگيالىق سانالۋاندىعىن ساقتاۋ ماقساتىندا «قازاقمىس» تاراپىنان ارنايى قور قۇرۋ تۋرالى شەشىم قابىلداندى. ءبىزدىڭ قور مينيسترلىكپەن بىرلەسىپ جۇمىس ىستەيدى. ءوز دەڭگەيىمىزدە مامانداردى تارتىپ, وڭىرلەر ءۇشىن اسا ماڭىزدى ءارى بارىنشا ءتيىمدى جوبالاردى ىرىكتەپ الامىز», دەدى ساكەن شاياحمەتوۆ.
«بالقاش كولىنە قاتىستى ماسەلەلەر ۇزاق ۋاقىت بويى جۇيەسىز, بولەك-بولەك شەشىلىپ كەلدى. ەندى وسى سالاداعى جۇمىستى جۇيەلى جانە كەلىسىلگەن دەڭگەيگە كوشىرۋ ءۇشىن كولدى ساقتاۋ مەن قورعاۋ بويىنشا جوسپار ازىرلەي باستادىق. بۇل قۇجات سۋ رەسۋرستارىن باسقارۋدا تابيعات, ەكونوميكا جانە قوعام مۇددەسىنىڭ تەپە-تەڭدىگىنە نەگىزدەلگەن تۇتاس ءارى سالاارالىق ءتاسىلدى قالىپتاستىرۋدا ماڭىزدى قادام بولادى», دەدى سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى بولات بەكنياز.
بۇگىندە ىلە-بالقاش الابىنىڭ سۋ رەسۋرستارىن ۇتىمدى جانە ءتيىمدى پايدالانۋ, سونداي-اق قحر-مەن بىرلەسىپ ىلە وزەنى الابىنىڭ سۋىن قورعاۋ جانە تۇراقتى پايدالانۋ ماسەلەلەرى بويىنشا ءىس-شارالار ازىرلەندى.
بالقاش كولىنىڭ الابىن زەرتتەۋ جۇمىسى فرانتسيانىڭ دامۋ اگەنتتىگى (AFD), فرانتسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) جانە وتاندىق ماماندارمەن بىرلەسىپ جۇرگىزىلەدى. قازىر فرانتسۋز تاراپى قاجەتتى مالىمەتتەردى جيناۋ ۇستىندە. اتاپ ايتقاندا, BRGM ساراپشىلارى بالقاش كولى الابىنداعى ۇڭعىمالاردى, گيدروبەكەتتەردى جانە سۋارمالى جەرلەردى ارالاپ, دالالىق زەرتتەۋ جۇمىستارىن جۇرگىزۋدى جوسپارلاپ وتىر.