قازىرگى جۋرناليستيكا ۋاقىت العا وزعان سايىن وزگەرىپ جاتىر. جاساندى ينتەللەكت اكەلگەن جاڭالىقتار دا قازاق جۋرناليستيكاسىنا سونى لەپ اكەلەتىنى راس. مەدياداعى ساۋاتتىلىق, كادر تاپشىلىعى مەن اقپاراتتىق قاۋىپسىزدىك ماسەلەلەرى دە كۇن تارتىبىنەن تۇسپەي تۇرعانى انىق. وسى جانە وزگە ماسەلەلەر م.ح.دۋلاتي اتىنداعى تاراز وڭىرلىك ۋنيۆەرسيتەتىندە «بۇگىنگى جۋرناليستيكا: سىن-قاتەرلەر, ترەندتەر, مەملەكەتتىك قۇرىلىمدارمەن ءوزارا ءىس-قيمىل» اتتى سەميناردىڭ وزەگىنە اينالدى.
مادەنيەت جانە اقپارات مينيسترلىگىنىڭ مۇرىندىق بولۋىمەن وتكەن ءىس-شاراعا وبلىس اۋداندارىنداعى مەديا ورتالىق جەتەكشىلەرى, سان جىلدار بويى سالادا تەر توگىپ كەلە جاتقان تاجىريبەلى جۋرناليستەر جانە جۋرناليستيكا ماماندىعىندا ءبىلىم الىپ جاتقان ستۋدەنتتەر قاتىستى.
ءىس-شارادا العاش ءسوز العان مادەنيەت جانە اقپارات مينيسترلىگى باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ جۋرناليستيكاداعى بۇگىنگى وزگەرىستەر, مەدياساياسات پەن مەملەكەتتىك ورگاندارداعى اقپاراتتىق بايلانىستى نىعايتۋ, جاڭا دەڭگەيگە كوتەرۋ تۋرالى ۇتىمدى ويىن ورتاعا سالدى.
كەيىننەن ءىس-شاراعا ارنايى قاتىسقان سپيكەرلەر بىرنەشە تاقىرىپ بويىنشا بايانداما جاساپ, ۇسىنىس-پىكىرلەرىمەن ءبولىستى. وڭىرلىك كوممۋنيكاتسيالار قىزمەتىنىڭ باسشىسى المات سادۋاقاستىڭ ايتۋىنشا, باق پەن مەملەكەتتىك ورگاندار اراسىنداعى بايلانىستى جاقسارتۋ ماقساتىندا ۇزدىكسىز جۇمىس جۇرگىزىلۋى كەرەك.
ء«دال قازىرگى كەزەڭدە جىلدامدىق قاجەت. سوندىقتان دا جىلدام ءارى ناقتى, دايەكتى مالىمەت بەرۋدىڭ ماڭىزى زور. قوعام قاجەتتىلىگىن وتەۋدە باق پەن مەملەكەتتىك قۇرىلىمداردىڭ ءوزارا ۇيلەسىمدى جۇمىسى شەشۋشى رولگە يە ەكەنى داۋسىز. وسى ورايدا وڭىرلىك كوممۋنيكاتسيالار قىزمەتى باق وكىلدەرى مەن مەملەكەتتىك ورگاندار اراسىنداعى ءتيىمدى ءىس-قيمىل, بايلانىستى, اشىقتىقتى قامتاماسىز ەتىپ وتىرعانىن ايتا كەتكەن ءجون. ءباسپاسوز ءماسليحاتىن ۇيىمداستىرۋداعى ماقسات – ەسەپ تىڭداۋ ەمەس, جارتى جىل, ءبىر جىل ىشىندە اتقارىلعان جۇمىستىڭ ساپاسىنا ءمان بەرۋ. جۋرناليست بايلانىسا الماي جۇرگەن باسقارما, دەپارتامەنت باسشىلارىن بەتپە-بەت جۇزدەستىرە الاتىن بىردەن-ءبىر ورىن – وڭىرلىك كوممۋنيكاتسيا قىزمەتى الاڭى. وڭىرلىك كوممۋنيكاتسيالار قىزمەتى حالىق تاراپىنان كەلىپ تۇسكەن ارىز-شاعىم, ساۋالدارعا دا دەر كەزىندە كەرى بايلانىس ورناتىپ, جاۋاپ بەرىپ وتىرادى. بۇل تۇستا اۋدانداعى مەديا ورتالىق باسشىلارىنىڭ, ءباسپاسوز حاتشىلارىنىڭ ىقپالى زور», دەيدى ول.
باسقوسۋدا ءسوز العان قالامگەر باقىتجان ماحان ۇلى جالعان اقپاراتتىڭ قوعامعا تيگىزەر زيانى مەن مەدياساۋاتتىلىقتىڭ ماڭىزىنا توقتالدى. سپيكەر جۋرناليستەر مەن وقىرماندار اراسىندا سىن تۇرعىسىنان ويلاۋ داعدىلارىن قالىپتاستىرۋ قاجەت ەكەنىن, اقپاراتپەن جۇمىس ىستەۋدىڭ جاۋاپكەرشىلىگى ارتقانىن اتاپ ءوتتى.
«Jambyl» تەلەارناسىنىڭ ديرەكتورى گۇلبارشىن قۇلانباەۆا مەدياكونتەنتتى ۆيزۋاليزاتسيالاۋ ادىستەرىمەن ءبولىسىپ, گرافيكا, ينفوگرافيكا مەن بەينەماتەريالداردىڭ اۋديتوريا تارتۋداعى ماڭىزىن ناقتى مىسالدارمەن كورسەتتى. سول سەكىلدى ءجۋرناليستىڭ بايانداۋ شەبەرلىگى مەن اۋديتوريامەن بايلانىس ورناتۋ تاسىلدەرى ايتىلدى. سپيكەر سەندىرۋ, ەموتسيالىق اسەر جانە تىلدىك ءستيلدىڭ رولىنە ەرەكشە ءمان بەردى.
سەمينار بارىسىندا تەك كاسىبي داعدىلار ەمەس, جۋرناليستەردىڭ الەۋمەتتىك ماسەلەلەرى دە قوزعالدى. قاتىسۋشىلار سالاداعى ەڭبەكاقىنىڭ تومەندىگى مەن مامان تاپشىلىعىن اشىق ايتىپ, بۇل ماسەلەلەردىڭ باق ساپاسىنا تىكەلەي اسەر ەتەتىنىن جەتكىزدى.
جامبىل وبلىسى