جەتىسۋ وبلىسىنىڭ شەكارالىق پانفيلوۆ اۋدانىندا ءتورت اۋىل — المالى, قىرىققۇدىق, تۇرپان جانە اقجازىقتا جاڭا دارىگەرلىك امبۋلاتوريالار اشىلدى. بۇل نىساندار 9 مىڭعا جۋىق تۇرعىنعا زاماناۋي مەديتسينالىق قىزمەت كورسەتەدى, دەپ حابارلايدى Egemen.kz.
بۇعان دەيىن بۇل اۋىلداردا مەديتسينالىق كومەك ەسكى, بەيىمدەلگەن عيماراتتاردا كورسەتىلىپ كەلگەن. 2024 جىلدىڭ ساۋىرىندە باستالعان قۇرىلىستار بيىل كوكتەمدە اياقتالىپ, پايدالانۋعا بەرىلدى. ءار امبۋلاتوريا 448 شارشى مەترلىك ستاندارتتى جوبامەن سالىنىپ, قاجەتتى قۇرال-جابدىقتارمەن تولىق جابدىقتالعان. مۇندا كۇندىزگى ءبولىم, زەرتحانا, وڭالتۋ بولمەسى جانە العاشقى كومەك كورسەتۋ قىزمەتتەرى قاراستىرىلعان.
اقجازىق اۋىلىنىڭ تۇرعىنى, زەينەتكەر باعداگۇل احمەتوۆا بۇل جاڭالىقتى اۋىلدىڭ دامۋىنداعى ۇلكەن قادام دەپ باعالادى. ال پانفيلوۆ اۋدانارالىق اۋرۋحاناسىنىڭ وكىلى التىناي كۇدەروۆا اۋداندا 2024 جىلدان باستاپ 16 مەديتسينالىق نىساننىڭ قۇرىلىسى باستالعانىن اتاپ ءوتتى. بيىل وبلىس بويىنشا تاعى 35 فەلدشەرلىك-اكۋشەرلىك پۋنكت, 4 دارىگەرلىك امبۋلاتوريا جانە 20 مەديتسينالىق پۋنكت سالۋ جوسپارلانىپ وتىر.