تالدىقورعان قالاسىنداعى «بىرلىك» شاعىن اۋدانىندا 60 وتباسىعا جاڭا پاتەر كىلتى تابىستالدى. باسپاناعا حالىقتىڭ الەۋمەتتىك جاعىنان وسال توپتارى, كوپبالالى انالار, جەتىم بالالار جانە اتا-اناسىنىڭ قامقورلىعىنسىز قالعان بالالار يە بولدى.
جاڭا قونىس يەلەرىنىڭ اراسىندا ون جىلدان استام ۋاقىت ءۇي كەزەگىندە تۇرعان, كوپبالالى انا دانا بايداليەۆا دا بار. ول ءۇش بولمەلى جاڭا پاتەرگە يە بولىپ, العىسىن جەتكىزدى.
قالا اكىمى ەرنات ءبازىلدىڭ ايتۋىنشا, بۇگىندە قالانىڭ ينفراقۇرىلىمى قارقىندى دامىپ, قولجەتىمدى تۇرعىن ۇيمەن قامتاماسىز ەتۋ جۇمىستارى جۇيەلى جۇرگىزىلۋدە. جىل باسىنان بەرى «بىرلىك» اۋدانىندا 120 وتباسى قونىس تويىن تويلاسا, بۇگىنگى مەرەكەمەن بىرگە بۇل كورسەتكىش 180-گە جەتتى.
وتكەن جىلى تالدىقورعاندا 1283 وتباسى باسپانالى بولسا, بيىل 1500-گە جۋىق وتباسىعا جاڭا پاتەر كىلتى تابىستالماق.