«QyzPU باسقارما توراعاسى – رەكتور گۇلميرا قاناي ۋنيۆەرسيتەت ۇجىمى مەن ءبىلىم الۋشىلارى بەلگىلى عالىم, پەداگوگ روزاليندا اشىربايقىزى شاحانوۆانىڭ دۇنيەدەن وتۋىنە بايلانىستى تۋعان تۋىستارى مەن جاقىندارىنا كوڭىل ايتادى», دەلىنگەن حابارلامادا.
روزاليندا شاحانوۆا 1951 جىلى پاۆلودار قالاسىندا دۇنيەگە كەلگەن. ول الماتىداعى قازاق قىزدار پەداگوگيكالىق ۋنيۆەرسيتەتىندە (قازىرگى QyzPU) «ورىس ءتىلى مەن ادەبيەتى» ماماندىعى بويىنشا جوعارى ءبىلىم الىپ, ەڭبەك جولىن قاراپايىم مەكتەپ مۇعالىمىنەن باستاعان.
عىلىمعا ادال ەڭبەك ەتكەن روزاليندا اشىربايقىزى 1990 جىلى كانديداتتىق ديسسەرتاتسياسىن قورعاپ, ال 1993 جىلى «قازاق ءتىلى مەن ادەبيەتى» ماماندىعى بويىنشا ەكىنشى جوعارى ءبىلىم العان. سول جىلى دوتسەنت اتاعىنا يە بولعان. ول جازعان عىلىمي جانە ادىستەمەلىك ەڭبەكتەر ەلىمىزدىڭ ءبىلىم بەرۋ جۇيەسىندە كەڭىنەن قولدانىلادى.
2004–2008 جىلدارى QyzPU وقۋ-ادىستەمەلىك جۇمىس جونىندەگى پرورەكتورى قىزمەتىن اتقارعان. زەينەت جاسىنا شىقسا دا, ءوزى تۇلەپ ۇشقان وقۋ ورنىمەن بايلانىسىن ۇزبەي, مەملەكەتتىك ەمتيحان كوميسسياسىنىڭ توراعاسى رەتىندە ستۋدەنتتەردىڭ ءبىلىم ساپاسىن باعالاۋعا بەلسەندى اتسالىسقان.
روزاليندا شاحانوۆا — كوپتەگەن عىلىمي ماقالالار مەن وقۋ-ادىستەمەلىك قۇرالداردىڭ اۆتورى. ول قازاقستان رەسپۋبليكاسىنىڭ ءبىلىم بەرۋ ءىسىنىڭ ۇزدىگى, «جوعارى وقۋ ورنىنىڭ ۇزدىك وقىتۋشىسى», «ى. التىنسارين» مەدالىنىڭ يەگەرى. سونىمەن قاتار, «عىلىمنىڭ دامۋىنا قوسقان ۇلەسى ءۇشىن» توسبەلگىسىمەن جانە QyzPU دامۋىنا قوسقان ەرەكشە ۇلەسى ءۇشىن «قۇرمەت» مەدالىمەن ماراپاتتالعان.