نۇرسۇلتان ءابىش ۇلى نازارباەۆ ەسىمى ەڭبەك جولى ءوسۋى باسىندا تەمىرتاۋلىقتارعا عانا ەمەس, اۋىل شارۋاشىلىعى سالاسى ەڭبەككەرلەرىنە دە ەرتە تانىلعانىن كوپشىلىك بىلە بەرمەۋى مۇمكىن. بۇعان تىكەلەي كۋاگەرلەردىڭ ءبىرى رەتىندە ءسۇيسىنىسپەن ەسكە الىپ وتىرامىن. وتكەن عاسىردىڭ 70-جىلدارىندا تەمىرتاۋدان ونشالىقتى الىس ەمەس تۇستا, نۇرا وزەنىنىڭ مال-جانعا جايلى بويىندا امانگەلدى اتىنداعى كەڭشار اشىلعان بولاتىن. ءدال سول كەزدە جوعارى وقۋ ورنىن بىتىرگەن ماعان باس اگرونوم ءمىندەتى جۇكتەلدى. ەكى ەسكى بولىمشە بىرىكتىرىلىپ, قۇرىلعان جاس شارۋاشىلىققا باسشىلىق جاساۋ ەل ءىشىنە سىيلى ازامات تولەۋتاي شاكىروۆكە تاپسىرىلدى.
ءىس جاڭادان ۇيىمداستىرىلىپ جاتقان جەردە بىرقاتار قيىندىقتار ۇشىراساتىندىعى بەلگىلى. وسىنداي كەزدە شارۋامىزدىڭ العا باسۋىنا قاراعاندى مەتاللۋرگيا كومبيناتىنىڭ كوپ كومەگى ءتيدى. بۇعان دەيىن دە اۋىلىمىزعا كەلىپ تۇراتىن, جەرگىلىكتى جۇرتقا ەتەنە تانىمال, اتالعان ءوندىرىس ورنىنىڭ جاۋاپتى بۋىنى قىزمەتىندەگى نۇرسۇلتان نازارباەۆتىڭ قولداۋى بىزگە تىلەگەندەي بولدى. تۇرعىن ۇيلەر, مەكتەپ, مونشا, استىق قويماسى, قىمىز ءوندىرۋ تسەحى بىرىنەن سوڭ ءبىرى بوي كوتەرىپ, تەز شاڭىراق بيىكتەتىپ قالدىق. اۋىل تۇرعىندارىنا ماسەلەلەردى شەشۋ جولىن كورسەتىپ, تالاپ-تىلەكتەرى ورىندالۋىن تۇراقتى باقىلاۋدا ۇستاپ, وندىرىستەگى ونسىز دا قات-قابات جۇمىستارعا قاراماستان, قاشاندا كومەككە كەلۋگە ۋاقىت تاباتىن. امانگەلدىلىكتەر بارىنشا قامقورلىق كورسەتۋگە ايانبايتىن جىگىتتى ءوز ادامدارىنداي كورىپ, باۋىرعا باستى.
تۇرعىندار وي-ۇسىنىستارىن, مۇڭ-مۇددەلەرىن الدىمەن نۇرسۇلتان نازارباەۆقا جايىپ, سوزدەرى جەردە قالمايتىندىعىن بىلەتىن. ءبىر كەزدەسۋدە 1100 توننالىق استىق قويماسىن سالۋ جايلى ايتىلدى. ونىڭ جوباسىن ماماندارعا جاساتىپ, سمەتالىق قۇنىن ەسەپتەتىپ, قۇرىلىستىڭ بەلگىلەنگەن مەرزىمدە بىتۋىنە مۇمكىندىك تۋعىزدى.
جاسىراتىنى جوق, ول ۋاقىتتا نەگىزىنەن بايىرعى حالىق شوعىرلانعان شارۋاشىلىقتارعا ىنتا-نيەت ىقىلاستى بولا قويمايتىن. اۋدان باسشىلارى قولۇشىن سوزباق تۇگىلى, ايلار بويى ءاتىزىن سالمايتىن. ابدەن ەركىنسىنگەن ولار قاراجاتتى, تەحنيكانى, جۇمىسشى كۇشىن, مامانداردى وزدەرى قالاۋىنداعى كەڭشارلارعا ءۇيىپ-توگىپ جىبەرىپ جاتاتىن. مۇنداي سالقىن قاباق نۇرسۇلتان ءابىش ۇلىنىڭ وبلىستىق دەڭگەيدەگى جاۋاپتى قىزمەتكە تاعايىندالۋىنان باستاپ ساپ تىيىلعانىن بىردەن بايقادىق. ءبىر ءبىز ەمەس, امانتاۋ, بالىقتىكول, مارجانكول سياقتى قازاقى اۋىلدار دامۋى جەدەلدەگەن ەدى.
ول كىسىنىڭ ۇلكەندى سىيلاۋ, كىشىنى قادىرلەۋ, اشىق, قاراپايىم, جانىنا جاقىن تارتا بىلەتىن مىنەزدەرى بارىمىزگە ۇلگى بولاتىن. بىردە اسىعىس بولسا دا مەنىڭ دە وتاۋىمدى اتتاماي, جاس وتباسىمىزعا قۇرمەت كورسەتكەنى ومىرىمىزدە ۇمىتىلماستاي ساقتالىپ قالدى.
بۇگىندە الەم تانىعان, حالقىمىزدىڭ باقىتىنا اينالعان تۇڭعىش پرەزيدەنتىمىزدى ءبىز ەرتەدەن بىلەتىندىگىمىزدى ماقتان تۇتامىز. جاقسىلىق نۇرىن سەبۋگە جاراتىلعان جۇرەكتىڭ جىلى لەبىن كۇنبە-كۇن سەزىنىپ كەلەمىز. وسىنداي باسشىسى بار ەلىمىز بەرەكەسى بەرىگىپ, مارتەبەسى وسە بەرەرى ءسوزسىز. بيىك ادامگەرشىلىكتەن, اسقان مادەنيەتتىلىكتەن, حالىق الدىندا كىشىلىكتەن اينىماعان ازاماتتىق قاسيەتىن جاقىنداعى شەشىم تاعى ءبىر ايعاقتادى ەمەس پە. ەلباسىنىڭ وتانىمىزدى گۇلدەندىرۋ جولىنداعى ەرەن ەڭبەگى, قالتقىسىز قىزمەتى بارىنشا ايان. سوعان ورايعى قۇرمەت-مارتەبەنى ايرىقشالاۋ جونىندەگى ۇسىنىسقا ۇستامدىلىق كورسەتۋى پاراساتتىلىقتىڭ ۇلگىسى دەپ بىلەمىز. قازىر كورىپ-تانىپ جۇرگەنىمىزدەي, قالىڭ قاۋىمنىڭ پرەزيدەنت قاراپايىمدىلىعىنا رازىلىعى ءتىپتى بولەكشە. حالىق ءسۇيىسپەنشىلىگىنەن ارتىق ەشتەڭە جوق. وعان ەل كۋا.
بەيسەمبەك الكەنوۆ, كاسىپكەر.
قاراعاندى وبلىسى.
حالىقتىڭ قالاۋىن بىلدىرەدى
ەلىمىزدىڭ ودان ءارى تۇراقتى دامۋى مەن بىرلىگى جانە بولاشاعى ءۇشىن وتە قاجەتتى كونستيتۋتسيالىق زاڭ قابىلدانعانى بارشا قازاقستاندىقتاردىڭ ويىنان شىققانى كۇمانسىز. وسى ارقىلى قازاقستان اتتى مەملەكەت الەمدىك دەڭگەيدە ءوزىنىڭ ابىرويى مەن سالماقتى ورنىن ساقتاپ قالا بەرمەك. جاس مەملەكەتتىڭ وسىنداي الەم تانىعان دەڭگەيگە جەتۋى ءۇشىن ەلباسى ءوزىنىڭ اقىل-ويى مەن پاراساتىن جانە تاجىريبەسىن جۇمساپ جۇرگەنى ايان.
نۇرسۇلتان ءابىش ۇلىنىڭ ءوزى پارلامەنت قابىلداعان زاڭدى بەكىتۋدەن باس تارتسا دا, حالىق سايلاعان پارلامەنت پەن ۇكىمەت باسشىلارى قول قويىپ, ونى زاڭدى كۇشىنە ەنگىزدى. مۇنى مەملەكەت باسشىسىنىڭ ەلدىڭ اتا زاڭىن جوعارى تۇرعىدا مويىنداي ءبىلۋىنىڭ كەرەمەت كورسەتكىشى دەپ قابىلداۋىمىز كەرەك.
زاڭنىڭ اتى – زاڭ. ونى پرەزيدەنت تە, ەلدىڭ بارشا ازاماتتارى دا بۇلجىتپاي ورىنداۋى قاجەت. ءارى مۇنى ەكىنشى جاعىنان ازاماتتاردىڭ پارىزى مەن اينىماس بورىشى دەپ قاراستىرعانىمىز دا ورىندى. بۇل – بارشا قازاقستاندىقتار ءىس-قيمىلىنىڭ باعدارى. ونىڭ ۇستىنە قابىلدانعان كونستيتۋتسيالىق زاڭ حالىقتىڭ ەركى مەن قالاۋىن ءبىلدىرگەن زاڭ بولسا, ونىڭ قادىر-قاسيەتى ودان ءارى ارتا تۇسەدى.
ياعني, جوعارىدا ايتىپ وتكەنىمدەي, پارلامەنتتىڭ قوس پالاتاسىنىڭ توراعالارى ق.توقاەۆ پەن و.مۇحامەدجانوۆ جانە پرەمەر-مينيستر ك.ءماسىموۆ قول قويعان زاڭ حالىقتىڭ ەركىن بىلدىرە الۋىمەن قۇندى دەپ ەسەپتەيمىن.
الىبەك ساتباەۆ, باتىس قازاقستان وبلىستىق جەر قاتىناستارى باسقارماسىنىڭ باستىعى, پرەزيدەنت بەلگىلەگەن “التىن بارىس” بەلگىسىنىڭ يەگەرى.
باتىس قازاقستان وبلىسى.
پرەزيدەنت قىراندارى قانات قاقتى
قازاقستان رەسپۋبليكاسى قورعانىس مينيسترلىگىنىڭ كادەت كورپۋسى – ەل قارۋلى كۇشتەرىندەگى كاسىبي سەرجانتتار مەكتەبى. قازاقتان شىققان تۇڭعىش كادەت شوقان ءۋاليحانوۆتىڭ ەسىمىن يەلەنگەن بولاشاق وتان قورعاۋشىلارى وزدەرىن “پرەزيدەنت قىراندارىمىز” دەيدى. بۇل كۇندەرى كادەت كورپۋسىن بىتىرگەن جۇزدەگەن كاسىبي سەرجانتتار قارۋلى كۇشتەر ساپىندا ابىرويمەن قىزمەت اتقارىپ ءجۇر.
كادەت كورپۋسى 1996 جىلعى 1 شىلدەدە قازاقستان رەسپۋبليكاسى پرەزيدەنتىنىڭ جارلىعىمەن قۇرىلعان. اتالعان وقۋ ورنىنىڭ تۇلەكتەرى جاۋىنگەرلىك بولىمدەردە كىشى كومانديرلەر لاۋازىمىنا تاعايىندالادى. كەيىننەن ۆزۆود, روتا, باتالون, بريگادا سەرجانتى سىندى جاۋاپكەرشىلىگى مول لاۋازىمدارعا بەكىتىلەدى. وسى ۋاقىتقا دەيىن وسى وقۋ ورنىن 1286 كادەت ءبىتىرىپ شىققان.
26 ماۋسىمدا كادەت كورپۋسىنىڭ 12 تۇلەگى جاڭا ومىرگە جولداما الدى. اشىق ەسىك جاعدايىندا وتكەن مەرەكەگە ولاردىڭ اتا-انالارى, تۋعان-تۋىستارى كوپتەپ قاتىستى. جەرگىلىكتى باسقارۋ ورگاندارىنىڭ, قوعامدىق ۇيىمدار مەن قورعانىس مينيسترلىگىنىڭ وكىلدەرى كادەتتەردىڭ قۋانىشىن بىرگە ءبولىستى. سالتاناتتا ءسوز العان ۇلى وتان سوعىسىنىڭ ارداگەرلەرى كادەتتەرگە ءسات ساپار تىلەپ, اق باتالارىن بەردى. انتقا ادالدىق, سەرتكە بەرىكتىك سياقتى ۇعىمدار اقساقالدار تاراپىنان مولىنان ايتىلدى.
مەرەكە مەيماندارى كادەتتەردىڭ تۇرمىس-تىرشىلىگىمەن كەڭىنەن تانىسۋعا مۇمكىندىك الدى. اسكەري وقۋ ورنىنىڭ وفيتسەرلەرى قوناقتارعا جاۋىنگەرلىك داڭق مۇراجايى مەن قارۋ-جاراق پەن اسكەري تەحنيكا ءتۇرىن كورسەتتى, دەپ حابارلادى قر قورعانىس مينيسترلىگىنىڭ ءباسپاسوز قىزمەتى.