قاسىم-جومارت توقاەۆ كورنەكتى مەملەكەت جانە قوعام قايراتكەرى, سوتسياليستىك ەڭبەك ەرى ۆەرا سيدوروۆانىڭ قايتىس بولۋىنا بايلانىستى ونىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلايدى Egemen.kz.
«ۆەرا ۆاسيلەۆنا عيبراتتى عۇمىرىندا قاتارداعى اگرونومنان باستاپ قازاق كسر جوعارعى كەڭەسى پرەزيديۋمى توراعاسىنىڭ مىندەتىن اتقارۋشىعا دەيىنگى ەڭبەك جولىنان ءوتتى. ول قازاق دالاسىنداعى تىڭ يگەرۋگە, ەلىمىزدىڭ الەۋمەتتىك-ەكونوميكالىق دامۋىنا ەلەۋلى ۇلەس قوستى.
ۆەرا ۆاسيلەۆنانى ادامگەرشىلىك جانە ومىرلىك ۇستانىمىنا بەرىك قاسيەتتەرى ەرەكشەلەپ تۇراتىن. 1986 جىلعى جەلتوقسان وقيعاسى كەزىندە ستۋدەنتتەرگە كومەك كورسەتۋى ونىڭ شىن مانىندە پاتريوت ءارى ادىلدىك ءۇشىن كۇرەستە تايسالمايتىن تۇلعا ەكەنىن دالەلدەيدى», دەپ جازىلعان جەدەلحاتتا.