اقتوبەدەگى ءىرى كاسىپورىندار قالا ىشىندەگى بوس جاتقان اۋماقتاردى اباتتاندىرىپ, شاعىن اللەيالار مەن سكۆەرلەر قۇرۋدى قولعا الماقشى. وتكەن جىلى ءتورت كاسىپورىن بەس الاڭقايدى اباتتاندىرىپ, شاعىن سكۆەرلەر جاساسا, بيىل ون ءبىر اۋماقتا وسى جۇمىس جالعاسىن تابادى, دەپ حابارلايدى Egemen.kz.
اسىرەسە, جاڭادان قۇرىلعان ىقشاماۋدانداردا تال-تەرەك وتىرعىزۋ, بالالارعا ارنالعان ويىن الاڭدارىن سالىپ, تۇرعىندار ءۇشىن جايلى دا ىڭعايلى ورىندارعا اينالدىرۋ كەزەك كۇتتىرمەيتىن ءىس. قالا اكىمى ازامات بەكەت اباتتاندىرۋعا ىقىلاس بىلدىرگەن كاسىپورىن باسشىلارىمەن كەزدەسۋدە اللەيالار مەن شاعىن ساياباقتاردى رەتكە كەلتىرۋدى تامىز ايىنا دەيىن اياقتاۋدى تاپسىردى.
«كاسىپكەرلەر ون ءبىر اۋماقتى اباتتاندىرۋعا كىرىسپەكشى. جاناشىرلىق تانىتقان ازاماتتارعا شەكسىز العىسىمىزدى بىلدىرە وتىرىپ, ءبىز ولاردان سكۆەرلەر مەن شاعىن ساياباقتاردى كوگالداندىرىپ, سۋارۋ جۇيەسىن قۇرىپ, تۇنگى جارىقتاندىرۋ شامدارىن, ورىندىقتار, قوقىس جاشىكتەرىن ورناتىپ, تاقتايشالار توسەپ, ءتۇرلى ساۋلەتتىك مازمۇندا بەزەندىرۋدى ۇسىنامىز. سكۆەرلەر ءساندى ءارى تۇرعىندارعا جايلى بولعانى ءجون», دەدى ول.
قالانىڭ «التىن وردا» ىقشاماۋدانى «ماڭگىلىك ەل» كوشەسىندەگى بوس جاتقان الاڭقايعا وتكەن جىل قاراعاي كوشەتتەرى وتىرعىزىلسا دا, كۇتىمسىزدىگى كورىنىپ تۇر.
بۇل جەردى رەتكە كەلتىرۋدى «زەردە كەراميكا اقتوبە» جشس-ءى موينىنا السا, مانشۇك مامەتوۆا كوشەسى بويىنداعى قاراۋسىز الاڭقايدى ء«اليحان ويل 3» جشس-ءى, ال ەسەت باتىر تۇرعىن ءۇي الابىنداعى مەكتەپ پەن كوپقاباتتى ۇيلەر اراسىنداعى بوس اۋماقتى «انۆار» ساۋدا جەلىسى قالىپقا كەلتىرمەكشى.
اقتوبە وبلىسى