7 ءساۋىر – دۇنيەجۇزىلىك دەنساۋلىق ساقتاۋ كۇنىنە وراي «جيتس الدىن الۋ جانە وعان قارسى كۇرەس جونىندەگى اقتوبە وبلىستىق ورتالىعى» مەكەمەسىنىڭ ماماندارى ادام يممۋن تاپشىلىعى ۆيرۋسىنىڭ الدىن الۋ جونىندە ساۋدا ورىندارىندا اقپاراتتىق-ناسيحات جۇمىستارىن جۇرگىزدى, دەپ حابارلايدى Egemen.kz.
دارىگەرلەر ايتۆ ينفەكتسياسىنىڭ الدىن الۋدىڭ نەگىزگى شارالارى, ۆيرۋس جۇقتىرعان جاعدايدا دەر كەزىندە كورسەتىلەتىن كومەك جولدارى تۋرالى ايتتى
«ورتالىق ماماندارى قاۋىپتى توپتار اراسىندا (ماسەلەن ەسەپتە تۇرعان ناشاقورلار) ادام يممۋن تاپشىلىعى ۆيرۋسىنىڭ تارالۋىن ازايتۋ ماقساتىندا بايلانىسقا دەيىنگى پرەپاراتتاردى تەگىن تاراتىپ ءجۇر. بۇل ايتۆ جۇقتىرۋ مۇمكىندىگىن ازايتادى دەگەن ويدامىز. بيىلعى 1 ساۋىرگە دەيىنگى جاعداي بويىنشا اقتوبەدە بايلانىسقا دەيىنگى پرەپاراتتاردى قابىلدايتىن ادامدار سانى 889-گە جەتتى. ەلىمىزدە وسى پرەپاراتتار تەگىن بەرىلەدى», دەيدى اقتوبە جيتس ورتالىعىنىڭ باس دارىگەرى ايگۇل دۇيسەنباەۆا.
بيىلعى جىلدىڭ العاشقى ءۇش ايىندا اقتوبە وبلىسىندا ايتۆ(ادام يممۋن تاپشىلىعى ۆيرۋسى) شالدىققانى ءۇشىن 17 تۇرعىن ەسەپكە الىندى. ونىڭ 14-ءى ەر ادامدار بولسا, 3-ءى ايەل. جەتەۋى جۇمىس ىستەسە, سەگىزى –جۇمىسسىزدار ساناتىندا, ەكەۋى ستۋدەنت بولىپ شىقتى. بارلىعى دا 20-59 جاس اراسىنداعىلار.