حالىقارالىق تەاتر كۇنى قارساڭىندا قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترى تورىندە جىل سايىن اتالىپ وتەتىن ادەمى ءداستۇر بيىل دا جالعاسىن تاپتى. ناۋرىز ايىنىڭ 21-27 كۇندەرى ارالىعىندا وتكەن «قاللەكي تىنىسى» سپەكتاكلدەر شەرۋىنە تەاتر ساحناسىندا ءبىر جىل ارالىعىندا قويىلعان جاڭا سپەكتاكلدەر قاتىسىپ, ساراپشىلار تالقىسىنا ءتۇستى.
ەلوردا كورەرمەندەرىن قاللەكي تەاتر ونەرىنىڭ ۇزدىك ۇلگىلەرىمەن تانىستىرۋدى مۇرات ەتكەن ايتۋلى ساحنا دۋمانىنا بيىل جەتى سپەكتاكل قاتىستى. اتاپ ايتساق, ولاردىڭ قاتارىندا م.اۋەزوۆتىڭ «قاراگوز» (رەجيسسەرى – گۇلسينا ميرعاليەۆا), جانىبەك الىكەننىڭ ماحابباتىم – سەن» (رەجيسسەرى – ءبازىل سۇلتانعازى), يتاليا دراماتۋرگى ەدۋاردو دە فەليپپونىڭ «ايەل قۇپياسى» (رەجيسسەرى – بولات ۇزاقوۆ), «ەرتەگى ءتۇننىڭ اۋەنى» (رەجيسسەرى – ولجاس دالەلحان), گەورگ بيۋحنەردىڭ «ۆويتسەك» (رەجيسسەرى – ۇلان قابىل), تولەن ابدىكتىڭ «پاراسات مايدانى» (رەجيسسەرى – گۇلسينا ميرعاليەۆا) جانە پەر دە بومارشەنىڭ «فيگارونىڭ ۇيلەنۋى» (رەجيسسەرى – نۇرلان جۇمانيازوۆ) قويىلىمدارى بار.
ءبىر اپتا بويى ساحنا ماماندارىنان قۇرالعان ساراپشىلار القاسى تەاتر تىنىسىنا دەن قويىپ, سپەكتاكلدەردىڭ تولىق تالداۋىن جۇزەگە اسىردى. سونىمەن بىرگە كورەرمەندەر دە اتاۋلى ونەر مەرەكەسىنەن قالىس قالماي, تەاتر فويەسىنە قويىلعان ساۋالنامانى تولتىرىپ, سۇيىكتى اكتەرلەرى مەن سپەكتاكلدەرىنە داۋىس بەرىپ, ءوز تاڭداۋىن جاساۋ مۇمكىندىگىنە يە بولدى. «جۇزدەن جۇيرىك, مىڭنان تۇلپار» شىققان ۇزدىك جۇمىستارعا ارنايى اتالىمدار بويىنشا ديپلوم مەن اقشالاي سىيلىقتار تابىس ەتىلدى.
سونىمەن ساراپشىلار شەشىمى بويىنشا, «تەاتر تارلانى» اتالىمىنداعى جۇلدە تولەن ابدىكتىڭ «پاراسات مايدانى» پسيحولوگيالىق دراماسىنداعى بەيتانىس ءرولى ءۇشىن قازاقستاننىڭ ەڭبەك سىڭىرگەن قايراتكەرى نۇركەن وتەۋىلگە تابىستالسا, ء«ۇمىت» سىيلىعى بەيتانىس 2 (جارماق) بەينەسى ءۇشىن مارعۇلان نامەنوۆكە بەرىلدى. «ەكىنشى پلانداعى ۇزدىك ەر ادام ءرولى» اتالىمىنا مۇحتار اۋەزوۆتىڭ «قاراگوز» تراگەدياسىنداعى نارشا ءرولى ءۇشىن ءبازىل سۇلتانعازى, ال «ەكىنشى پلانداعى ۇزدىك ايەل ءرولى» اتالىمىنداعى سىيلىققا گەورگ بيۋحنەردىڭ «ۆويتسەك» سپەكتاكلىندەگى ءرولى ءۇشىن اياۋجان مالعاجداروۆا لايىق دەپ تانىلدى. پەر دە بومارشەنىڭ «فيگارونىڭ ۇيلەنۋى» مۋزىكالىق كومەدياسىنداعى ءرولى ءۇشىن ءانۋار بەكتاس «ۇزدىك اكتەر», ەدۋاردو دە فەليپپونىڭ «ايەل قۇپياسى» دراماسىنداعى فيلۋمەنا مارتۋرانو بەينەسى ءۇشىن قازاقستاننىڭ ەڭبەك سىڭىرگەن ءارتىسى جانات چايكينا «ۇزدىك اكتريسا» اتاندى. سونداي-اق ساراپشىلاردىڭ ارنايى جۇلدەسىمەن مۇحتار اۋەزوۆتىڭ «قاراگوز» قويىلىمىنداعى ءمورجان ءرولى ءۇشىن قازاقستاننىڭ ەڭبەك سىڭىرگەن قايراتكەرى مايرا ومار ماراپاتتالدى. ال كورەرمەن تاڭداۋى بويىنشا «ۇزدىك سپەكتاكل» تۇعىرىنا قازاقستاننىڭ ەڭبەك سىڭىرگەن قايراتكەرى, ق.قۋانىشباەۆ اتىنداعى قازاق ۇلتتىق دراما تەاترىنىڭ كوركەمدىك جەتەكشىسى, رەجيسسەر گۇلسينا ميرعاليەۆانىڭ «قاراگوز» تراگەدياسى كوتەرىلسە, قاراگوز ءرولى ءۇشىن «دارىن» مەملەكەتتىك جاستار سىيلىعىنىڭ لاۋرەاتى اقمارال تاناباەۆا «ۇزدىك اكتريسا», «پاراسات مايدانىنداعى» رولىمەن قازاقستاننىڭ ەڭبەك سىڭىرگەن قايراتكەرى نۇركەن وتەۋىل «ۇزدىك اكتەر» دەپ تانىلدى.