ەل اۋماعىندا «دارمەك» رەسپۋبليكالىق جەدەل-پروفيلاكتيكالىق ءىس-شاراسى ءوتتى, دەپ حابارلايدى Egemen.kz.
شارا بارىسىندا پرەكۋرسورلار مەن مەديتسينالىق پرەپاراتتاردى قولداناتىن 900-دەن استام ۇيىم, ونىڭ ىشىندە 350 ءدارىحانا, 85 قويما, 103 ەمدەۋ-پروفيلاكتيكالىق مەكەمەسى جانە 362 كاسىپورىن تەكسەرىلگەن.
ساقتاۋ, وتكىزۋ جانە تاسىمالداۋ شارتتارىن بۇزعان 248 ادام اكىمشىلىك جاۋاپكەرشىلىككە تارتىلدى, ونىڭ ىشىندە 116 مەديتسينا قىزمەتكەرى بار.
«ەسىرتكى قۇرالدارىمەن جۇمىس ىستەۋ سالاسىندا 8 قىلمىستىق ءىس قوزعالدى. 35 مىڭ توننا پرەكۋرسور, 20 مىڭ تابلەتكا جانە قۇرامىندا پسيحواكتيۆتى زاتتار بار 24 مىڭ امپۋلانىڭ اينالىمىنا شەكتەۋ قويىلدى», دەدى ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ.
ماسەلەن, جامبىل وبلىسىنداعى ۇيىمداردىڭ ءبىرى پرەكۋرسورلاردى ساقتاۋ ەرەجەلەرىن بۇزعان. 34 مىڭ توننادان استام كۇكىرت قىشقىلى تاركىلەندى. اكىمشىلىك ماتەريال جينالىپ, ۇيىم قىزمەتى توقتاتىلعان. اقتوبە وبلىسىندا مەديتسينالىق ۇيىمدى تەكسەرۋ كەزىندە ەسىرتكى قۇرالدارىن ساقتاۋ جانە ەسەپكە الۋ ەرەجەلەرىنىڭ بۇزىلۋى انىقتالدى. فارماتسەۆتكە قاتىستى قىلمىستىق ءىس قوزعالدى.