ۇلتتىق قۇرىلتاي جۇمىس سەكتسيالارىنىڭ وتىرىسى ءوتتى

سەكتسيالار جۇمىسىنا ۇكىمەت پەن ورتالىق مەملەكەتتىك ورگانداردىڭ وكىلدەرى قاتىسىپ, قۇرىلتايدىڭ وتكەن جىلى ناۋرىز ايىندا اتىراۋ قالاسىندا وتكەن ءۇشىنشى وتىرىسىندا كوتەرىلگەن باستامالاردىڭ جۇزەگە اسىرىلۋ بارىسى تۋرالى باياندادى.

2024 جىلعى 1 قىركۇيەكتەن باستاپ ەلىمىزدىڭ بارلىق ورتا ءبىلىم بەرۋ ۇيىمدارىندا ەنگىزىلگەن جاڭارتىلعان تاربيە جۇمىسى باعدارلاماسىنىڭ العاشقى ناتيجەلەرى قاراستىرىلىپ جاتىر.

قۇرىلتاي مۇشەلەرى ءوز سوزدەرىندە جالپىۇلتتىق قۇندىلىقتاردى ودان ءارى دامىتۋ قاجەتتىلىگىنە نازار اۋداردى. بيىلعى «جۇمىسشى ماماندىقتار جىلى» اياسىندا ەڭبەكقورلىق پەن كاسىبيلىك قۇندىلىقتارىن دارىپتەۋگە ەرەكشە ءمان بەرىلدى.

سونداي-اق, جۇمىس سەكتسيالارىنىڭ قاتىسۋشىلارى ءبىلىم مەن عىلىمدى قولداۋ جانە دامىتۋ بويىنشا قابىلدانعان شارالاردى وڭ باعالادى. «جايلى مەكتەپ» باعدارلاماسىنىڭ ناتيجەلەرى, ستيپەنديالاردىڭ كوتەرىلۋى, شەتەلدىك جوو-لاردىڭ جاڭا فيليالدارىنىڭ اشىلۋى, كورنەكتى عالىمدار مەن پەداگوگتاردىڭ مەملەكەتتىك ماراپاتتارمەن ىنتالاندىرىلۋى ەرەكشە اتاپ ءوتىلدى.

قۇرىلتاي مۇشەلەرى مەملەكەت پەن قوعامنىڭ الەۋمەتتىك كەسەلدەرگە قارسى بىرلەسكەن جۇمىسىنا دا نازار اۋداردى. لۋدومانياعا قارسى كەشەندى جوسپاردىڭ, ەسىرتكىگە قارسى كۇرەس جوسپارىنىڭ العاشقى ناتيجەلەرى قارالدى. سونداي-اق, 2024 جىلى 16 ماۋسىمدا كۇشىنە ەنگەن تۇرمىستىق زورلىق-زومبىلىققا قارسى كۇرەس تۋرالى زاڭنان كەيىن ايەلدەر مەن بالالاردىڭ قۇقىقتارىن قورعاۋ جۇيەسىنىڭ تيىمدىلىگى ايتىلدى.

قۇرىلتاي مۇشەلەرى بيىلعى جىلدىڭ ماڭىزدى وقيعالارى رەتىندە مەملەكەتتىك ەگەمەندىكتىڭ 35 جىلدىعىنا, كونستيتۋتسيانىڭ 30 جىلدىعىنا, جەڭىستىڭ 80 جىلدىعىنا جانە ابايدىڭ 180 جىلدىعىنا ەرەكشە باسىمدىق بەردى.

سونىمەن قاتار, قۇرىلتاي مۇشەلەرىنە ۇلتتىق قۇرىلتايدىڭ ءۇشىنشى وتىرىسىندا پرەزيدەنت ق.توقاەۆتىڭ ەنەرگەتيكا, كولىك, تۇرعىن ءۇي قۇرىلىسى جانە گازداندىرۋ سالالارىنداعى كەڭ كولەمدى ينفراقۇرىلىمدىق باستامالارىن ىسكە اسىرۋ ناتيجەلەرى تۋرالى اقپارات بەرىلدى. اتاپ ايتقاندا, وتكەن جىلى 2029 جىلعا دەيىنگى ۇلتتىق ينفراقۇرىلىمدىق جوسپار قابىلداندى. ونىڭ اياسىندا جالپى قۇنى 40 ترلن تەڭگەدەن اساتىن 200-دەن استام جوبا ىسكە اسىرىلماق.

سەكتسيا جۇمىستارى ءونىمدى ديالوگ فورماتىندا ءوتىپ, ۇلتتىق قۇرىلتاي مۇشەلەرى وزدەرىنىڭ جاڭا باستامالارىن ارىپتەستەرىمەن جانە مۇددەلى مەملەكەتتىك ورگاندارمەن تىكەلەي تالقىلادى.

جالپى, جۇمىس سەكتسيالارىنىڭ قاتىسۋشىلارى ۇلتتىق قۇرىلتايدىڭ ءۇش جىل ىشىندە يدەيالاردى ۇسىنۋ جانە قوعامنىڭ بىرلىگىن نىعايتۋعا باعىتتالعان ستراتەگيالىق قادامداردى قالىپتاستىرۋدىڭ باستى ينستيتۋتىنا اينالعانىن اتاپ ءوتتى.