«Qazaqstan» ورتالىق كونتسەرت زالىندا ايگىلى «Gulder» ءانسامبلىنىڭ 55 جىلدىق مەرەيتويىنا ارنالعان گالا-كونتسەرت ءوتتى. كەش باعدارلاماسىندا ارنايى ازىرلەنگەن ەكسكليۋزيۆتى اسپاپتىق-حورەوگرافيالىق قويىلىمدار مەن جاڭا حورەوگرافيالىق كومپوزيتسيانىڭ تۇساۋكەسەرى, اۆتورلىق اندەر, تانىمال ارتىستەرمەن ۇتىمدى كوللابوراتسيا, سونداي-اق كلاسسيكالىق ونەردىڭ جاڭا ينتەرپرەتاتسياسى ۇسىنىلدى.
كونتسەرتتى مادەنيەت جانە اقپارات ءمينيسترى ايدا بالاەۆانىڭ قۇتىقتاۋ حاتىمەن ۆيتسە-مينستر ايبەك سىدىقوۆ اشىپ بەردى.
«جارتى عاسىردان استام ۋاقىت ىشىندە ونەر ۇجىمى قازاق مادەنيەتىنىڭ جارىق جۇلدىزىنا اينالىپ, ۇلتتىق ونەردى الەمگە تانىتۋدا ماڭىزدى ءرول اتقاردى. سىزدەر حالىقتىق بي ونەرىنىڭ ەڭ ۇزدىك داستۇرلەرىن ساقتاپ, ونى ۇرپاقتان-ۇرپاققا جەتكىزىپ كەلەسىزدەر. قازاق مادەنيەتىنىڭ اجىراماس بولىگى رەتىندە انسامبل ەسترادانىڭ دامۋىنا زور ۇلەس قوستى. بۇگىنگى تاڭدا «گۇلدەر» ءانسامبلى تەك ەلىمىزدە عانا ەمەس, حالىقارالىق دەڭگەيدە دە كەڭىنەن تانىلىپ, ءوزىنىڭ ەرەكشە ورىنداۋشىلىق شەبەرلىگىمەن مويىندالۋدا. سىزدەردىڭ ساحناداعى ءاربىر ونەر كورسەتۋ ەرەكشەلىكتەرىڭىز كورەرمەندەرگە ەستەتيكالىق ءلاززات سىيلاپ, قازاق مادەنيەتىنىڭ باي مۇراسىن كورسەتىپ, ونىڭ ماڭىزدىلىعىن ايقىندايدى, – دەلىنگەن قۇتتىقتاۋ حاتتا.
كورەرمەنىنە تاماشا تارتۋ بولعان مەرەيتويلىق كونتسەرتتە قازاقستاننىڭ حالىق ءارتىسى روزا رىمباەۆا, قازاقستاننىڭ ەڭبەك سىڭىرگەن ءارتىسى ايجان نۇرماعامبەتوۆا, قازاقستاننىڭ ەڭبەك سىڭىرگەن قايراتكەرلەرى جەڭىس سەيدوللا ۇلى, ايگۇل ەلشىباەۆا, «دارىن» مەملەكەتتىك جاستار سىيلىعىنىڭ لاۋرەاتتارى الىبەك الماديەۆ, ءادىلحان ماكين, رەسپۋبليكالىق جانە حالىقارالىق بايقاۋلاردىڭ لاۋرەاتتارى جانار دوعالوۆا, ءمادي رىمباەۆ, قۋاندىق شالقار, مەرۋەرت باقىت, «استانا سازى» قازاق مەملەكەتتىك فولكلورلىق ءانسامبلى, «Astana musical» مەملەكەتتىك تەاترى, «Turan» ەتنو-فولكلورلىق ءانسامبلى, «سامعا» توبى جانە «Gulder» ءانسامبلى ونەر كورسەتتى.