ەسىمى ەلگە تانىمال تەاتر جانە كينو رەجيسسەرى, كينودراماتۋرگ, قازاقستاننىڭ حالىق ءارتىسى تالعات تەمەنوۆتىڭ «اي استىنداعى اڭگىمە» اتتى كىتابى وقىرمانىمەن قاۋىشتى. اۆتوردىڭ كەيىنگى جىلداردا جازىلعان ەسسەرلەرى مەن وچەركتەرى, سۇحباتتارى توپتاستىرىلعان جيناقتىڭ تانىستىرىلىمى ەلورداداعى ۇلتتىق اكادەميالىق كىتاپحانادا ءوتتى.
«باسقالاردى بىلمەيمىن, ءوزىم تۋرالى بىردەڭە جازۋ قيىننىڭ قيىنى ەكەن. ىشتەي قانشاما ۋاقىت دايىندالعانمەن, ءبارىبىر بولمايتىن سياقتى. اسىرەلەتىپ جازسام, ماقتانشاقتىق بولادى. ال بىرەۋگە قولۇشىن بەرىپ, بىردەڭە ىستەگەنىمدى قاعازعا تۇسىرمەسەم, ول دا دۇرىس بولمايتىن سەكىلدى. دەيتۇرعانمەن, نارتاۋەكەل...» دەپ باستالعان كىتاپ القيسساسىنان-اق اتالعان جيناقتىڭ اۆتورعا قانشالىقتى قۇندى ەكەندىگىن تۇيسىنۋگە بولاتىنداي. ال ونەرسۇيەر وقىرمان ءۇشىن ونىڭ باعاسى ءتىپتى تەڭدەسسىز. مەملەكەت جانە قوعام قايراتكەرى يمانعالي تاسماعامبەتوۆتىڭ العىسوزىمەن جارىق كورگەن جيناق «ۇنجارياداعى ۇتقىر ويلار», ء«ومىر سۋرەتكەرلەرى تۋرالى تولعانىس» جانە ء«ومىردىڭ ءوزى – پەسا» اتتى ءۇش بولىمگە توپتاستىرىلىپتى. ءار تاراۋ تانىمدىق ءھام تاعىلىمدىق تۇرعىدان مازمۇندىق مانگە باي.
اقىن, جازۋشىلار وداعىنىڭ استانا فيليالىنىڭ باسشىسى باۋىرجان باباجان ۇلى تىزگىندەگەن جيىنعا عالىم جايلىباي, ءاليحان بايمەنوۆ, دارحان قىدىرالى, امانگەلدى كەڭشىلىك ۇلى, تالعات باتىرحان, قۇدايبەرگەن تۇرسىن, ساۋلەبەك اسىلحان, نۇرلان ونەرباەۆ, گۇلجان اسپەتوۆا, جانات چايكينا, سەرىكزات دۇيسەنعازى, قالقامان سارين سىندى ادەبيەت پەن ونەر مايتالماندارى قاتىسىپ, رەجيسسەردىڭ جاڭا جيناعى تۋرالى جىلى لەبىزدەرىن ءبىلدىردى.
«كىتاپ اتاۋىنىڭ ءوزى-اق وقىرماندى ايرىقشا قىزىقتىرادى. رومانتيكالىق لەپ ەسىپ تۇر. جالپى, قولىمىزداعى بۇل كىتاپ پەن تالعات دەگەن ەسىمنىڭ اراسىندا دا ايرىقشا ءبىر ۇندەستىك بار سەكىلدى. اراب تىلىنەن اۋدارعاندا «تالعات» ەسىمىنىڭ ءوزى «اي استىنداعى ادام» دەگەن ماعىنانى بىلدىرەدى ەكەن, ياعني «اي استىنداعى ادامنىڭ» «اي استىنداعى اڭگىمەسى» دە اسەرلى بولارىنا سەنەمىز. رومانتيك تالعات دوسىمعالي ۇلىن بولاشاقتا رومانيست رەتىندە تانىپ جاتساق, تاڭعالمايمىز», دەگەن پارلامەنت سەناتىنىڭ دەپۋتاتى, اكادەميك دارحان قىدىرالىنىڭ جۇرەكجاردى لەبىزىن ادەبيەت سىنشىسى امانگەلدى كەڭشىلىك ۇلى ءارى قاراي جالعادى: «تالعات اعامەن مەنىڭ ەڭ العاشقى تانىستىعىم «گۇلناز» حيكاياتىن وقۋ ارقىلى باستالعان ەدى. وسى پوۆەستەن كەيىن قازاق ادەبيەتىنە عاجاپ جازۋشى كەلگەن ەكەن دەپ ويلادىم. بىراق ول كىسىنىڭ, شىنى كەرەك, كينو سالاسىندا جۇرگەنىن بىلمەدىم. «گۇلنازدى» وقىپ وتىرىپ ريزا بولعانىم, ول كىسىنىڭ اڭگىمەلەۋ شەبەرلىگى, وقيعانى جەتكىزۋدەگى مودەرنيستىك تاسىلدەرى, كەيىپكەرىن ونىڭ پسيحولوگياسى ارقىلى تەرەڭنەن اشۋ فورمالارى مەنى تاڭ-تاماشا قالدىردى. كەيىن مولدىرەتىپ جازعان ەسسەلەرىن وقىپ, ماقالاسىنىڭ ىشىندە ليريكالىق شەگىنىستەر مەن پسيحولوگيالىق يىرىمدەردى شەبەر ۇستاي وتىرىپ, كەيىپكەرىنىڭ مىنەز-بولمىس ەرەكشەلىكتەرىن اشۋداعى شەبەرلىگىنە باس ءيدىم. ءوزىم دە ەسسەيست بولعاننان كەيىن ماعان جازۋداعى بۇل تاسىلدەر ايرىقشا اسەر ەتتى», دەپ ءسوزىن تۇيىندەدى سىنشى.
راسىمەن دە رەجيسسەر تالعات تەمەنوۆتىڭ كينو مەن تەاتر عانا ەمەس, جازۋ سالاسىنداعى سۇبەلى ەڭبەگى دە اۋىز تولتىرىپ ايتۋعا, ىرگەلى زەرتتەۋلەرگە ارقاۋ ەتۋگە تۇرارلىق قۇندى دۇنيە ەكەنى ءسوزسىز. ونى قولىڭىزىداعى «اي استىنداعى اڭگىمە» جيناعى تاعى ءبىر مارتە دالەلدەي تۇسەدى.