بىلتىر كوكتەمدە اقش-تىڭ لاس-ۆەگاس قالاسىندا اسا جەڭىل سالماقتاعى بەكزات الماحان UFC-دەگى تۇساۋكەسەر كەزدەسۋىن ۋمار نۇرماعومەدوۆقا قارسى وتكىزدى. قارسىلاسى تىم ازۋلى بولعانىنا قاراماستان قازاقتىڭ قايسار ۇلىنىڭ ونەر جاقسى اسەر قالدىردى. قانداسىمىز داعىستاننىڭ تۋماسىنا لايىقتى قارسىلىق كورسەتىپ قانا قويماي, ءبىرىنشى راۋندتا ونى سۇلاتىپ سالۋعا شاق قالدى.
كوپشىلىكتىڭ ەسىندە قالعان بۇل جەكپە-جەككە بەكزات جاراقاتپەن شىققانىن بىرەۋ-بىلسە, بىرەۋ بىلمەۋى مۇمكىن. جانە دە ونى بىردەن تىم مىقتى قارسىلاسقا قارسى قويدى. ۋمار – داڭقتى نۇرماعومەدوۆتەر اۋلەتىنىڭ مۇشەسى. سول كۇنگە دەيىن ول 16 كەزدەسۋىنىڭ بارلىعىندا جەڭىسكە جەتتى. UFC-گە كەلگەن بەتتە ءتورت قارسىلاسىن سۇلاتىپ سالدى. جۋىردا عانا اۆار ۇلتىنىڭ وكىلى الەمدەگى ەڭ بەلدى پروموۋشەننىڭ چەمپيوندىق بەلبەۋى ءۇشىن گرۋزيالىق مەراب دۆاليشۆيليمەن جەكپە-جەككە شىعۋى دا ونىڭ قانداي دەڭگەيدەگى تۇلعا ەكەنىن اڭعارتسا كەرەك. بىراق الماحان ودان ەش قايمىققان جوق. اتاعى جەر جارعان ءحابيبتىڭ ىنىسىمەن تەڭ دارەجەدە ايقاسىپ, ءوزىنىڭ الەۋەتى زور سپورتشى ەكەنىن بايقاتتى. دەسەك تە جەڭىس ۋماردىڭ ۋىسىندا كەتتى.
سودان بەرى ءبىر جىلعا جۋىق ۋاقىت وتسە دە, بەكزات الماحاندى ايقاس الاڭىنان كورە المادىق. سويتسەك, ول جانىن جەگىردەي جەگەن جاراقاتىمەن الىسىپ الەك بولىپ جۇرگەن ەكەن. ۇزاق ۋاقىت بويى ەم-دوم قابىلداپ, ەندى عانا قاتارعا قوسىلدى. كۇنى كەشە عانا بەكزاتتىڭ قايتا وكتاگونعا شىعاتىنى بەلگىلى بولدى. ول 11 مامىردا كانادانىڭ مونرەال قالاسىندا وتەتىن UFC 315 تۋرنيرىندە ونەر كورسەتەدى. قارسىلاسى – كانادالىق برەد «سۋپەرمەن» كاتونا. ال ول سپورتشى جايىندا ءبىز نە بىلەمىز؟
33 جاستاعى برەد كانادادا دۇنيەگە كەلگەنىمەن, قازىرگى كەزدە يرلانديادا تۇرىپ جاتىر. ول جاستايىنان كۇرەس, بوكس جانە برازيليالىق دجيۋ-دجيتسۋمەن شۇعىلداندى. ارالاس جەكپە-جەكتەگى مانسابىن 2014 جىلى باستادى. سول ارالىقتا 20 كەزدەسۋ وتكىزىپ, 16 رەت جەڭىسكە جەتتى. دۋبليندەگى SBG Ireland زالىندا اتىشۋلى كونور ماكگرەگورمەن ءبىر زالدا جاتتىعاتىن «سۋپەرمەن» The Ultimate Fighter تۋرنيرىندە ەكى مارتە توپ جارىپ, UFC-گە قابىلداندى. 2021 جىلدىڭ 11 ناۋرىزىندا باحرەيننىڭ BRAVE پروموۋشەننىڭ چەمپيونى اتاندى.
ءوز كارەراسىندا برەد كاتونا تالاي دۇلەي كۇش يەلەرىمەن كۇش سىناستى. 2019 جىلى مەراب دۆاليشۆيليمەن ايقاسقانىنىڭ ءوزى نەگە تۇرادى. UFC-ءدىڭ بولاشاق چەمپيونىنان ول ۇپاي سانىمەن عانا ۇتىلدى. 2021 جىلى ۇيەڭكى جاپىراقتار ەلىنىڭ وكىلى الماتىدا ۇيىمداستىرىلعان BRAVE تۋرنيرىندە رەسەيلىك باير شتەپيندى ساباپ تاستاعانىن كوزىمىز كوردى. بىلتىر «سۋپەرمەن» ءۇش رەت وكتاگونعا شىقتى. لۋيسۆيللدە ول دجەسسي باتلەردى جەڭسە, تورونتو مەن لاس-ۆەگاستا گاررەتارمفيلد پەن جەان ماتسۋموتاعا ەسە جىبەردى. بۇل باسەكەلەردىڭ بارلىعى دا اياعىنا دەيىن سوزىلىپ, قورىتىندى شەشىمدى تورەشىلەر شىعاردى. مىنە, ەندى كاتونا قازاقتىڭ ۇلى بەكزات الماحانعا قارسى شىعادى.