ورالداعى نازارباەۆ زياتكەرلىك مەكتەبىنىڭ وقۋشىلارى ەلدىڭ اتىنان روبوتتەحنيكا بويىنشا الەمدىك بايقاۋعا بارادى. الماتى قالاسىندا «Almaty Tech Cup 2025» اتتى ورتالىق ازياداعى روبوتتەحنيكا جانە دروندار چەمپيوناتى اياقتالدى. وعان 10-نان اسا ەلدەن 3 مىڭنان استام بالا قاتىستى.
چەمپيوناتتىڭ «FLL» باعىتىنداعى ورال نازارباەۆ زياتكەرلىك مەكتەبىنىڭ «Tidal Tumble» كومانداسى «Robot Design» ساناتىندا جەڭىمپاز اتاندى. ولار ەندى اۋستراليانىڭ سيدنەي قالاسىندا وتەتىن «Asia Pacific Open First Championship 2025» حالىقارالىق جارىسىنا بارادى.
قازىلار نزم وقۋشىلارى جاساعان روبوت ديزاينىن جوعارى باعالاعان. ويتكەنى ول جوبانىڭ يننوۆاتسيالىق شەشىمدەرى ەرەكشە بولىپتى. «ورالدىق وقۋشىلاردىڭ تەحنيكالىق ءبىلىمى, شىعارماشىلىق قابىلەتى جانە كوماندالىق جۇمىسى جوعارى دەڭگەيدە», دەيدى قازىلار.
«Asia Pacific Open First Championship 2025» – روبوتتەحنيكا سالاسىنداعى ەڭ بەدەلدى حالىقارالىق جارىستىڭ ءبىرى. بۇل سايىسقا الەمنىڭ ءار تۇكپىرىنەن ۇزدىك كوماندالار قاتىسىپ, ءوز جوباسىن ۇسىنادى. نازارباەۆ زياتكەرلىك مەكتەبىنىڭ جەڭىمپاز كومانداسى ەندى ەل نامىسىن الەمدىك دەڭگەيدە قورعاۋعا دايىندالىپ جاتىر.
«بۇل جەڭىس وقۋشىلاردىڭ قاجىرلى ەڭبەگىمەن, جەتەكشىلەرىنىڭ كاسىبي دايىندىعىمەن كەلدى. سونىمەن بىرگە اتالعان زياتكەرلىك مەكتەپتە «STEM» ءبىلىم ساپاسى جوعارى ەكەنىن دالەلدەيدى», دەيدى ورال قالاسىنداعى فيزيكا-ماتەماتيكا باعىتىنداعى نزم ءباسپاسوز حاتشىسى گۇلناز نۇعمانقىزى.
باتىس قازاقستان وبلىسى