وڭىردەگى بىرنەشە اۋداندا جاسىل ەنەرگياعا كوشۋ باعىتىندا اۋقىمدى جوبالار اتقارىلىپ جاتىر. ينۆەستورلاردى تارتۋ مەن مەملەكەتتىك دەڭگەيدەگى قولداۋدىڭ ارقاسىندا قازىر وبلىستا جالپى قۋاتى 571,3 مۆت-نى قۇرايتىن 22 جەك نىسانى جۇمىس ىستەپ تۇر.
«باستاپقىدا جالپى قۋاتى 2 مۆت قۇرايتىن 2 جەك نىسانى پايدالانۋعا بەرىلسە, ۋاقىت وتە كەلە بۇل كورسەتكىش ايتارلىقتاي ەسەلەندى. 2015 جىلى جالپى قۋاتى 114 مۆت قۇرايتىن نىسان سانى 9, ال 2021 جىلى جالپى قۋاتى 387,8 مۆت قۇرايتىن نىسان سانى 17-گە جەتكىزىلدى. 2024 جىلى ستانسالاردىڭ سانى 22-گە جەتىپ, ەنەرگەتيكالىق قۋات 571,3 مۆت بولدى», دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى عالىم يساقوۆ.
رەسمي مالىمەتكە سۇيەنسەك, ەل بويىنشا 150-گە جۋىق جاڭارتىلعان ەنەرگيا كوزدەرىن وندىرەتىن نىسان بار بولسا, ونىڭ 22-ءسى جامبىل وڭىرىندە ورنالاسقان. ۋاقىت سۇرانىسى قاي كەزدە دە نازاردان تىس قالعان ەمەس. ناقتىراق ايتساق, جۇمىسىن ەرتە باستاعان «Burnoe Solar-1», «Burnoe Solar-2» ستانسالارىنىڭ جۇمىسى ءبىر جۇيەگە تۇسكەن. جاۋاپتى باسقارما وكىلدەرى كەلتىرگەن دەرەككە سەنسەك, كۇننەن ەلەكتر ەنەرگياسىن وندىرەتىن بۇل نىساندار ورتالىق ازياداعى ءىرى ستانسالار ساناتىنا جاتادى.
«وڭىردە جۇمىس ىستەپ تۇرعان 22 جەك نىسانىنىڭ 6-ۋى سۋ ەلەكتر ستانساسى بولسا, 10 نىسان جەلدەن, قالعان 6 نىسان كۇننەن ەلەكتر ەنەرگياسىن وندىرەدى. وبلىس اۋماعىنداعى جەل ەلەكتر ستانسالارىنان – 275,65 مۆت, كۇن ەلەكتر ستانسالارىنان – 271,25 مۆت, سۋ ەلەكتر ستانسالارىنان 24,4 مۆت ەنەرگيا ءوندىرىلىپ جاتىر», دەيدى باسقارما باسشىسى.
الداعى جىلى جامبىل وبلىسىندا «Masdar» كومپانياسىنىڭ ۇيىتقى بولۋىمەن جالپى قۋاتى 1 گۆت-نى قۇرايتىن جەل ەلەكتر ستانساسىنىڭ قۇرىلىسى باستالۋعا ءتيىس. جىل باسىندا كومپانيا وكىلدەرىمەن كەزدەسكەن ءوڭىر باسشىسى ەربول قاراشوكەەۆ جوبانى جۇزەگە اسىرۋ بويىنشا جەرگىلىكتى اتقارۋشى بيلىك تاراپىنان جان-جاقتى قولداۋ كورسەتىلەتىنىن ايتقان بولاتىن.
جاقىندا ابۋ-دابيگە جۇمىس ساپارىمەن بارعان مەملەكەت باسشىسى قاسىم-جومارت توقاەۆ «Masdar» كومپانياسى مەن قازاقستان اراسىنداعى سەرىكتەستىك جاڭا دەڭگەيگە كوتەرىلگەنىن ايتىپ وتكەن ەدى. سونداي-اق پرەزيدەنت كومپانيا وكىلدەرىمەن جامبىل وبلىسىندا جالپى قۋاتى 1 گۆت قۇرايتىن جەل ەلەكتر ستانساسىنىڭ قۇرىلىسىن جۇزەگە اسىرۋعا قاتىستى كەلىسىم جاسالعانىن دا مالىمدەدى. بۇل ءىرى جوباعا 1,4 ملرد دوللار كولەمىندە ينۆەستيتسيا سالىنباق.
جوعارىدا ايتىلعان جەل ەلەكتر ستانساسى سالىنعان جاعدايدا جامبىل وبلىسى جاڭارتىلعان ەنەرگيا كوزدەرىن ءوندىرۋ بويىنشا لوكوموتيۆ وڭىرگە اينالماق. 2024 جىلدىڭ العاشقى 10 ايىنىڭ وزىندە جەك نىساندارىنان ساعاتىنا 588,4 ملن كۆت ەلەكتر ەنەرگياسى وندىرىلگەن. جاۋاپتى باسقارما باسشىلىعى كەلتىرگەن دەرەككە زەر سالساق, 2021 جىلى سالىنعان «جاڭاتاس» جەل ەلەكتر ستانساسىنىڭ دا جۇمىسى ءبىر ارناعا تۇسكەن. جالپى قۇنى 49 ملرد تەڭگەنى قۇرايتىن نىساننىڭ جىلدىق ءوندىرىس قۋاتى – 100 مۆت. سونىمەن قاتار جامبىل اۋدانى اۋماعىندا جىلدىق قۋاتى 50 مۆت بولاتىن «AEC ASA» كۇن ەلەكتر ستانساسى, تالاس اۋدانىندا جالپى قۋاتى 13,5 مۆت بولاتىن «شەڭگەلدى», «شەڭگەلدى-2», «نوۆاتەكس جەس» جەل ەلەكتر ستانساسى جوباسى جۇزەگە اسىرىلدى.
جامبىل وبلىسى