مەملەكەت باسشىسى باستاماشى بولعان «جايلى مەكتەپ» ۇلتتىق جوباسى اياسىندا قىزىلوردا وبلىسىندا 21 مەكتەپ بوي كوتەرەدى. ۇلتتىق جوبا شەڭبەرىندە سالىنعان 2700 ورىندىق 5 مەكتەپ پايدالانۋعا بەرىلدى. كەلەسى وقۋ جىلىنا دەيىن تاعى بەسەۋى ەسىگىن ايقارا اشادى. ءبىلىم بەرۋمەن قاتار وقۋشىلاردىڭ جان-جاقتى دامۋىنا بار جاعداي جاسالعان وسىنداي ءبىلىم وشاقتارىنىڭ ەكەۋى وبلىس ورتالىعىنان ورىن تەپكەن.
باق وكىلدەرىنە ارنالعان ءباسپاسوز تۋرى اياسىندا وبلىس ورتالىعىنداعى وسى مەكتەپتەر جايىمەن تانىستىق. قالانىڭ سول جاعالاۋ بولىگىندە 900 بالاعا ارنالىپ اشىلعان №290 ورتا مەكتەپتە قازىر 1000-نان اسا وقۋشى ءبىلىم الىپ ءجۇر.
بالالاردىڭ قاۋىپسىزدىگى ءۇشىن بەينەكامەرامەن جابدىقتالىپ, تۋرنيكەت قويىلعان مەكتەپتە باستاۋىش, ورتا جانە جوعارى سىنىپ وقۋشىلارى ءۇش بلوكتا ءبىلىم الادى. فيزيكا, حيميا, بيولوگيا, روبوتتەحنيكا كابينەتتەرى بالانى ەرتە باستان عىلىمعا باۋلۋ ءۇشىن سوڭعى ۇلگىدەگى زاماناۋي قۇرىلعىلارمەن جابدىقتالىپتى. ولاردىڭ مەكتەپتە ءجۇرىپ-اق, بەلگىلى ءبىر كاسىپ ءتۇرىن مەڭگەرۋىنە تىگىن, ديزاين, تەحنولوگيا كابينەتتەرىندەگى قۇرال-جابدىقتار دا ۇلكەن سەپتىگىن تيگىزەدى.
«جايلى مەكتەپتىڭ نەگىزگى ماقساتى ساپالى ءبىلىم مەن ونەگەلى تاربيە بەرۋ ارقىلى ىزگىلىكتىڭ ورداسىنا اينالۋ دەسەك قاتەلەسە قويماسپىز. بالالاردىڭ مەكتەپكە قۋانىپ كىرگەنىن كورۋدىڭ ءوزى ءبىر باقىت قوي. ءبىز شاكىرتتەرىمىزدى عىلىمعا باۋلۋمەن قاتار, ولاردىڭ كاسىبي باعدار الۋىنا دا ءمان بەرەمىز. تاڭەرتەڭ وقىپ, تۇستەن كەيىن ءتۇرلى ۇيىرمەلەردەن قالمايتىن وقۋشىلارىمىزدىڭ تالابى قۋانتادى. 3D مودەلدەۋ, «AutoCAD» باعىتىنداعى جوبالار جاساپ جۇرگەن بالالارىمىز دا بار», دەيدى مەكتەپ ديرەكتورى ءمولدىر سماحانوۆا.
ءار قاباتتاعى كوۆوركينگ الاڭدارى بالالاردىڭ شىعارماشىلىقپەن اينالىسىپ, اقىل-ويىن ۇشتاۋدىڭ ۇلكەن مۇمكىندىگى. ءبىز بارعاندا ولاردىڭ ءبىرى بەستاس ويناپ, كەيبىرى سۋرەت سالىپ جاتتى. وسى الاڭداردا ۇلتتىق ويىندار مەن ءتۇرلى بايقاۋلار ۇيىمداستىرىلادى.
ينكليۋزيۆتى ءبىلىم الاتىن شاكىرتتەر ءۇشىن دە بار جاعداي جاسالعان. ءار بلوكتىڭ سپورت زالدارىنداعى قۇرىلعىلاردى جىلجىتىپ قويۋعا بولادى.
«بەينەلەۋ ونەرى» بولمەسىندەگى بالالار جاساعان ءمۇسىن كوزدىڭ جاۋىن الادى. داۋرەن جۇسىپباەۆ جەتەكشىلىك ەتەتىن ۇيىرمە وقۋشىلارى ۇلتتىق ناقىشتاعى شاحمات تاستارىن ازىرلەپ جاتىر ەكەن. وسىندا وتەتىن گرافيكا جانە جوبالاۋ ساباعىندا وقۋشىلار 3D مودەلدەۋگە بەيىمدەلەدى. جۋىردا وقۋشىلار وزدەرى جوبالاپ, وسىنداعى قۇرىلعىلار كومەگىمەن جاساعان بۇيىمدارىن جارمەڭكەگە قويىپ, ودان تۇسكەن قارجىنى جاعدايى تومەن وتباسىلار قاجەتىنە جۇمساپتى.
«تاماقتانۋ مادەنيەتى» كابينەتى وقۋشى قىزداردىڭ كەلەشەگىنە جارايتىن ءتالىم بەرەدى. وسىندا مەكتەپتەگى «اجەلەر مەكتەبىنىڭ» مۇشەلەرى شاكىرتتەردى ۇلتتىق تاعامداردى دايىنداۋعا باۋلىپ ءجۇر.
جىل باسىندا ۇلتتىق جوبا اياسىندا كبي شاعىن اۋدانىنان تاعى ءبىر مەكتەپ پايدالانۋعا بەرىلدى. قازىر 600 وقۋشىعا ارنالعان ءبىلىم وشاعىندا 1051 بالا ءبىلىم الىپ جاتىر. بۇرىنعى №197 مەكتەپتىڭ ورنىنا جاڭا نىسان بوي كوتەرگەندە, وسى اۋدان تۇرعىندارىنىڭ قۋانىشىندا شەك بولعان جوق.
«جاڭا عيمارات وقۋشىلارمەن قاتار ۇستازدارعا دا تاجىريبەسىن بايىتاتىن ءىس-شارالار وتكىزىپ, ءبىلىمى مەن بىلىگىن تولىق تانىتۋعا مۇمكىندىك بەرىپ وتىر. وسىندا كوشىپ كەلگەلى 138 ورىندىق ءماجىلىس زالىندا شاكىرتتەرىمىز دە ءبىلىم مەن تاربيەگە قاتىستى ءتۇرلى كەشتەر ۇيىمداستىرىپ, ەرەكشە قۇلشىنىپ ءجۇر. ولار ەندى بۇرىنعىداي ۇيىرمە ىزدەپ, الىسقا سابىلمايدى. مەكتەپتەگى سپورت, قولونەر, سۋرەت, دومبىرا, بي ۇيىرمەلەرىنىڭ بىرىنە بارادى. كىتاپحانا قورى دا باي. حيميا, فيزيكا, بيولوگيا كابينەتتەرى جوعارى دەڭگەيدە جابدىقتالعان. مۇمكىندىگى شەكتەۋلى بالالارمەن بولەك بلوكتاعى كابينەتتەردە دەفەكتولوگ, لوگوپەد, پسيحولوگ, الەۋمەتتىك-پەداگوگ ماماندار جۇمىس ىستەيدى», دەدى مەكتەپ ديرەكتورى ەركىن اقشالوۆ.
قىزىلوردا