باتىس قازاقستان وبلىسىندا «اقجايىق» فۋتبول كلۋبى تاراتىلىپ, ورنىنا «جايىق» اتتى جاڭا كلۋب قۇرىلادى. بۇل جونىندە وبلىستىق دەنە شىنىقتىرۋ جانە سپورت باسقارماسى حابارلادى.
وتكەن جىلى «اقجايىق» فۋتبول كلۋبى بورىشكەرلەر تىزىمىنە ەنىپ, باسىنان داۋ كەتپەدى. كلۋب مەملەكەتتىك ساتىپ الۋ راسىمدەرىنە قاتىسا الماي, 36 قىزمەتكەر 2024 جىلدىڭ قاڭتار-قازان ايلارى ارالىعىندا جالاقىسىن دا الا الماعان. مەملەكەتتىك ەڭبەك ينسپەكتسياسى كوميتەتىنىڭ بقو دەپارتامەنتى قارىزدىڭ جالپى كولەمى 65,2 ميلليون تەڭگەگە جەتكەنىن ايتادى.
«اقجايىق» كلۋبىنىڭ قۇرىلتايشىلارىنا 10 اقپانعا دەيىن دەمەۋشىلەر مەن ينۆەستورلار ەسەبىنەن ماسەلەنى شەشۋگە ۋاقىت بەرىلگەنىمەن, جاعداي رەتتەلمەدى. وسىعان بايلانىستى وبلىس اكىمدىگى جەدەل شارا قاراستىرىپ, «جايىق» فۋتبول كلۋبىن قۇرۋ تۋرالى شەشىم قابىلدادى», دەدى باسقارما باسشىسى باقداۋلەت ءسابيتوۆ كلۋب مۇشەلەرىمەن بولعان كەزدەسۋدە.
جاڭادان قۇرىلاتىن «جايىق» فۋتبول كلۋبى بۇرىنعى «اقجايىق» ويىنشىلارى مەن جاتتىقتىرۋشىلارىنىڭ جالاقى قارىزدارىن تولەۋدى ءوز مىندەتىنە الدى. الداعى ماۋسىمدا «جايىق» ەل چەمپيوناتىنىڭ ەكىنشى ليگاسىندا ونەر كورسەتەدى. سونىمەن قاتار كلۋبتىڭ جاستار قۇراماسى QJ League (قازاقستاننىڭ جاسوسپىرىمدەر ليگاسى) تۋرنيرىنە قاتىسۋى مۇمكىن. كلۋبتىڭ العا قويعان نەگىزگى ماقساتىنىڭ ءبىرى – بالالار مەن جاسوسپىرىمدەر فۋتبولىن دامىتۋعا ەرەكشە نازار اۋدارۋ.