مەملەكەت باسشىسى ن.نازارباەۆ تاياۋ جىلدارى قازاقستان حالقىن 20 ميلليونعا جەتكىزۋ مىندەتىن قويىپ, الداعى ماقساتقا جەتۋ جولدارىن بەلگىلەپ بەرگەنى وزىمىزگە بەلگىلى. وكىنىشتىسى سول, قىزىلجار وڭىرىندە بالا تۋ جايى ءالى كوڭىل كونشىتپەيدى. ءسابيلەردىڭ كۇلكىسى ءجيى ەستىلەتىن ماڭعىستاۋ وبلىسىندا ءار 1000 ادامعا شاققاندا 23 بالادان اينالسا, قىزىلجار وڭىرىندە ەكى ەسەدەي از, رەسپۋبليكالىق ورتا كورسەتكىشتەن كوپ تومەن. 2008 جىلى 9085 ءسابي دۇنيەگە كەلسە, بىلتىر بۇل سان 8797-گە دەيىن كەمىپ كەتكەن.
جاس انالاردىڭ بالا سانىن الاڭسىز كوبەيتۋىنە قامقورلىق جاساۋ ءبىرىنشى كەزەكتەگى ماسەلە ەكەنى ايتپاسا دا تۇسىنىكتى. وبلىستىق اكىمدىكتە “ۇرپاق قورى” اتتى باعدارلامانىڭ تانىستىرىلىمى وتكەن راسىمدە جاس وتباسىلاردى “بالالى ءۇي — بازارعا” اينالدىرۋدىڭ جولدارى جان-جاقتى ءسوز بولدى. ايماق باسشىسى سەرىك ءبىلالوۆتىڭ باستاماسىمەن ەلىمىزدە العاش رەت قولعا الىنىپ وتىرعان جاڭا باعدارلاما تۋرالى وبلىس اكىمىنىڭ ورىنباسارى فارحاد قۋانعانوۆ بايانداپ بەردى. تۇساۋى كەسىلگەن پيلوتتىق جوبانىڭ نەگىزگى ماقساتى – ءتورت جانە ودان دا كوپ بالاسى بار وتباسىلارداعى كامەلەتكە تولماعان ءار سابيگە بانكتە 1,5 مىڭ دوللار ءمولشەرىندە دەپوزيت اشۋ ماسەلەسىن قاراستىرۋ. ول جىلىنا ون پايىزدىق ءوسىمدى قۇراپ, ءسابي 18 جاسقا تولعاندا جەكە ەسەبىندەگى قارجى 8 مىڭ دوللارعا جەتەتىن بولادى. ول اقشا كامەلەتكە تولعان جاستىڭ وقۋىنا, تۇرعىن ءۇي الۋىنا, تاعى باسقا قاجەتتەرىنە جۇمسالادى. باعدارلاما ءبىرىنشى قىركۇيەكتەن باستاپ جۇزەگە اسىرىلا باستايدى.
جيىندا ءسوز العاندار انا مەن بالانىڭ دەنساۋلىعىن جاقسارتۋ, سابيلەردىڭ ءولىمىن ازايتۋ, ەكىنشى دارەجەلى بانكتەردى تاڭداۋ ماسەلەلەرى جونىندە ءوز ۇسىنىستارىن ورتاعا سالدى. “ۇرپاق قورى” باعدارلاماسىنا قولداۋ ءبىلدىرىلدى.
– بەس جىلعا ارنالعان باعدارلامانىڭ بالا اسىراپ العان وتباسىلارعا دا تىكەلەي قاتىسى بار. مىسالى, ءبىر وتباسى 4 بالا اسىراپ الاتىن بولسا, ارقايسىسىنىڭ ەسەپشوتىنا 1500 دوللار سالىنىپ, جىل سايىن ۇلعايىپ وتىرادى. مۇنىڭ ءوزى جەتىم بالالاردىڭ سانىن ازايتۋعا مۇمكىندىك تۋدىرارى ءسوزسىز. كەيىن مەملەكەتتىك زاكازعا ەنگىزۋگە كۇش سالاتىن بولامىز,— دەدى سەرىك سۇلتانعازى ۇلى باسقوسۋدى تۇيىندەي كەلىپ.
ءومىر ەسقالي, سولتۇستىك قازاقستان وبلىسى.