باتىس قازاقستان وبلىسىنىڭ قاراتوبە اۋدانىندا «اساۋدى قۇرىقتاعان اۋىلىمنىڭ جىگىتتەرى» اتتى اۋدان بىرىنشىلىگى ءوتتى. سايىستا ءار اۋىلدىق وكرۋگتەن سايلانىپ كەلگەن شاباندوزدار شۋ اساۋدى قۇرىقتاپ, باس ءبىلدىرىپ جارىستى.
ۇلتتىق سپورتتىڭ ءبىر ءتۇرى دەرلىك وسىناۋ سايىستى قاراتوبە سپورت كلۋبىنىڭ جەتەكشىسى باۋىرجان شۇرمەن اۋداندا تۇڭعىش رەت ۇيىمداستىرىپ وتىر. جارىسقا باس-اياعى 7 كوماندا قاتىستى. سايىس شارتى بويىنشا ءار كوماندا ءۇش ادامنان قۇرالىپ, بەلگى بەرىلىسىمەن ىسكە كىرىسەدى. ولار ءۇيىرلى جىلقىنىڭ ىشىنەن كورسەتىلگەن اساۋعا قۇرىق تاستاپ, جايداق ءمىنىپ, 3 مينۋت بويى تۇسپەۋگە ءتيىس.
«ادەتتە اساۋدى كۇرتىك قاردا نەمەسە كوكتەمگى توڭ تۇسكەن لايساڭدا ۇيرەتەدى. بۇل جولى ءبارى كوز الدىمىزدا بولسىن دەپ, كەڭ اۋلادا وتكىزدىك. تەبىندە جۇرگەن شۋ اساۋ قىسىراقتىڭ ءۇيىرىن ارنايى ايداتىپ الدىردىق», دەيدى اۋداندىق ىشكى ساياسات ءبولىمىنىڭ باسشىسى نۇرتاس سافۋللين.
اقتايساي اۋىلدىق وكرۋگىنە قاراستى ءايىش قىستاعىندا وتكەن سايىستىڭ ناتيجەسىندە سارالجىن اۋىلىنان كەلگەن جىگىتتەر كومانداسى ءبىرىنشى ورىندى جەڭىپ الدى. جاناس بايمۇقان, مەيىربەك امانتاي, ەراسىل قارابەك ەسىمدى جىگىتتەردەن قۇرالعان توپ 19 سەكۋندتىڭ ىشىندە اساۋدى قۇرىقتاپ, تاقىمعا باسىپ ۇلگەردى. جاناس ماناس ۇلى – كوكپار شاۋىپ جۇرگەن جاس شاباندوز, سايىس تۋرالى حاباردى ەستىپ قالىپ, ورالدان ارنايى جەتىپتى. ول ءۇش مينۋتتىڭ ىشىندە اساۋدىڭ قىتىعىنا ءتيىپ, تۋلاتىپ-موڭكىتسە دە تاقىمىن جازبادى. جەڭىمپازدار 50 مىڭ تەڭگەلىك سەرتيفيكاتقا يە بولدى.
2-ورىن 24 سەكۋندتا اساۋدى تاقىمداعان قاراتوبە اۋدانى ورتالىعى كومانداسىنا بۇيىردى. ولاردان 3 سەكۋند قانا كەشىككەن قالدىعايتى اۋىلىنىڭ شاباندوزدارى 3-ورىنعا تۇراقتادى. بۇل كوماندالار 40, 30 مىڭ تەڭگەنىڭ جۇلدەسىن قانجىعاعا بايلادى.
ايتا كەتەيىك, قاراتوبە سپورت كلۋبىنىڭ جەتەكشىسى باۋىرجان سەرىك ۇلى وڭىردە ات سپورتىنىڭ دامۋىنا ەرەكشە ەڭبەك ءسىڭىرىپ كەلەدى. قازىر اۋداندا كوكپارشىلار كومانداسى قالىپتاسىپ, دوداعا تۇسەر دۇلەي اتتاردى سوناۋ قىرعىز ەلىنەن الدىرا باستاپتى. كەيىنگى كەزدە اۋداندا ءتۇرلى تاقىرىپقا اتتى جورىق, ۇلتتىق سايىس ءجيى ۇيىمداستىرىلىپ ءجۇر.
باتىس قازاقستان وبلىسى