تاراز قالالىق پەريناتالدىق ورتالىعىندا دۇنيە ديدارىن كورگەن نارەستەنىڭ جاعدايى ءماز ەمەس ەدى. جاعدايدىڭ ۋشىققانىن تۇسىنگەن اتا-انانىڭ دەگبىرى قاشتى. ءسابيدىڭ دەرتى اۋىر ەكەنىن تۇسىنگەن دارىگەرلەر ونى ەدەل-جەدەل رەانيماتسيا جانە قارقىندى تەراپيا بولىمىنە اۋىستىرۋ تۋرالى شەشىم قابىلدادى.
دارىگەرلەردىڭ ايتۋىنشا, جاڭا تۋعان نارەستەنىڭ جاعدايى ساعات سايىن ۋشىعا تۇسكەن. ونىڭ تەرىسى قاتايىپ (سكلەرودەرميا), باۋىرى مەن كوك باۋىرى ايتارلىقتاي ۇلكەيگەن ەكەن. كاسىبي ماماندار شۇعىل ىسكە كىرىسسە دە, باستاپقىدا جاعدايدى قالىپقا كەلتىرۋ قيىنعا سوققان. مينۋتتار جىلجىپ, سەكۋندتار سىرعىعان سايىن بالانىڭ ءحالى مۇشكىل بولا تۇسكەن. الايدا ماماندار ىلكى ساتكە دە ءسابي ءومىرى ءۇشىن كۇرەستى توقتاتپاعان.
«جۇرگىزىلگەن زەرتتەۋ جۇمىسىنىڭ ناتيجەسىندە بالادا اۋىر تسيتومەگالوۆيرۋس (تسمۆ) ينفەكتسياسى انىقتالدى. بۇل ينفەكتسيا باۋىردىڭ قىزمەتىن بۇزاتىنى بەلگىلى. ارينە, جاعدايدىڭ ءماز ەمەس ەكەنىن بىردەن تۇسىندىك. جەرگىلىكتى ماماندار مۇنداي كۇردەلى جاعدايمەن بۇرىن-سوڭدى كەزدەسپەگەن ەدى. بىراق قولدان كەلگەنشە كومەك كورسەتتىك. ەش ايانىپ قالعان جوقپىز», دەيدى دارىگەرلەر.
جاعداي تىم كۇردەلى, ءاربىر مينۋت وتە قىمبات ەكەنىن تەرەڭ تۇسىنگەن ماماندار ەمدەۋ شارالارىنا دەرەۋ كىرىسكەن. اق حالاتتى ابزال جانداردىڭ ارەكەتى اۋەلى زايا كەتكەندەي كورىنگەنى دە جاسىرىن ەمەس. ويتكەنى ەم-دوم شارالارى جاسالعانىنا قاراماستان, باستاپقى كۇندەرى ءسابيدىڭ دەنساۋلىعىندا ايتارلىقتاي وڭ وزگەرىس بايقالا قويمادى. بىرنەشە كۇن بويى ءزار شىعارا الماعان نارەستەنىڭ رەانيماتسيادان شىعۋى مۇڭعا اينالدى. ايتكەنمەن سەرتكە بەرىك ماماندار بارلىق قيىندىققا قاراماستان, ونىڭ ءومىرى ءۇشىن كۇرەستى جالعاستىرا بەردى.
«باستاپقىدا قالىپتاسقان جاعداي ءبىر ساتكە بولسىن ءۇمىت ءجىبىن ۇزگەندەي كورىنگەنى راس. الايدا بىرنەشە كۇننەن كەيىن كۇتكەن ناتيجەگە قول جەتكىزدىك. ءسابي ءزار شىعاردى, قان اينالىمى ايتارلىقتاي جاقساردى. ارادا ون كۇن وتكەن سوڭ العاش رەت انا سۇتىمەن قورەكتەندى. سول ساتتە ەڭبەگىمىز اقتالعانىن ايقىن سەزىندىك. بالانىڭ باۋىرىنىڭ قىزمەتى بىرتىندەپ قالپىنا كەلىپ, كوپ ۇزاماي جاساندى تىنىس الۋ اپپاراتىنان اجىراتتىق», دەيدى ماماندار.
ناۋقاستىڭ جاعدايى تۇراقتالعاننان كەيىن ماماندار ونى ودان ءارى ەمدەۋ ءۇشىن وبلىستىق كوپبەيىندى بالالار اۋرۋحاناسىنا اۋىستىرۋ تۋرالى شەشىم قابىلدادى. بۇگىندە جاعدايى جاقسارعان ءسابيدىڭ اتا-اناسى بالا ءومىرىن اراشالاپ قالعان دارىگەرلەرگە العىسىن جاۋدىرىپ جاتىر.
بالانىڭ ءومىرى ءۇشىن كۇرەسكەن رەانيماتسيا ءبولىمىنىڭ مەڭگەرۋشىسى اۋەز حاسەن ۇلى, ايدا جولداسبايقىزى, ارايلىم سەيداراپقىزى باستاعان دارىگەرلەردىڭ جانكەشتى, تاباندى ەڭبەگىن ەرەكشە ايتا كەتكەن ءجون. وڭىردە جاڭا تۋعان سابيدە بۇرىن-سوڭدى كەزدەسپەگەن دەرتپەن كۇرەسكەن ولاردىڭ ەڭبەگى زور.
تاراز