ەكى نىسان پايدالانۋعا بەرىلدى

جاڭا نىساننىڭ اشىلۋىمەن اۋىل تۇرعىندارىن قۇتتىقتاعان وبلىس اكىمى نۇرلىبەك نالىباەۆ جىل سايىن ايماق­تاعى دەنساۋلىق ساقتاۋ سالاسىنىڭ بيۋدجەتى ۇلعايىپ كەلە جاتقانىن ايتىپ ءوتتى.

«مەملەكەت باسشىسى باستاماشى بولعان ۇلتتىق جوبا حالىقتىڭ ءومىر ءسۇرۋ ۇزاقتىعى مەن الەۋمەتتىك ءال-اۋقاتىن ارتتىرۋعا مۇمكىندىك بەرىپ وتىر. جوبا اياسىندا وبلىس كولەمىندە 28 مەديتسينالىق نىسان سالىندى. وسى اۋدانداعى ەسەت باتىر, مىرزاباي احۋن اۋىلدارىندا ەكى دارىگەرلىك امبۋلا­توريا 2023 جىلى اشىلىپ, قازىر ەل يگىلىگىنە قىزمەت ەتىپ كەلەدى. بۇگىن قولدانىسقا بەرىلىپ وتىرعان نىسان دا باستاپقى مەديتسينالىق كومەك كورسەتۋ ساپاسىن جاقسارتا تۇسەرىنە سەنەمىز. دارىگەرلەرىمىز ەلگە ادال قىزمەت ەتىپ, تۇرعىنداردىڭ العىسىنا بولەنە بەرسىن», – دەدى وبلىس باسشىسى.

وتكەن جىلى وڭىردە 8 مەديتسينالىق نىسانعا كۇردەلى جوندەۋ جۇمىستارى جۇرگىزىلدى. بيىل التى نىساننىڭ جىلۋ جۇيەسى گازعا اۋىستىرىلادى. سوڭعى 2 جىلدا وبلىستىڭ ەلدى مەكەندەرىندەگى دەنساۋلىق ساقتاۋ مەكەمەلەرىنە 245 جاڭا سانيتارلىق اۆتوكولىك تابىستالدى, ونىڭ 11-ءى جالاعاش اۋدانىنىڭ ۇلەسىنە ءتيدى.

بىلتىر ناۋرىزدا سىردا «رۋحانيات جىلى» باستالىپ, ونىڭ اياسىندا مادەني-كوپشىلىك شارالارمەن قاتار اۋقىمدى جوبالار دا قولعا الىندى. ايماق مادەنيەتى مەن ونەرىنە وزگەشە لەپ اكەلگەن جىل اياسىندا كوپ­فۋنكتسيونالدى, 1000 ورىندىق «ونەر ورتالىعى» سالىنىپ, سيمفونيا وركەسترى, ينكليۋزيۆتى تەاتر, جاستار تەاترى, زاماناۋي بي, حور ۇجىمدارى جاساقتالدى. ءداستۇرلى ونەردىڭ بايراعى كوتەرىلگەن وڭىردە «جىراۋلار ءۇيى» اشىلىپ, جادىگەر جىردى ارداق تۇتقان اعايىن قۋانىشقا كەنەلدى.

اتاۋلى جىل اياسىندا بارلىق اۋداندا رۋحاني-مادەني ورتالىقتار قۇرىلىسى باستالىپ, الدى قازىر قولدانىسقا بەرىلە باستادى. نەكە قيۋ زالى, كىتاپحانا, مۋزەي, ارحيۆ, جاستار سارايى, ارداگەرلەر مەن انالار ءۇيى بار وسىنداي نىساننىڭ ءبىرى جالاعاش كەنتىندە ەسىگىن ايقارا اشتى. ءۇش دۇركىن «التىن دومبىرا» يەگەرى مۇحتار نيازوۆتىڭ ارناۋىمەن باستالعان سالتاناتتا وبلىس باسشىسى تۇرعىنداردى قۇتتىقتاپ, ورتاق ىسكە ۇلەس قوسقان ازاماتتاردى ماراپاتتادى.

قىزىلوردا وبلىسى,

جالاعاش اۋدانى