ۇكىمەتتىڭ كەڭەيتىلگەن وتىرىسىنداعى پرەزيدەنت ايرىقشا نازار اۋدارعان ماسەلە – ەلدىڭ ەنەرگەتيكالىق قاۋىپسىزدىگىن نىعايتۋ جايى. راس, ەلەكتر ەنەرگياسىن ءوندىرۋ قارقىنىن ارتتىرمايىنشا, ەكونوميكا مەن كوممۋنالدىق سەكتوردى دامىتۋ مۇمكىن ەمەس. ال بۇل سالادا شەشىمىن تاپپاي تۇرعان تۇيتكىل كوپ-اق.
بۇل رەتتە مەملەكەت باسشىسىنىڭ ەنەرگەتيكا سالاسىنداعى «جاسىل كۇن ءتارتىبى» قاعيداتتارىن ەلىمىزدىڭ جالپى ەلەكتر قۋاتىن ءوندىرۋدى ۇلعايتۋداعى وزەكتى قاجەتتىلىكتەرىمىزبەن ۇشتاستىرۋ بويىنشا پراگماتيكالىق ۇسىنىسىن اتاپ وتكەن ءجون. بۇل ماسەلەنى تەز ارادا كومىرگە نەگىزدەلگەن ەلەكتر ستانسالارىنىڭ جاڭا تۇرلەرىن پايدالانۋ ارقىلى عانا شەشە الامىز. ياعني مۇنداي شارا اتوم ەلەكتر ستانسالارى سالىنعانشا قازىرگى ەنەرگيا تاپشىلىعىن ازايتۋدىڭ ۇتىمدى ءتاسىلى بولا الادى. بولاشاقتا ەلەكتر ەنەرگياسىن وندىرۋدە پروفيتسيتكە قول جەتكىزۋگە مۇمكىندىك بەرەدى.
الەمدىك تاجىريبەدە مۇنداي ءتاسىلدى قولدانۋ ءىرى دەرجاۆالاردىڭ ساياساتىنداعى ۇدەرىسىنە ساي كەلەدى. وعان قوسا, قازىرگى حالىقارالىق كۇن ءتارتىبىن ەسكەرسەك, ەلىمىز مۇنداي شارالاردى نازاردان تىس قالدىرا المايدى. دەمەك, مۇنىڭ استارىندا پراگماتيكالىق ءمان جاتىر.
باتىس قازاقستاننىڭ ەنەرگەتيكالىق جۇيەسىن ءبىر جۇيەگە بىرىكتىرۋ جانە وڭتۇستىك ەنەرگوجەلىسىن نىعايتۋ ماسەلەسى دە وتە وزەكتى. بۇرىن ەلەكتر جەلىلەرى مەن ەنەرگەتيكالىق جۇيەلەر تەرريتوريالىق ءبولىنۋدى ەسكەرمەي سالىنعان. ناتيجەسىندە, وتاندىق جەلىنىڭ ءبىر بولىگى رەسەيگە, ەكىنشىسى ورتالىق ازيا رەسپۋبليكالارىنا بايلاندى. بۇل كورشىلەس مەملەكەتتەرگە تاۋەلدىلىكتى, سونىمەن قاتار ەل ىشىندە ەنەرگيا اعىندارىن جىبەرىپ الۋ ماسەلەلەرىن تۋدىردى. اسىرەسە, بۇل جاعداي 2023 جىلعى شىلدەدە باتىس قازاقستاندا ەلەكتر قۋاتى ءۇزىلىپ, سونىڭ سالدارىنان ماڭعىستاۋ مەن اتىراۋ وبلىستارى جارىقسىز قالعان كەزدە ايقىن كورىندى. سوندىقتان ءبىرتۇتاس ۇلتتىق ەنەرگيا تاسىمالداۋ جەلىسى نەگىزىندە تۇراقتى پروفيتسيتتىك ەلەكترەنەرگەتيكالىق كەشەن قالىپتاستىرۋ بويىنشا پرەزيدەنت تاپسىرمالارىن جۇزەگە اسىرۋ – ەنەرگەتيكالىق قاۋىپسىزدىكتى نىعايتۋعا جانە ەكونوميكانىڭ تۇراقتى وسۋىنە جاعداي جاساۋعا مۇمكىندىك بەرەدى.
قورلان جۇسىپباەۆا,
ەۋرازيالىق ينتەگراتسيا ينستيتۋتىنىڭ ساراپشىسى