بيىل ۇلى جەڭىسكە 80 جىل تولادى. مەرەيلى كۇندى مەرەكەلەۋ قارساڭىندا سوعىس ارداگەرلەرىنە 5 ملن تەڭگە كولەمىندە قاراجات اۋدارىلاتىن بولدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى, دەپ حابارلايدى Egemen.kz.
20 قاڭتاردا جاسالعان ساناققا سۇيەنسەك, قازىر ەلىمىزدە 120 سوعىس ارداگەرى, سونداي-اق جەڭىسكە ۇلەس قوسقان 42 545 ازامات تۇرادى. ونىڭ ىشىندە: قورشاۋداعى لەنينگراد تۇرعىندارى – 67 ادام; كونتسلاگەرلەردىڭ بۇرىنعى كامەلەتكە تولماعان تۇتقىندارى – 139 ادام; سوعىس كەزىندە العان جارالانۋى, كونتۋزياسى, زاقىمدانۋى نەمەسە اۋرۋى سالدارىنان بولعان مۇگەدەكتىكپەن قايتىس بولعان ادامنىڭ جۇبايلارى – 743 ادام. سونداي-اق مايداندا قازا تاپقان نەمەسە حابار-وشارسىز جوعالعان جاۋىنگەرلەردىڭ جەسىرلەرى – 2 ادام, ال تىل ەڭبەككەرلەرى – 41 594 ادام.
ارداگەرلەر مەن تىل ەڭبەككەرلەرىنە قامقورلىق جاساۋ, ولاردىڭ ءومىر ءسۇرۋ ساپاسىن ارتتىرۋ – مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى. سول سەبەپتى قارتتاردى الەۋمەتتىك قورعاۋدىڭ ءتۇرلى شارالارى مەملەكەتتىڭ ورتالىق جانە جەرگىلىكتى دەڭگەيلەرىنەن جۇزەگە اسىرىلىپ كەلەدى.
ماسەلەن, زەينەتاقى جانە وزگە دە الەۋمەتتىك تولەمدەردىڭ مولشەرى جىل سايىن ارتىپ كەلە جاتقانىن ايتۋعا بولادى. ازاماتتاردىڭ 19 ساناتىنا (سوعىسقا قاتىسۋشىلار, تىل ەڭبەككەرلەرى, اقتالعان ازاماتتار جانە ت.ب.) وزگە دە الەۋمەتتىك تولەمدەرگە قاراماستان ارناۋلى مەملەكەتتىك جاردەماقى تولەنەدى. ايتالىق, وسى جىلدىڭ 1 قاڭتارىنداعى جاعدايعا سايكەس ەسەپتەسەك, مايدانگەرلەرگە اي سايىن بەرىلەتىن الەۋمەتتىك تولەمدەردىڭ جيىنتىق مولشەرى زەينەتاقىمەن بىرگە 262 334 تەڭگەنى جانە سوعىس كەزىندەگى جاراقاتى سالدارىنان مۇگەدەكتىگى بار ادامدار ءۇشىن – 279 330 تەڭگەنى قۇراعان.
سونىمەن قاتار ارداگەرلەرگە قوسىمشا كومەك تۇرلەرى دە تۇراقتى كورسەتىلىپ كەلەدى. ولاردىڭ ارقايسى اسكەري قىزمەتشىلەرگە كورسەتىلەتىن قۇقىقتار مەن كەپىلدىك يگىلىكتەرىنە يە. استانا جانە الماتى قالالارىنداعى مامانداندىرىلعان گوسپيتالداردا بىلىكتى مەديتسينالىق كومەك كورسەتىلەدى, ساناتوري نەمەسە كۋرورتتىق ەمدەۋ كۋرستارى ۇسىنىلادى.