وتكەن جىلدىڭ سوڭىندا ءوڭىر باسشىسى ەربول قاراشوكەەۆ 2025 جىلى جامبىل وبلىسىندا «اۋليەاتا – كىتاپ وقيتىن ءوڭىر» جوباسى جۇزەگە اسىرىلاتىنىن حابارلاپ, وعان ءوڭىردىڭ بارلىق ساناتىنداعى ازاماتى ۇلەس قوساتىنىن جەتكىزگەن ەدى. جوبا اياسىنداعى ءىس-شارالار جىل باستالعان ساتتەن-اق قولعا الىنعانى كوڭىل قۋانتىپ وتىر.
وبلىس اكىمدىگىنىڭ ءبىلىم باسقارماسى مەن «جامبىل وبلىسى ازاماتتىق اليانسى» زاڭدى تۇلعالار بىرلەستىگىنىڭ ۇيىتقى بولۋىمەن «وي شەبەرى» زياتكەرلىك ويىنى باستالدى. ءىس-شاراعا بارلىق اۋدان مەن وبلىس ورتالىعى تاراز قالاسىنداعى مەكتەپتەردىڭ وقۋشىلارى مەن ولاردىڭ جەتەكشىلەرى جۇمىلدىرىلدى. ۇيىمداستىرۋشىلاردىڭ ايتۋىنشا, اۋقىمدى جوباعا كىتاپقۇمار جاستاردان قۇرالعان 90 كوماندا قاتىسىپ جاتىر.
«جەرگىلىكتى قالامگەرلەردىڭ شوقتىعى بيىك شىعارمالارىن جاس بۋىننىڭ ساناسىنا ءسىڭىرۋ ماقساتىندا ۇيىمداستىرىلعان زياتكەرلىك ويىن 6 كەزەڭدى قامتيدى. ءبىلىم الۋشىلار شەرحان مۇرتازانىڭ «اي مەن ايشا», «قىزىل جەبە», ء«بىر كەم دۇنيە», باۋىرجان مومىش ۇلىنىڭ «ۇشقان ۇيا» سەكىلدى تۋىندىلارىن, كۇلاش احمەتوۆانىڭ بىرنەشە ولەڭ جيناعىن وقيدى. سونداي-اق جامبىل وبلىسىنان شىققان وزگە دە اقىن-جازۋشىلاردىڭ شىعارمالارى قامتىلادى. ءبىلىم الۋشىلار وقىعان كىتاپتارىنا قاتىستى ناقتى سۇراقتارعا جاۋاپ بەرىپ, كوركەم شىعارمالاردى وقىعانىن دالەلدەۋى كەرەك», دەيدى ۇيىمداستىرۋشىلار.
دەمەۋشىلەردىڭ قولداۋىمەن وتكىزىلەتىن ءار كەزەڭنىڭ جۇلدە قورى 1,2 ميلليون تەڭگەنى قۇرايدى. العاشقى كەزەڭدە مۇحتار اۋەزوۆ اتىنداعى مەكتەپ-ليتسەي (سارىسۋ اۋدانى), نىعمەتۋللا كيىكباەۆ اتىنداعى مەكتەپ-ليتسەي (بايزاق اۋدانى), مۇحتار اۋەزوۆ اتىنداعى مەكتەپ-ليتسەي (مەركى اۋدانى) كوماندالارى ۇزدىكتەر قاتارىنان كورىنىپ, جەڭىمپاز اتاندى.
ۇيىمداستىرۋشىلار كەلتىرگەن دەرەككە سەنسەك, اۋقىمدى جوبا جىل بويى جالعاسادى. ال دەمەۋشىلەردىڭ قارجىلاي قولداۋىمەن قولعا الىنعان جوبانىڭ جىلدىق جۇلدە قورى 18,8 ملن تەڭگەنى قۇرايدى ەكەن.
تاراز