جىل جىلىستاعان سايىن سۋ كوزدەرىن ءتيىمدى پايدالانۋدىڭ ماڭىزى ارتا تۇسەدى. اسىرەسە وڭتۇستىك وڭىرلەر جازدىڭ اپتاپ ىستىعىندا اعىن سۋدىڭ تاپشىلىعىن ايقىن سەزىنەدى. ترانسشەكارالىق وزەندەرگە تەلمىرگەن ايماقتار ءۇشىن قول قۋسىرىپ قاراپ وتىراتىن ۋاقىت ءوتىپ كەتتى. جاڭا تەحنولوگياعا, دۇرىسى تامشىلاتىپ سۋارۋ ادىسىنە كوشەتىن كەز ابدەن جەتتى.
ءبىرشاما ۋاقىت بۇرىن تامشىلاتىپ سۋارۋ جۇيەسىن شىعاراتىن ءوندىرىس وشاعىن سالۋعا بەكىنگەن «قاز كاسپي گيدرو سەلحوز تەحنولوگيا» جشس جاقىندا سول زاۋىتتىڭ رەسمي اشىلۋ سالتاناتىن ۇيىمداستىردى. رەسمي دەرەككە زەر سالساق, ءىرى جوبانىڭ جالپى قۇنى 2,8 ملرد تەڭگەنى قۇرايدى. سەرىكتەستىك وكىلدەرىنىڭ ايتۋىنشا, جاڭا زاۋىتتا جىلىنا 20 مىڭ گەكتارعا دەيىنگى القاپتى تامشىلاتىپ سۋارۋعا قاجەتتى جابدىقتار ءوندىرۋ كوزدەلگەن. قازىر جاڭا كاسىپورىن 30 ازاماتتى تۇراقتى جۇمىسپەن قامتىپ وتىر. ءوندىرىس وشاعى تولىق قۋاتىندا جۇمىس ىستەگەن كەزدە جۇمىسشىلار سانى ەكى ەسە كوبەيمەك.
«جاڭادان بوي كوتەرگەن زاۋىت كەلەسى ۆەگەتاتسيالىق كەزەڭگە تولىعىمەن دايىن. فەرمەرلەرگە 6 مىڭ گەكتارعا دەيىنگى القاپقا سۋارۋ جابدىقتارى بەرىلەدى. بۇدان بولەك, ۇڭعىمالاردى بۇرعىلاۋعا ارنالعان قۇرال-جابدىقتار ايتىلعان مەرزىمدە جەتكىزىلگەنىن اتاپ وتكەن ءجون. مەملەكەت باسشىسى قاسىم-جومارت توقاەۆتىڭ جان-جاقتى قولداۋىنىڭ ارقاسىندا وڭىرگە الەۋەتتى ينۆەستورلار تارتۋ جۇمىسى جۇيەلى تۇردە جۇرگىزىلىپ جاتىر. ال تامشىلاتىپ سۋارۋ جۇيەسىن شىعاراتىن جاڭا زاۋىت جامبىلدىق شارۋالاردىڭ دا بىرقاتار وزەكتى ماسەلەسىن شەشۋگە دەن قوياتىنى تالاس تۋدىرمايدى», دەيدى ءوڭىر باسشىسى ەربول قاراشوكەەۆ.
كەيىنگى جىلداردا قالىپتاسقان ۇردىسكە زەر سالساق, فەرمەرلەردىڭ تامشىلاتىپ سۋارۋ تەحنولوگياسىن پايدالانۋعا دەگەن قىزىعۋشىلىعى ۋاقىت وتكەن سايىن ارتىپ كەلە جاتقانىن بايقايمىز. اتقارىلعان جۇمىستىڭ ناتيجەسى دە جوق ەمەس. جاڭا تەحنولوگياعا دەن قويعان شارۋالاردىڭ ەسەبىنەن وڭىردە تامشىلاتىپ سۋارۋ ادىسىمەن سۋارىلاتىن القاپ كولەمى ايتارلىقتاي ۇلعايعان.
«2030 جىلعا قاراي سۋ تاپشىلىعىنىڭ كولەمى 40 پايىزعا جەتۋى مۇمكىن. سوندىقتان ءبىز جاڭا تەحنولوگيالار مەن تسيفرلاندىرۋ ارقىلى سۋ ۇنەمدەۋگە كوشۋىمىز كەرەك. سۋ تاپشىلىعىن جويۋدىڭ باسقا جولى جوق. بۇل – اسا ماڭىزدى مىندەت. ۇكىمەت سۋ پايدالانۋدى رەتتەۋ جانە ونى ۇنەمدەۋ تەحنولوگياسىن ەنگىزۋ جۇمىسىن ىنتالاندىرۋ ءۇشىن ناقتى شەشىمدەر ازىرلەۋگە ءتيىس», دەگەن ەدى پرەزيدەنت.
رەسمي دەرەككە جۇگىنسەك, جامبىل وبلىسىندا 181,8 مىڭ گەكتار سۋارمالى القاپ بار. ونىڭ 127,3 مىڭ گەكتارى جەرۇستى ادىسىمەن سۋارىلسا, 28,5 مىڭ گەكتارعا جاڭبىرلاتىپ سۋارۋ تەحنولوگياسى قولدانىلادى. 11,5 مىڭ گەكتار القاپقا تامشىلاتىپ سۋارۋ جۇيەسى پايدالانىلادى. بىلتىر 15,2 مىڭ گەكتار جەرگە سۋ ۇنەمدەۋ تەحنولوگياسى ورنالاستىرىلعان. بيىل قوسىمشا 10 گەكتار القاپقا جاڭا تەحنولوگيا ەنگىزىلمەك. ناتيجەسىندە, كورسەتكىش 64,5 مىڭ گەكتار القاپقا دەيىن ۇلعايماق. مامانداردىڭ ايتۋىنشا, جاڭا تەحنولوگيالاردى قولدانۋدىڭ ارقاسىندا ەگىنشىلىكتە سۋدى 50 پايىزعا دەيىن ۇنەمدەۋگە مۇمكىندىك تۋادى. ال تىڭ ءادىستىڭ ەڭ ءتيىمدىسى – تامشىلاتىپ سۋارۋ. ونىڭ اۆتوماتتاندىرىلعان ءتۇرى بولسىن, مەحانيكالىق ءتۇرى بولسىن شارۋالار ءۇشىن بارلىق جاعىنان ءتيىمدى دەسەدى.
جامبىل وبلىسى