شىمكەنت اۋەجايىندا جاڭا تەرمينال ىسكە قوسىلدى. بۇل شاھاردىڭ اۋە قاقپاسىنىڭ مۇمكىندىگىن اناعۇرلىم ارتتىرا تۇسپەك. ينفراقۇرىلىمدىق جاڭعىرتۋ باعىتىنداعى اۋقىمدى جوبا ءسوزسىز قالا ومىرىندەگى ايشىقتى وقيعا بولىپ تۇر.
قۇرىلىسى ءبىراز ۋاقىتقا سوزىلعان تەرمينالدىڭ اشىلۋ سالتاناتىنا قالا اكىمى عابيت سىزدىقبەكوۆ, «SCAT» اۋە كومپانياسى» اق پرەزيدەنتى ۆلاديمير دەنيسوۆ قاتىستى. شاھار باسشىسى مەن اۋە كومپانيا پرەزيدەنتى تەرمينال زالدارىن ارالاپ, جاڭا كەشەننىڭ مۇمكىندىكتەرىمەن تانىستى. سونىمەن بىرگە سالتاناتتى اشىلۋ مەرەكەسى اياسىندا استانا – شىمكەنت باعىتىنداعى العاشقى رەيستى قارسى الۋ مەن رەيستى شىعارىپ سالۋ ءىس-شاراسى ۇيىمداستىرىلدى. قۇتتىقتاۋ ءسوز سويلەگەن قالا اكىمى اۋەجايدىڭ كەڭەيۋى مەگاپوليستىڭ ترانزيتتىك كۇش-قۋاتىنىڭ ارتۋىنا ۇلكەن ۇلەس قوساتىنىن جەتكىزدى.
«مەملەكەت باسشىسى قاسىم-جومارت توقاەۆ جولداۋدا كولىك ينفراقۇرىلىمىن دامىتۋدىڭ ستراتەگيالىق ءمانى ايرىقشا ەكەنىن اتاپ وتكەن بولاتىن. سوندىقتان جاڭا تەرمينال قالا ەكونوميكاسىنا ۇلەس قوسىپ, ترانزيتتىك الەۋەتىمىزدى كۇشەيتەتىنىنە سەنىم مول. بۇگىنگى زاماندا تەمىرجول, اۆتوموبيلمەن بىرگە اۋە تاسىمالى سالاسىن دا قوسا دامىتۋدىڭ ءمانى زور. جولاۋشى, جۇك تاسىمالىنىڭ ماڭىزدى ۇلەسىن وسى كۇندە اۋە رەيستەرى قۇرايتىنىن ەسكەرسەك, جاڭا تەرمينالدىڭ بوي كوتەرۋى اۋەجاي ينفراقۇرىلىمىن جاڭا دەڭگەيگە شىعارعان ايرىقشا جوبا دەپ ەسەپتەۋ كەرەك. ەندى قالا اۋەجايىنىڭ وتكىزۋ قابىلەتى بىرنەشە ەسە ءوسىپ, تۇتاستاي العاندا مەگاپوليستىڭ الەۋمەتتىك-ەكونوميكالىق ورلەۋىنە وڭ سەپتىگىن تيگىزەدى», دەدى قالا اكىمى ع.سىزدىقبەكوۆ.
سونداي-اق قۇتتىقتاۋ سوزىندە شاھار باسشىسى وسى جوبانى جۇزەگە اسىرعان ينۆەستورلارعا, اۋقىمدى قۇرىلىستا كۇندىز-ءتۇنى تەر توككەن ينجەنەرلەردەن باستاپ قاراپايىم قۇرىلىسشى ازاماتتارعا العىسىن جەتكىزدى.
اۋدانى 40 مىڭ شارشى مەتر بولاتىن زاماناۋي كەشەن ساعاتىنا 2 000 جولاۋشىعا قىزمەت كورسەتۋگە قاۋقارلى. رەسمي مالىمەتكە سۇيەنەك, جاڭا تەرمينال قۇرىلىسىنا 24 ملرد تەڭگە قارجى جۇمسالدى. ناتيجەسىندە, بارلىق حالىقارالىق ستاندارتقا ساي كەلەتىن, زاماناۋي, جايلى ءارى تەحنولوگيالىق مۇمكىندىكتەرى قاراستىرىلعان ينفراقۇرىلىمدىق جاڭا نىسان بوي كوتەردى.
مامانداردىڭ ايتۋىنشا, تەرمينال جولاۋشىلار اعىنى مەن ۇشۋ گەوگرافياسىن ارتتىرۋعا, سونداي-اق قوسىمشا 700 جاڭا جۇمىس ورنىن اشۋعا مۇمكىندىك بەرەدى. ال قالا تۇرعىندارى مەن قوناقتارى زاماناۋي تالاپقا ساي قولايلى ءارى جىلدام سەرۆيستىك قىزمەتكە قول جەتكىزبەك. سول سەبەپتى تەرمينال قۇرىلىسىن شىمكەنتتىڭ ينفراقۇرىلىمدىق جوبالاردى جۇزەگە اسىرۋداعى باستى جەتىستىگى دەپ باعالاساق بولادى.
العاشقى كەزەڭدە تەرمينالدا «SCAT» اۋە كومپانياسىنىڭ كۇندىزگى ىشكى رەيستەرى ۇيىمداستىرىلسا, جاقىن ارادا وعان «Air Astana» مەن «Fly Arystan» اۋە كومپانيالارىنىڭ رەيستەرى دە قوسىلادى. سونداي-اق حالىقارالىق اۋە تاسىمالداۋشىلارمەن تاريفتىك ساياسات پەن ىنتىماقتاستىق ماسەلەلەرىنە قاتىستى كەلىسسوزدەر جۇرگىزىلىپ جاتىر. حالىقارالىق سەكتور مەن ترانزيتتىك ايماقتى اشۋ – جۇمىستارى كەلەسى جىلدىڭ ەنشىسىندە تۇرعان ماڭىزدى جوسپار.
جاڭا تەرمينالدىڭ ىسكە قوسىلۋى ءبىرىنشى كەزەكتە كورشىلەس ەلدەرمەن بايلانىستى جاقسارتا تۇسەرى انىق. ەكىنشىدەن, فرانتسيا, گەرمانيا, قىتاي, ءۇندىستان, پاكىستان, مىسىر, ۆەتنام, وڭتۇستىك كورەيا سياقتى مەملەكەتتەرمەن دە اۋە قاتىناسىن كەڭەيتۋگە ۇلكەن مۇمكىندىكتەر سىيلايدى.
شىمكەنت