پرەزيدەنت قاسىم-جومارت توقاەۆ «انا ءتىلى» گازەتىنە كەڭ كولەمدى سۇحبات بەردى. اڭگىمە بارىسىندا ەلىمىزدىڭ دامۋ ستراتەگياسىنداعى ماڭىزدى تۇجىرىمداما - ادىلدىك ەكەنى ايتىلدى, دەپ حابارلايدى Egemen.kz.
مەملەكەت باسشىسى ادىلدىك بارلىق ەلدە جانە بارلىق زاماندا حالىقتىڭ قالاۋى بولعانىن تىلگە تيەك ەتتى. مۇنىڭ قازاقستانعا دا قاتىسى بار ەكەنىن, سونداي-اق, قاسىرەتتى وقيعاعا دەيىن بىزدە ادىلدىك دەڭگەيى وتە تومەن بولعانى راس ەكەنىن ايتتى.
«ادىلدىك – ءبارىن تەڭەستىرۋ دەگەن ءسوز ەمەس. مەنىڭ ەل بايلىعىن ءادىل ءبولۋ تۋرالى ۇستانىمىم مەنشىك يەلەرىن مۇلكىنەن تۇگەل ايىرىپ, اكتيۆتەردى قايتا ءبولۋ دەگەندى بىلدىرمەيدى. ءبىز ىشتەن ىرۋگە جانە جۇگەنسىزدىكتىڭ بەلەڭ الۋىنا اكەپ سوقتىراتىن مۇنداي جولمەن جۇرمەيمىز. سوندىقتان كەزىندە باز بىرەۋلەرگە ورىنسىز بەرىلگەن ارتىقشىلىقتار مەن جەڭىلدىكتەردى الىپ تاستاۋ, زاڭسىز الىنعان اكتيۆتەردى مەملەكەتكە قايتارۋ – پوپۋليستىك قادام ەمەس, كەرىسىنشە, ادىلدىك قاعيداسى نەگىزىندە قازاقستاندى جاڭعىرتۋ ستراتەگياسى», دەدى قاسىم-جومارت توقاەۆ.
ايتا كەتەيىك, زاڭسىز الىنعان قاراجات ەسەبىنەن 2022 جىلدان بەرى مەملەكەت قازىناسىنا 2 تريلليون تەڭگەدەن استام (4,1 ميلليارد دوللار) قاراجات تۇسكەن.
«ادىلەتتى مەملەكەت دەگەنىمىز – قۇقىقتىق مەملەكەت. وندا ازاماتتاردىڭ ءبارى زاڭ الدىندا تەڭ بولادى, زاڭداردى, ەرەجەلەردى جانە نورمالاردى قاتاڭ ساقتاي وتىرىپ, جالپىعا بىردەي مۇمكىندىكتەردى تولىق پايدالانا الادى. ايتپاقشى, زاڭسىز الىنعان قارجى جانە باسقا دا اكتيۆتەردى قايتارۋعا قاتىستى جۇمىستىڭ ناتيجەسىندە 2022 جىلدان بەرى مەملەكەت قازىناسىنا 2 تريلليون تەڭگەدەن استام (4,1 ميلليارد دوللار) قاراجات ءتۇستى. بۇل قارجى مەكتەپتەر مەن ماڭىزدى ينفراقۇرىلىم نىساندارىن سالۋعا جانە وزگە دە الەۋمەتتىك مىندەتتەردى ورىنداۋعا جۇمسالىپ جاتىر. ادىلدىك دەگەنىمىز وسى ەمەس پە؟», دەدى مەملەكەت باسشىسى.