بيىل قىزىلوردادا الەۋمەتتىك نىساندار مەن تۇرعىن ءۇي قۇرىلىسىنىڭ قارقىنى ارتتى. تاۋەلسىزدىك مەرەكەسى قارساڭىندا قارماقشى, سىرداريا اۋداندارىندا ءۇي كەزەگىن كۇتكەن جاندار باسپاناعا قول جەتكىزدى. وبلىس ورتالىعىنداعى 84 پاتەرلىك 6 ۇيدەن 504 ادامعا كىلت تابىستالدى. بيىل وبلىس اۋماعىندا جاريالانعان «رۋحانيات جىلى» اياسىندا مادەنيەت سالاسى ماماندارىنا تاعى 40 پاتەر بەرىلدى. جاقىندا عانا «سىر جاستارى» وڭىرلىك باعدارلاماسىنىڭ قاتىسۋشىلارى پاتەرلى بولدى. «سىر جاستارى» – جىلىنا 100 جاس وتباسىنى باسپانامەن قامتۋ ءۇشىن قولعا الىنعان وڭىرلىك تىڭ جوبا.
جاستارعا باسپانا تابىستاۋ راسىمىندە وبلىس اكىمى نۇرلىبەك نالىباەۆ جاڭا قونىس يەلەرىنە تىلەگىن ءبىلدىرىپ, وڭىردەگى اۋقىمدى جوبالاردى اتاپ ءوتتى.
كەيىنگى تولقىن وكىلدەرىنە قامقورلىق مەملەكەت باسشىسىنىڭ نازارىندا تۇرعان ماسەلە ەكەنى بەلگىلى. وسىدان ەكى جىل بۇرىن الماتى قالاسى تۇرعىندارىمەن كەزدەسۋدە پرەزيدەنت قالا جاستارى ءۇشىن باسپانانىڭ ەڭ وزەكتى ماسەلە ەكەنىنە توقتالىپ: «ەڭبەك جولىن ەندى عانا باستاعان جاستار بىردەن پاتەر ساتىپ الا المايتىنى تۇسىنىكتى. جاستاردىڭ باسپانا الۋىنا جان-جاقتى جاعداي جاساۋ كەرەك. بۇل – مەملەكەتتىڭ باستى مىندەتىنىڭ ءبىرى» دەگەن ەدى. «جاستاردىڭ تۇرعىن ۇيگە مۇقتاجدىعى ماسەلەسىن شەشۋ ءۇشىن 2022 جىلدىڭ جەلتوقسان ايىندا وتكەن وبلىستىق جاستار فورۋمىندا العاش رەت «سىر جاستارى» باعدارلاماسىن نەسيەلەندىرۋ جولىمەن جۇزەگە اسىرۋ تۋرالى شەشىم قابىلداندى. وعان وبلىستىق بيۋدجەتتەن «وتباسى بانك» تۇرعىن ءۇي قۇرىلىس جيناق بانكى» ارقىلى كرەديت بەرۋگە 1,2 ملرد تەڭگە ءبولىندى. باعدارلامانى بىرلەسە جۇزەگە اسىرۋ ءۇشىن «وتباسى بانك» 500 ملن تەڭگە قارجى ءبولدى. مامىر ايىندا 60 جاس وتباسى باسپانالى بولسا, بۇگىن, مىنە, 40 پاتەردىڭ كىلتىن تابىستايمىز. بۇل قونىستوي – باستالعان جۇمىستىڭ جالعاسى. باعدارلاماعا كەلەسى جىلعا دا وبلىستىق بيۋدجەتتەن قارجى قارالدى. شاڭىراقتارىڭىز بالالارمەن بازارلى, قۇتتى قوناقتارىمەن اجارلى بولسىن!» دەدى وبلىس باسشىسى.
سالتاناتتى ءىس-شارادا ەل اعالارى باتا بەرىپ, جاڭا پاتەردەن باسپانا بۇيىرعان كوپبەيىندى قالالىق اۋرۋحانانىڭ جاس مامانى سالتانات سەيىتكامال كوپشىلىك اتىنان كورسەتىلگەن قولداۋعا العىسىن جەتكىزدى. پاتەر كىلتىن العان وتباسىلار قاتارىندا ۇستازدار, مەديتسينا ماماندارى مەن بيۋدجەتتىك مەكەمەلەر قىزمەتكەرلەرى بار.
بيىل وبلىس بيۋدجەتى 750 ملرد تەڭگەگە جەتىپ, تۇرعىن ءۇي قۇرىلىسىنا جانە جەكە سالۋشىلاردان دايىن پاتەرلەر ساتىپ الۋعا 39 ملرد 100 ملن تەڭگە بولىنگەن. بىلتىردان بەرى قالادا جەتى, توعىز, ون ەكى قاباتتى تۇرعىن ۇيلەر بوي كوتەرە باستادى.
مەملەكەت باسشىسىنىڭ قولداۋىمەن ۇلتتىق جوبالار اياسىندا كەيىنگى ەكى جىلدا 4 مىڭعا جۋىق پاتەر تابىستالىپ, 17 مىڭ تۇرعىننىڭ باسپانا ماسەلەسى شەشىلگەن. جىل باسىنان بەرى 2 مىڭعا جۋىق وتباسى قونىستويىن تويلاپ, تۇرعىن ءۇي قۇرىلىسى كولەمى 126 پايىزعا ءوستى.
قىزىلوردا